ലോകത്ത് ആദ്യമായി 5ജി സാങ്കേതികവിദ്യ ഉപയോക്താക്കൾക്കു ലഭ്യമാക്കാനൊരുങ്ങിയ ഖത്തറിന് സന്തോഷമേകുന്ന വാർത്തയാണ് പുറത്തു വരുന്നത്. വാണിജ്യാടിസ്ഥാനത്തിൽ 5ജി സ്പെക്ട്രം പ്രവർത്തിപ്പിക്കാനുളള ലൈസൻസ് കമ്യൂണിക്കേഷൻ റഗുലേറ്ററി അതോറിറ്റി (സിആർഎ) വോഡഫോൺ ഖത്തറിന് അനുവദിച്ചു.

5ജി പരീക്ഷണാടിസ്ഥാനത്തിൽ പ്രവർത്തിപ്പിക്കുന്നതിന് അനുവദിച്ചിരുന്ന ലൈസൻസിനു പകരമാണ് ഇപ്പോൾ സിആർഎ വാണിജ്യ ലൈസൻസ് അനുവദിച്ചത്. ഓഗസ്റ്റ് മുതൽ വോഡഫോൺ 5ജി പ്രവർത്തനം ആരംഭിച്ചിരുന്നു.

അൽ വാബ്, അബു ഹമൂർ, അൽ അസീസിയ, അൽ മാമൂറ, അൽ റയ്യാൻ, കത്താറ കൾച്ചറൽ വില്ലേജ്, സൽവ റോഡ്, സൂഖ് വാഖിഫ്, ഉം സലാൽ മുഹമ്മദ് തുടങ്ങിയ സ്ഥലങ്ങളിൽ വോഡഫോൺ ഖത്തർ 5ജി സേവനം ലഭ്യമാക്കിയിട്ടുണ്ട്. ഖത്തറിനും വോഡഫോണിനും ചരിത്ര പ്രധാനമായ ദിവസമാണിതെന്നു വോ‍ഡഫോൺ ഖത്തർ സിഇഒ ഷെയ്ഖ് ഹമദ് അബ്ദുല്ല ജാസിം അൽ താനി പറഞ്ഞു.വാണിജ്യാടിസ്ഥാനത്തിൽ 5ജി ആരംഭിക്കുന്ന ലോകത്തെ ആദ്യത്തെ ഓപ്പറേറ്റർമാരിൽ ഒന്നാവുകയാണു വോ‍ഡഫോൺ ഖത്തറെന്നതിൽ അഭിമാനമുണ്ട്.

ഖത്തർ ദേശീയ ദർശന രേഖയിലെ ലക്ഷ്യങ്ങൾ സാക്ഷാൽക്കരിക്കാൻ സിആർഎ നൽകുന്ന പിന്തുണയ്ക്കു നന്ദിയുണ്ടെന്നും അദ്ദേഹം പറഞ്ഞു. ഖത്തറിന്റെ വളർച്ചയ്ക്കും അഭിവൃദ്ധിക്കും സഹായകരമായ ഡിജിറ്റൽ സംവിധാനങ്ങളും അനുബന്ധ അടിസ്ഥാന സൗകര്യങ്ങളും വികസിപ്പിക്കുന്നതിൽ വോഡഫോൺ ഖത്തർ പ്രതിജ്ഞാബദ്ധമാണ്.

ഉപഭോക്താക്കളെ 5ജി സാങ്കേതികവിദ്യയിലേക്കു ബന്ധിപ്പിക്കുന്നതിനും ജീവിത നിലാവരം ഉയർത്തുന്നതിനുമാണു ഇനിയുള്ള ശ്രമമെന്ന് ഷെയ്ഖ് ഹമദ് അബ്ദുല്ല ജാസിം അൽ താനി പറഞ്ഞു. 5ജി പരീക്ഷണാടിസ്ഥാനത്തിൽ പ്രവർത്തിപ്പിച്ചു തുടങ്ങിയതിനു ശേഷം ഖത്തർ സയൻസ് ആൻഡ് ടെക്നോളജി പാർക്കിലെ (ക്യുഎസ്ടിപി) ഗൾഫ് ബ്രിജ് ഇന്റർനാഷനലിനാണ്(ജിബിഐ) വോ‍ഡഫോൺ 5ജി കണക്റ്റിവിറ്റി ആദ്യമായി ലഭ്യമാക്കിയത്. ഇന്നലെ മുതൽ വോഡഫോൺ 5ജിയുടെ ആദ്യ വാണിജ്യ ഉപഭോക്താവായി ജിബിഐ മാറി. ഈ വർഷം മുതൽ 5ജി ഉപയോഗിക്കാവുന്ന മൊബൈൽ ഹാൻഡ്സെറ്റുകൾ ലഭ്യമാകുമെന്നാണു പ്രതീക്ഷിക്കുന്നത്.