കുവൈത്തിലെ ആരോഗ്യ മന്ത്രാലയത്തിന്റെ കീഴിലുള്ള വിവിധ ആശുപത്രികളിൽ ജോലി ചെയ്യുന്ന മലയാളികളടക്കമുള്ള ഒട്ടേറെ വിദേശികളുടെ സേവന കരാർ കാലാവധി ദീർഘിപ്പിക്കുമെന്ന് റിപ്പോർട്ടുകൾ. സ്വദേശിവത്കരണത്തിൻ‌റെ ഭാഗമായി പിരിച്ചുവിടേണ്ട വിദേശികളുടെ പട്ടിക തയാറാക്കുന്നതിനിടെയാണ് പലരുടെയും കാലാവധി നീട്ടാനുള്ള തീരുമാനം അധികൃതർ കൈക്കൊണ്ടിരിക്കുന്നത്. അതേസമയം നടപടിയ്ക്കായുള്ള അനുമതി ആരോഗ്യമന്ത്രാലയത്തിന് ലഭിച്ചു.

ആരോഗ്യ സേവന രംഗത്തിന്റെ പ്രവർത്തനം തടസപ്പെടാതിരിക്കാനുള്ള മുൻ‌കരുതൽ എന്ന നിലയിലാണ് തീരുമാനമെന്ന് അധികൃതർ വ്യക്തമാക്കി. സബാഹ്, ഫർവാനിയ, ജഹ്‌റ സോണുകളിൽ ജോലി ചെയ്യുന്നവർക്കാണ് ആനുകൂല്യം ലഭിക്കുക. വിവിധ കാലങ്ങളിലേക്കുള്ള സർവ്വീസ് കാലാവധി ദീർഘിപ്പിക്കൽ വഴി മന്ത്രാലയത്തിന് 2.6 ദശലക്ഷം ദിനാർ ചെലവ് വരും. എക്സ്-റെ, ലബോറട്ടറി, ഫാർമസി ടെക്നീഷ്യന്മാരുടെ സേവനകാലാവധിയാണ് ദീർഘിപ്പിക്കുന്നത്. സബാഹ് ഹെൽത്ത് സോണിൽ ഈ മാസം 5 മുതൽ 9 മാസത്തേക്കും ഫർവാനിയയിലും ജഹ്‌റയിലും ഫെബ്രുവരി 5ന് കാലാവധി അവസാനിക്കുന്ന ഏതാനും പേർക്ക് 5 മാസത്തേക്കും കരാർ കാലാവധി ദീർഘിപ്പിച്ച് നൽകും.