കോവിഡ് പിടിപെട്ടെന്ന പേടിയെത്തുടര്‍ന്നു ദുബായില്‍ ഒരു മലയാളി ജീവനൊടുക്കിയതായി റിപ്പോര്‍ട്ട്. കൊല്ലം പ്രാക്കുളം സ്വദേശിയാണ് ദുബായില്‍ താമസിക്കുന്ന കെട്ടിടത്തിനു മുകളില്‍ നിന്നു ചാടി ആത്മഹത്യ ചെയ്തതായി ബന്ധുക്കള്‍ക്കു വിവരം ലഭിച്ചത്. പ്രാക്കുളം മായാ വിലാസില്‍ അശോകന്‍ ആണു മരിച്ചത്. 46 വയസായിരുന്നു. ഇന്നു രാവിലെയാണു സംഭവം. അള്‍സറിനും മറ്റുമായി കേരളത്തില്‍ നിന്നു മരുന്ന് വരുത്തി കഴിക്കുകയായിരുന്ന അശോകന്, ലോക്ഡൗണ്‍ മൂലം മരുന്നു കിട്ടാതായി. ഇതിനിടെ ശാരീരികാസ്വസ്ഥതകള്‍ കണ്ടതിനെതുടര്‍ന്നു ആശുപത്രിയില്‍ ചികില്‍സ തേടിയിരുന്നു. ഇതിനിടെ, കോവിഡ് 19 പരിശോധനയ്ക്കായി സ്രവം ശേഖരിച്ച ശേഷം, താമസസ്ഥലത്തു ക്വാറന്റീനില്‍ കഴിയാന്‍ ഡോക്ടര്‍മാര്‍ നിര്‍ദേശിച്ചിരുന്നു. ഇതിനിടെയാണു ആത്മഹത്യ ചെയ്തത്..

അതിനിടെ, കോവിഡ് ബാധിച്ച് മലപ്പുറം സ്വദേശി അബുദാബിയില്‍ മരിച്ചു. തിരൂര്‍ പുറത്തൂര്‍ സ്വദേശി കോവിഡ് ബാധിതനായി അബുദാബിയില്‍ മരിച്ചു. മത്സ്യ വ്യാപാരിയായിരുന്ന പുളിക്കല്‍ കുഞ്ഞിമോനാണ് മരിച്ചത്. ഇദ്ദേഹത്തിന് 55 വയസായിരുന്നു. രോഗ ലക്ഷണങ്ങളോടെ ആശുപത്രിയില്‍ ചികിത്സയിലായിരുന്ന ഇയാള്‍ക്ക് 7 ദിവസം മുന്‍പാണ് കോവിഡ് സ്ഥിരീകരിച്ചത്. സംസ്‌കാരം അബുദാബിയില്‍ തന്നെ നടത്തി.

അതേസമയം, വിവിധ ഗള്‍ഫ് നാടുകളിലെ കോവിഡ്-19 സ്ഥിരീകരിച്ചവരുടെ എണ്ണം ഇരുപതിനായിരം കടന്നു. സൗദി അറേബ്യയില്‍ വ്യാഴാഴ്ച 518 പേരിലാണ് രോഗം സ്ഥിരീകരിച്ചത്. നാലു പേര്‍ മരിച്ചു. ഖത്തറില്‍ 392 പേരിലും ഒമാനില്‍ 109 പേരിലും രോഗം സ്ഥിരീകരിച്ചു. ഇതിനകം ഗള്‍ഫ് നാടുകളിലെ മൊത്തം മരണം നൂറ്റിനാല്‍പ്പതായി. അതിനിടെ, സൗദി അറേബ്യയില്‍ കോവിഡ് ബാധിച്ചവരുടെ എണ്ണം 6380 ആയി ഉയര്‍ന്നു. രോഗികളില്‍ 5307 പേരാണ് ചികിത്സയിലുള്ളത്. ഇതില്‍ 71 പേരുടെ നില ഗുരുതരമായി തുടരുന്നു. ഇതിനകം 990 പേരാണ് രോഗമുക്തി നേടിയത്. കുവൈത്തില്‍ കോവിഡ് ബാധിച്ചവരുടെ എണ്ണം 1524 അയി ഉയര്‍ന്നു. വ്യാഴാഴ്ച 75 ഇന്ത്യക്കാരടക്കം 119 പേര്‍ക്കാണ് രോഗബാധ സ്ഥിരീകരിച്ചത് ഇതോടെ കുവൈത്തിലെ രോഗബാധിതരുടെ എണ്ണം 1524 അയി. ഇതില്‍ 860 പേര്‍ ഇന്ത്യക്കാരാണ്. 1296 പേരാണ് കുവൈത്തില്‍ ചികിത്സയിലുള്ളത്. 32 പേര്‍ തീവ്ര പരിചരണ വിഭാഗത്തിലുമാണ്.

ഖത്തറിലെ മൊത്തം രോഗികളുടെ എണ്ണം 4103 ആയി. 197 പേര്‍ക്ക് പുതുതായി രോഗം സ്ഥിരീകരിച്ചതായി ഖത്തര്‍ ആരോഗ്യ മന്ത്രാലയം അറിയിച്ചു. കഴിഞ്ഞ 24 മണിക്കൂറിനിടെ 39 പേര്‍ക്ക് വൈറസ് ബാധ ഭേദമായി. ഇതോടെ 373 പേര്‍ക്കാണ് രാജ്യത്ത് ഇതുവരെ രോഗം ഭേദമായത്. കഴിഞ്ഞ 24 മണിക്കൂറിനിടെ 1794 പേര്‍ക്ക് രോഗപരിശോധന നടത്തി. ഇതോടെ കോവിഡ് പരിശോധനയ്ക്ക് വിധേയമായവരുടെ മൊത്തം എണ്ണം 52000 കടന്നുവെന്നും ആരോഗ്യ മന്ത്രാലയം അറിയിച്ചു.