പെരുന്നാൾ ദിനത്തിൽ തങ്ങളുടെ അതിഥികളെ ആദരിക്കുന്നതിൽ പിശുക്കില്ലാത്ത അറബ് കുടുംബങ്ങൾ കോവിഡ് സുരക്ഷയ്ക്കായി ഈ പെരുന്നാൾ ദിനം കവചമൊരുക്കിയിരിക്കുകയാണ്. കോവിഡ് വ്യാപനത്തെ തടുക്കാൻ സന്ദർശകരെ വിലക്കിയിരിക്കുകയാണ് കുടുംബങ്ങൾ. തങ്ങളുടെ വീടിനു മുന്നിൽ 'ക്ഷമാപണ' ബോർഡുകൾ തൂക്കിയാണ് കുടുംബങ്ങൾ അധികൃതരുടെ സുരക്ഷാ നിർദേശങ്ങൾ പാലിച്ചുകൊണ്ട് പെരുന്നാൾ ആഘോഷം നടത്തുന്നത്. അതോടൊപ്പം തന്നെ മഹാമാരിയുടെ കാലത്തെ ഈദ് ദിനം പുതുമകളുടെയും കൗതുകത്തിന്റെയും കാഴ്ചകളാണ് സമ്മാനിക്കുന്നത്. ഈ മഹത്തായ ദിനം മുൻകരുതലിന്റെയും ഭാഗമാക്കിത്തീർക്കുകയാണ് ഓരോരുത്തരും.

അതായത് 'നമ്മുടെ പ്രിയ അതിഥികളെ, നിലവിലുള്ള സാഹചര്യത്തിൽ ഈദുൽ ഫിതർ ആശംസകൾ കൈമാറാൻ സന്ദർശകരെ സ്വീകരിക്കാൻ കഴിയാത്തതിൽ ഞങ്ങൾ ഖേദിക്കുന്നു. കുടുംബത്തിന്റെയും നിങ്ങളുടെയും സുരക്ഷയ്ക്കു വേണ്ടിയാണത്.'– എന്നത് എഴുതിയതിനു ശേഷം പെരുന്നാൾ ആശംസകൾ അറിയിക്കാനുള്ള ടെലഫോൺ നമ്പറും ഈദ് ആശംസയും ഒപ്പം നൽകിയിട്ടുള്ള ബോർഡുകളാണ് വീടിനുമുന്നിൽ തൂക്കിയിരിക്കുന്നത്.

ഇതോടൊപ്പം തന്നെ ഓരോ സ്വദേശി കുടുംബങ്ങളും സ്വയം പ്രതിരോധിക്കാൻ ഇത്തരം ബോർഡുകളാണ് മുൻകരുതലെന്നോണം തങ്ങളുടെ വീടുകളുടെ കവാടങ്ങളിൽ സ്ഥാപിചിരിക്കുന്നത്. ചില വീടുകളിൽ ' നിങ്ങളുടെ പെരുന്നാൾ നിങ്ങളുടെ വീട്ടിൽ ' എന്ന ഓർമപ്പെടുത്തലും ഉൾപ്പെടുത്തിയിട്ടുണ്ട്. കൊവിഡ് വ്യാപനം തടയാൻ ഈദ് ദിനത്തിൽ ഗൃഹസന്ദർശനങ്ങൾ ഒഴിവാക്കണമെന്നാണ് യുഎഇ സർക്കാറിന്റെ കർശന നിർദേശം എന്നത്. ഇതു കേൾക്കാതെ സൗഹൃദ സന്ദർശനത്തിന് ഇറങ്ങുന്നവർ വീടുകൾക്ക് മുന്നിൽ നിന്നും മടങ്ങേണ്ടി വരുമെന്നതാണ് ഈ ബോർഡുകൾ സൂചിപ്പിക്കുന്നത്.