ഗൾഫ് രാഷ്രങ്ങളിൽ വിവിധയിടങ്ങളിലായി 32 പേർ കൂടി മരിച്ചതോടെ കോവിഡ് മരണ സംഖ്യ 840 ആയി. 6700 പേർക്ക് കൂടി പുതുതായി രോഗം സ്ഥിരീകരിക്കുകയുണ്ടായി. ഇതോടെ രോഗികളുടെ എണ്ണം ഒരു ലക്ഷത്തി എഴുപത്തി ആറായിരം പിന്നിടുകയുണ്ടായി. ഇന്ന് പെരുന്നാൾ മുൻനിർത്തി നിയന്ത്രണങ്ങൾ കൂടുതൽ ശക്തമാക്കുകയും ചെയ്തു.

അതോടൊപ്പം തന്നെ ലഭ്യമാകുന്ന വിവരം അനുസരിച്ച് മരണസംഖ്യയിലും രോഗികളുടെ എണ്ണത്തിലും സൗദി അറേബ്യയാണ് മുന്നിൽ നിൽക്കുന്നത്. ഇന്നലെ മാത്രം 15 പേരാണ് സൗദിയിൽ മരിച്ചത്. ഇതോടെ സൗദിയിൽ മരണസംഖ്യ 379ൽ എത്തി നിൽക്കുകയാണ്. ഒപ്പം രോഗികളുടെ എണ്ണം 70,000 കടന്നു. എന്നാൽ കുവൈത്തിൽ 10 പേരാണ് മരിച്ചത്. ഇതോടുകൂടി രാജ്യത്തെ കോവിഡ് മരണസംഖ്യ 148 ആയി ഉയർന്നു. യു.എ.ഇയിൽ മൂന്നും ഖത്തറിൽ രണ്ടും ഒമാൻ, ബഹ്റൈൻ എന്നിവിടങ്ങളിൽ ഓരോ രോഗികൾ വീതവും മരിക്കുകയുണ്ടായി.

എന്നാൽ കർശന നിയന്ത്രണങ്ങൾക്കിടയിൽ മുഴുവൻ ഗൾഫ് രാജ്യങ്ങളും ഇന്ന് ചെറിയ പെരുന്നാൾ ആഘോഷിക്കുകയാണ്. ഇതേതുടർന്ന് ഗൾഫിൽ എവിടെയും പള്ളികളിലും ഈദ്‍ഗാഹുകളിലും പെരുന്നാൾ നമസ്കാരമുണ്ടാവില്ല. വീടുകളിൽ ആഘോഷത്തിനായി ഒത്തുചേരുന്നതിനും നിയന്ത്രണം ഏർപ്പെടുത്തുകയും ചെയ്തു.