പാലക്കാട് ലക്കിടി മംഗലം സ്വദേശി സൗപർണികയിൽ ജിനു ചന്ദ്രനെ അബുദാബിയിൽ മരിച്ച നിലയിൽ കണ്ടെത്തിയാതായി റിപ്പോർട്ട്. പ്രായം 39. അഡ്നോക് റിഫൈനിങ് കമ്പനിയുടെ റുവൈസ് ഏരിയ സർവീസസ് ഡിവിഷനിൽ ‍പ്രൊജക്ട് ഡവലപ്മെന്റ് എൻജിനീയറായി ജോലി ചെയ്തു വരികയായിരുന്നു ഇദ്ദേഹം.

അതേസമയം കോവിഡ് ജാഗ്രതയുടെ ഭാഗമായി റുവൈസിലെ താമസ സ്ഥലത്തിരുന്ന് (വർക്ക് ഫ്രം ഹോം) ജോലി ചെയ്തിരുന്ന ഇദ്ദേഹം രണ്ടു ദിവസമായി ആരുമായും ബന്ധപ്പെട്ടിരുന്നില്ല എന്നാണ് ലഭ്യമാകുന്ന വിവരം. ഇതേതുടർന്നു പൊലീസ് എത്തി മുറി തുറന്നപ്പോഴാണ് മരിച്ച നിലയിൽ കണ്ടെത്തിയത് എന്നാണ് അധികൃതർ വ്യക്തമാക്കുന്നത്. ബദാസായിദ് ആശുപത്രിയിൽ സൂക്ഷിച്ചിരിക്കുന്ന മൃതദേഹം നടപടികൾ പൂർത്തിയാക്കി നാട്ടിലേക്കു കൊണ്ടുപോകുന്നതായിരിക്കും.

കുറ്റിപ്പുറം എംഇഎസ് കോളജ് മുൻ യൂണിയൻ ചെയർമാനായിരുന്ന ഇദ്ദേഹം ആറു മാസം മുൻപാണ് അബുദാബിയിൽ ജോലിക്കായി എത്തിയത്. അതോടൊപ്പം തന്നെ നേരത്തെ ഖത്തറിൽ ജോലി ചെയ്യവേ കെട്ടിടത്തിനു മുകളിൽനിന്ന് വീണ് തലയ്ക്കു പരുക്കേറ്റിരുന്നു. പരേതനായ കെ.പി. ചന്ദ്രശേഖരന്റെയും വി.കെ. വൽസലയുടെയും മകനാണ് ഇദ്ദേഹം. ഭാര്യ: സൗമ്യ. മക്കൾ: ദ്രുവ്, ദ്വാനി, ദ്വിതി എന്നിവർ.