ദുബായിൽ ഇന്ത്യൻ ദമ്പതികളെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തിയാതായി റിപ്പോർട്. 40 വയസ്സുള്ള ഹിരൻ ആദിയ, വിധി ആദിയ എന്നിവരാണ് മരിച്ചത് എന്നാണ് ലഭ്യമാകുന്ന വിവരം. അറേബ്യൻ റാഞ്ചസ് മിറാഡറിലെ വില്ലയിൽ ഈ മാസം 18നായിരുന്നു സംഭവമെന്ന് അധികൃതർ വ്യക്തമാക്കി. പോലീസിന്റെ പ്രാഥമിക അന്വേഷണത്തിൽ കവർച്ചക്കാർ കൊലപ്പെടുത്തിയതാണെന്ന് കണ്ടെത്തിയതായി ഇന്ത്യൻ കോൺസൽ ജനറൽ വിപുൽ പറഞ്ഞു. ഇതോടൊപ്പം തന്നെ ദമ്പതികളുടെ സ്വർണാഭരണങ്ങൾ നഷ്ടപ്പെട്ടിട്ടുണ്ട്. ഇവ പിന്നീട് കണ്ടെത്തുകയും പ്രതികളെ അറസ്റ്റ് ചെയ്യുകയുമുണ്ടായതായി പറയുകയാണ്.

അതേസമയം ഷാർജ ആസ്ഥാനമാക്കി ബിസിനസ് നടത്തിവരികയായിരുന്നു ഹിരൻ ആദിയയും വിധി ആദിയയും. ഈ ദമ്പതികൾക്ക് 18, 13 വയസുള്ള പെൺമക്കളുണ്ട്. ഇപ്പോൾ ബന്ധുക്കളുടെ കൂടെ താമസിക്കുന്ന ഇവരുമായി ബന്ധപ്പെട്ട് കൂടുതൽ വിവരങ്ങൾ ശേഖരിച്ചു വരികയാണെന്ന് വിപുൽ വെളിപ്പെടുത്തുകയുണ്ടായി. എന്നാൽ, ദുബായ് പൊലീസ് സംഭവത്തെക്കുറിച്ചുള്ള വിവരങ്ങൾ ഇതുവരെ പുറത്തുവിട്ടിട്ടില്ല. വരും ദിവസങ്ങളിൽ ഇതുമായി ബന്ധപ്പെട്ട് കൂടുതൽ വിവരങ്ങൾ ലഭിക്കുമെന്നാണ് പ്രതീക്ഷ പ്രകടിപ്പിക്കുന്നത്.