കൊറോണ വ്യാപനത്തെ തുടർന്ന് വിദേശങ്ങളിൽ കുടുങ്ങിക്കിടക്കുന്ന പ്രവാസികളെ തിരികെ എത്തിക്കുന്ന വന്ദേഭാരത് ദൗത്യം, ചാർട്ടേഡ് വിമാനങ്ങൾ എന്നിങ്ങനെ ഇതുവരെയെത്തിയത് എഴുനൂറോളം വിമാനങ്ങളാണ്. അങ്ങനെ ഇതിലെല്ലാമായി ആകെ 1,20,183 പേരെത്തി. ഇതിനോടകം തന്നെ അഞ്ചുലക്ഷം പേരാണ് തിരിച്ചുവരുന്നതിനായി നോർക്കയിൽ രജിസ്റ്റർ ചെയ്തത്. ആദ്യഘട്ടത്തിൽ സംസ്ഥാന സർക്കാർ അനുമതി നൽകിയതും വിദേശകാര്യ മന്ത്രാലയത്തിന്റെ അനുമതി ലഭിച്ചതും 1114 വിമാനങ്ങൾക്കാണ് എന്നാണ് കണക്കുകൾ വ്യക്തമാക്കുന്നത്.

അതേസമയം ജൂൺ 26-ന് പുലർച്ചെവരെ എത്തിയത് 648 വിമാനങ്ങളാണ്. ഏറ്റവും കൂടുതൽ വിമാനങ്ങൾ ജൂൺ 25 മുതൽ 30 വരെയുള്ള ദിവസങ്ങളിലാണ് ഷെഡ്യൂൾ ചെയ്തതിരുന്നത്. യു.എ.ഇ.യിൽനിന്നുമാത്രം 118 വിമാനങ്ങളാണ് എത്തിച്ചേർന്നത്. എന്നാൽ ഇതിൽ 94-ഉം വിവിധ സംഘടനകൾ ചാർട്ടർ ചെയ്തതാണ്. ഖത്തറിൽനിന്ന് 17 വിമാനങ്ങൾ ഉണ്ട്. കെനിയ, ഫ്രാൻസ്, വിയറ്റ്നാം, ജോർജിയ, യുക്രൈൻ, ന്യൂസീലൻഡ് എന്നിവിടങ്ങളിൽനിന്ന് ഓരോ വിമാനവും യു.കെ.യിൽനിന്ന് മൂന്ന് വിമാനവും ലഭ്യമാക്കിയിട്ടുണ്ട്.