കുവൈറ്റ് കടുത്ത നടപടികളിലേക്ക് കടക്കുകയാണ്. പ്രവാസികളെ ആവുന്ന വിധം എക്സിറ്റ് നൽകി തിരിച്ചയക്കാൻ പലവിധ മാർഗങ്ങളാണ് ശുപാർശ ചെയ്യുന്നത്. കോവിഡ് വ്യാപനത്തിന് പിന്നാലെ ഇന്ത്യ ഉൾപ്പടെ 33 രാജ്യങ്ങളിൽ നിന്ന് വിമാന സർവീസുകൾ അനുവധിച്ചില്ല എന്നുമാത്രമല്ല സ്വദേശാവത്കരണം കടുപ്പിച്ചത് പ്രവാസികൾക്ക് കനത്ത തിരിച്ചടിയാണ് നൽകുന്നത്. ഇപ്പോഴിതാ കുവൈത്തില്‍ 60 വയസിന് മുകളില്‍ പ്രായമുള്ള 97,612 പ്രവാസികളുടെ വിസ ഇനി പുതുക്കാനാവില്ല എന്ന തീരുമാനമാണ് കുവൈറ്റ് മുന്നോട്ട് വയ്ക്കുന്നത്.

പബ്ലിക് അതോരിറ്റി ഫോര്‍ സിവില്‍ ഇന്‍ഫര്‍മേഷന്‍ പുറത്തുവിട്ട കണക്കുകള്‍ പ്രകാരമാണ് ഈ വിവരം പുറത്ത് വരുന്നത്. ഹയര്‍സെക്കണ്ടറിയോ അതില്‍ താഴെയോ വിദ്യാഭ്യാസ യോഗ്യതയുള്ളവരും വിദ്യാഭ്യാസ യോഗ്യതകള്‍ തീരെയില്ലാത്തവരുമാണ് ഇവരെന്ന് അല്‍ സിയാസ ദിനപ്പത്രം റിപ്പോര്‍ട്ട് ചെയ്യുകയാണ്. രാജ്യത്തെ സ്വദേശികളും പ്രവാസികളും തമ്മിലുള്ള ജനസംഖ്യാ അനുപാതം ക്രമീകരിക്കുന്നതിന്റെ ഭാഗമായി കുവൈത്ത് നടപ്പാക്കുന്ന പുതിയ നിയമങ്ങളുടെ ഭാഗമാണിത് എന്നാണ് ലഭ്യമാകുന്ന വിവരം.

അതേസമയം 2021 ജനുവരി ഒന്നു മുതല്‍ ഇവ പ്രാബല്യത്തില്‍വരും. കണക്കുകള്‍ അനുസരിച്ച് കുവൈത്തില്‍ ഇപ്പോഴുള്ള പ്രവാസികളില്‍ 60 വയസിന് മുകളില്‍ പ്രായമുള്ളവരും സര്‍വകലാശാലാ ബിരുദമോ അതിന് മുകളിലോ യോഗ്യതയുള്ളവരുമായ ആളുകള്‍ 15,502 പേര്‍ മാത്രമാണ് ഉള്ളത്. അതോടൊപ്പം തന്നെ അനധികൃതമായി രാജ്യത്ത് താമസിക്കുന്ന ഒരു ലക്ഷത്തില്‍പരം പ്രവാസികളെ അറസ്റ്റ് ചെയ്ത് നാടുകടത്താനുള്ള തീരുമാനം അധികൃതര്‍ തത്കാലം നീട്ടിവായിക്കുകയുണ്ടായി.