ഡിവൈഎഫ്‌ഐ സംസ്ഥാന സമ്മേളനത്തില്‍ സംഘടനയ്ക്ക് പുതിയ അമരക്കാര്‍. മുന്‍ യുവജന കമ്മീഷന്‍ അധ്യക്ഷയും സി.പി.ഐ.എം സംസ്ഥാന കമ്മിറ്റിയംഗവുമായ ഡോ. ചിന്ത ജെറോമിനെ സംസ്ഥാന പ്രസിഡന്റായും കല്യാശ്ശേരി എം.എല്‍.എ എം. വിജിനെ സംസ്ഥാന സെക്രട്ടറിയായും തൃശൂരില്‍ നടന്ന സംസ്ഥാന സമ്മേളനം തിരഞ്ഞെടുത്തു. ആലപ്പുഴയില്‍ നിന്നുള്ള അഡ്വ. ആര്‍. രാഹുലാണ് പുതിയ ട്രഷറര്‍.

പുതിയ ഭാരവാഹി പട്ടിക പുറത്തുവന്നതോടെ തിരുവനന്തപുരം മേയര്‍ ആര്യ രാജേന്ദ്രനെ വൈസ് പ്രസിഡന്റ് പദവിയിലേക്ക് പരിഗണിക്കുമെന്ന പ്രചാരണങ്ങള്‍ക്ക് വിരാമമായി. ആര്യയെ വൈസ് പ്രസിഡന്റാക്കിയില്ലെങ്കിലും ഭര്‍ത്താവും ബാലുശ്ശേരി എം.എല്‍.എയുമായ കെ.എം. സച്ചിന്‍ ദേവിനെ സംസ്ഥാന ജോയിന്റ് സെക്രട്ടറിയായി തിരഞ്ഞെടുത്തിട്ടുണ്ട്. പ്രധാന ഭാരവാഹിത്വത്തിലേക്ക് ഉയര്‍ന്നുവരുമെന്ന് കരുതപ്പെട്ട ആര്യയെ ഭാരവാഹി പട്ടികയില്‍ ഉള്‍പ്പെടുത്താതെ, സച്ചിന്‍ ദേവിന്റെ സംഘടനാ പരിചയത്തിന് മുന്‍ഗണന നല്‍കുകയായിരുന്നു.

92 അംഗ സംസ്ഥാന കമ്മിറ്റിയെയും 25 അംഗ സംസ്ഥാന സെക്രട്ടറിയേറ്റിനെയുമാണ് സമ്മേളനം തിരഞ്ഞെടുത്തിരിക്കുന്നത്. ആര്‍. ശ്യാമ, വി. അനൂപ്, മുഹമ്മദ് അഫ്‌സല്‍, പി. ഷബീര്‍, നിഖില്‍ ബാബു എന്നിവരാണ് വൈസ് പ്രസിഡന്റുമാര്‍. ഗ്രീഷ്മ അജയ്‌ഘോഷ്, രജീവ് വെള്ളാട്ട്, ശ്യാം പ്രസാദ്, സച്ചിന്‍ ദേവ്, കെ. അനുശ്രീ എന്നിവരെ ജോയിന്റ് സെക്രട്ടറിമാരായും ചുമതലപ്പെടുത്തി.

വിദ്യാര്‍ത്ഥി-യുവജന പ്രസ്ഥാനങ്ങളിലൂടെ ഉയര്‍ന്നുവന്ന് പാര്‍ട്ടിയുടെ മുന്‍നിരയിലേക്ക് എത്തിയ നേതാവാണ് പുതിയ പ്രസിഡന്റ് ഡോ. ചിന്ത ജെറോം. എസ്.എഫ്.ഐ കൊല്ലം ഏരിയ പ്രസിഡന്റായി തുടക്കം കുറിച്ച ചിന്ത, സംഘടനയുടെ സംസ്ഥാന വൈസ് പ്രസിഡന്റായും കേന്ദ്ര കമ്മിറ്റിയംഗമായും പ്രവര്‍ത്തിച്ചിട്ടുണ്ട്. 2007-08 കാലയളവില്‍ കേരള സര്‍വകലാശാല യൂണിയന്‍ ചെയര്‍പേഴ്‌സണും സെനറ്റ്-സിന്‍ഡിക്കേറ്റ് അംഗവുമായിരുന്നു.