എല്ലാവിധ വിസകളുടെയും കാലാവധി മൂന്നു മാസം കൂടി നീട്ടി; പ്രവാസികൾ അറിയാൻ, ഇനിയുള്ള നാളുകൾ കടമ്പകൾ കടക്കണം, നവംബര് 30 വരെ ദീര്ഘിപ്പിച്ചുകൊണ്ടുള്ള സര്ക്കാര് വിജ്ഞാപനം ആഭ്യന്തരമന്ത്രാലയം പുറത്തിറക്കി
കുവൈത്തില് സന്ദര്ശന വിസ ഉള്പ്പെടെ എല്ലാവിധ വിസകളുടെയും കാലാവധി മൂന്നു മാസം കൂടി നീട്ടി നല്കുന്നതിന് കുവൈത്ത് ആഭ്യന്തര മന്ത്രാലയം തീരുമാനിക്കുകയുണ്ടായി. ഇതനുസരിച്ചു വിസ കാലാവധി അവസാനിച്ചവരുടെ താമസ രേഖ നവംബര് 30 വരെ ദീര്ഘിപ്പിച്ചുകൊണ്ടുള്ള സര്ക്കാര് വിജ്ഞാപനം ആഭ്യന്തരമന്ത്രാലയം പുറത്തിറക്കുകയുണ്ടായി.
ഇതുപ്രകാരം ആഭ്യന്തര മന്ത്രാലയത്തിലെ കമ്പ്യൂട്ടര് സംവിധാനത്തില് രാജ്യത്ത് കഴിയുന്ന വിസ കാലാവധി അവസാനിച്ചവരുടെ താമസരേഖ മൂന്ന് മാസത്തേക്ക് പുതുക്കി നല്കുന്നതാണ്. എല്ലാ വിസകളുടെയും കാലാവധി നവംബര് 30 വരെ സ്വമേധയാ ദീര്ഘിപ്പിച്ചുകൊണ്ടുള്ള വിജ്ഞാപനമാണ് ഇന്ന് ഉപപ്രധാനമന്ത്രിയും ആഭ്യന്തരമന്ത്രിയും കാബിനറ്റ് അഫയേഴ്സ് സഹമന്ത്രിയുമായ അനസ് അല് സാലിഹ് പുറപ്പെടുവിച്ചിരിക്കുന്നത്.
സെപ്റ്റംബര് ഒന്നു മുതല് നവംബര് 30 വരെയാണ് കാലാവധി നീട്ടി നല്കിയിരിക്കുന്നത്. ഇതോടുകൂടെ എല്ലാവിധ സന്ദര്ശക വിസകള് ഉള്പ്പെടെ മറ്റു വിസകളിലും രാജ്യത്ത് കഴിയുന്നവര്ക്ക് സര്ക്കാര് ഉത്തരവിന്റെ അനുകൂല്യം ലഭിക്കുന്നതാണ്. അതേസമയം സര്ക്കാര് തീരുമാനം രാജ്യത്തിനകത്ത് കഴിയുന്ന താമസക്കാരുടെ വിസ കാലാവധി മാത്രമേ പുതുക്കി നല്കുകയുള്ളു എന്നാണ് വ്യക്തമാക്കുന്നത്.
അതോടൊപ്പം തന്നെ എല്ലാ സ്പോണ്സര്മാരോടും തൊഴിലുടമകളോടും അവര് സ്പോണ്സര് ചെയ്യുന്നവരുടെ താമസരേഖ പുതുക്കുന്നതിനായി ഇളവ് അനുവദിച്ച സമയം ഉപയോഗപ്പെടുത്തിക്കൊണ്ട് എത്രയും വേഗം നടപടികള് പൂര്ത്തിയാക്കുന്നതിനും അധികൃതര് ആവശ്യപ്പടുകയുണ്ടായി. ഓണ്ലൈന് സംവിധാനത്തിലൂടെയോ ഗവര്ണറേറ്റുകളിലെ റെസിഡന്സി അഫയേഴ്സ് വകുപ്പുകള് വഴിയോ നടപടികള് പൂര്ത്തിയാക്കാന് കഴിയുമെന്നും സര്ക്കാര് പുറപ്പെടുവിച്ച വിഞാപനത്തില് വ്യക്തമാക്കുന്നു.
https://www.facebook.com/Malayalivartha
