ലോകത്തിലെ ഏറ്റവും വലിയ കറുത്ത വജ്രം യുഎഇയില്‍ പ്രദര്‍ശനത്തിന്. ദ് എനിഗ്മ എന്നു പേരു നല്‍കിയിരിക്കുന്ന കാര്‍ബണാഡോ വജ്രം ദുബായില്‍ തിങ്കളാഴ്ചയാണ് പ്രദര്‍ശിപ്പിച്ചത്.

ഇതാദ്യമായാണ് ഈ അപൂര്‍വ വജ്രം പ്രദര്‍ശനത്തിനെത്തിക്കുന്നത്. 2.6 ബില്യന്‍ വര്‍ഷങ്ങള്‍ക്ക് മുന്‍പ് ഉല്‍ക്കാശിലയോ ഛിന്നഗ്രഹമോ ഭൂമിയില്‍ പതിച്ചതിനെ തുടര്‍ന്നുണ്ടായ വജ്രമാണ് ഇതെന്നാണ് ശാസ്ത്ര ലോകം പറയുന്നത്. ഏറ്റവും വലിയ കട്ട് ഡയമണ്ട് വില്‍പ്പനയ്ക്ക് മുന്നോടിയായാണ് പൊതുജനങ്ങള്‍ക്കായി പ്രദര്‍ശിപ്പിച്ചത്.

പ്രകൃതിദത്തമായ കറുത്ത വജ്രങ്ങളില്‍ ഇത്രയും വലുപ്പമുള്ളത് കണ്ടെത്തുന്നത് അപൂര്‍വങ്ങളില്‍ അപൂര്‍വമാണെന്നാണ് വിദഗ്ധരുടെ അഭിപ്രായം. ദുബായിലെ പ്രദര്‍ശനത്തിനു ശേഷം ജനുവരി 24 മുതല്‍ 26 വരെ ലൊസാഞ്ചലസില്‍ 'ദ എനിഗ്മ' പ്രദര്‍ശനത്തിനെത്തും.

അതിനുശേഷം ഫെബ്രുവരിയിലാണ് ലണ്ടനിലെ ലേല സ്ഥാപനത്തിലേക്കെത്തിക്കുന്നത്. പൊതുജനങ്ങള്‍ക്കും ഇതാദ്യമായാണ് വജ്രം നേരിട്ട് കാണാന്‍ സാധിക്കുന്നത്. വജ്രത്തിന്റെ പഴക്കവും പ്രാധാന്യവും അപൂര്‍വ സ്വഭാവവും കണക്കിലെടുത്ത് 50 കോടിക്ക് മുകളില്‍ ലേലത്തുകയായി ലഭിക്കുമെന്നാണ് കണക്കുകൂട്ടല്‍.

ഫെബ്രുവരി മൂന്ന് മുതല്‍ ഒമ്പത് വരെയാവും ലേലം നടക്കുന്നത്. 555.55 കാരറ്റ് തൂക്കമുള്ള വജ്രത്തിന് 55 മുഖങ്ങള്‍ നല്‍കിയാണ് വില്‍പനയ്ക്കായി ഒരുക്കിയിരിക്കുന്നത്. മുറിക്കാന്‍ ഏറ്റവും ബുദ്ധിമുട്ടുള്ള വജ്രം കൂടിയാണിത്. ഈന്തപ്പനയുടെ ആകൃതിയിലുള്ള ശക്തിയുടെയും സംരക്ഷണത്തിന്റെയും പ്രതീകത്തില്‍ നിന്ന് പ്രചോദനം ഉള്‍ക്കൊണ്ടാണ് വജ്രത്തിന്റെ രൂപം തയ്യാറാക്കിയിരിക്കുന്നത്. അറബി സഖ്യകളിലെ അഞ്ചുമായും ഇത് ബന്ധപ്പെട്ടിരിക്കുന്നു.

വലുപ്പത്തിന്റെ കാര്യത്തില്‍ മാത്രമല്ല ലോകത്തിലെ ഏറ്റവും കാഠിന്യമേറിയ വജ്രം എന്ന സ്ഥാനവും എനിഗ്മയ്ക്ക് സ്വന്തമാണ്. 2006 ല്‍ ഗിന്നസ് ലോക റെക്കോര്‍ഡിലും വജ്രം ഇടം നേടി. എന്നാല്‍ ഇത്രയും കാലം ഈ അപൂര്‍വ വജ്രത്തിന്റെ ഉടമ ആരായിരുന്നു എന്നകാര്യം പരസ്യമാക്കിയിട്ടില്ല. വജ്രത്തിന്റെ പ്രത്യേകതകള്‍ കണക്കിലെടുത്ത് കോസ്മിക് അദ്ഭുതം എന്നാണ് ഇതിനെ ലേല സ്ഥാപനം തന്നെ വിശേഷിപ്പിക്കുന്നത്.