യെമനില്‍ ഹെലികോപ്ടര്‍ തകര്‍ന്ന് സൗദി രാജകുമാരന്‍ മരിച്ചു. സൗദിയിലെ അസിര്‍ പ്രവിശ്യയിലെ ഡെപ്യൂട്ടി ഗവര്‍ണറും 2015ല്‍ സൗദി കിരീടാവകാശിയുമായിരുന്ന മുര്‍ഖിന്‍ ബിന്‍ അബ്ദുല്‍ അസിസീന്റെ മകനുമായ മന്‍സൗര്‍ ബിന്‍ മുര്‍ഖിനാണ് മരിച്ചത്. ആഭ്യന്തര യുദ്ധം നാശം വിതച്ച യെമനിലെ തെക്കന്‍ അതിര്‍ത്തിപ്രദേശത്ത് കൂടി സഞ്ചരിക്കുന്‌പോഴായിരുന്നു അപകടം. രാജകുമാരനൊപ്പം ഉണ്ടായിരുന്നവരെ കുറിച്ച് വിവരമൊന്നുമില്ല. അപകടത്തിന്റെ കാരണം സംബന്ധിച്ചും വിവരമൊന്നും തന്നെയില്ല.

കഴിഞ്ഞ ദിവസം യമനിലെ ഹൂതി വിമതര്‍ സൗദിയിലെ വിമാനത്താവളം ലക്ഷ്യമാക്കി പായിച്ച മിസൈല്‍ സൗദി തകര്‍ത്തിരുന്നു. ഇതിന് പിന്നാലെ സൗദി അറേബ്യയില്‍ അഴിമതിക്കെതിരെയുള്ള കര്‍ശന നടപടികളുടെ ഭാഗമായി 11 രാജകുമാരന്മാരും 38 മുന്‍ മന്ത്രിമാരും ഉന്നത ഉദ്യോഗസ്ഥരും ഉള്‍പ്പെടെ 50ലധികം പ്രമുഖരെ അറസ്റ്റ് ചെയ്യുകയും ചെയ്തിരുന്നു. ഈ രണ്ട് സംഭവങ്ങളുടേയും പശ്ചാത്തലത്തിലാണ് ഇപ്പോള്‍ ഹെലികോപ്ടര്‍ അപകടവാര്‍ത്തയും വന്നിരിക്കുന്നത്. അതിനാല്‍ തന്നെ അപകടത്തെ കുറിച്ച് ദുരൂഹത ഏറുന്നുണ്ട്. കോപ്ടര്‍ വിമതര്‍ വെടിവച്ചിട്ടതാണോയെന്നും അന്വേഷിക്കുന്നു.

സൗദിയുടെ നേതൃത്വത്തിലുള്ള സഖ്യസേന 2015 മുതലാണ്, ആഭ്യന്തര യുദ്ധം നടക്കുന്ന യെമനില്‍ ഇടപെട്ടു തുടങ്ങിയത്. ഹൂതി വിമതര്‍ക്ക് ഇറാന്‍ ആയുധങ്ങള്‍ നല്‍കുന്നുവെന്നാണ് സൗദിയുടെ ആരോപണം.