പുതുവർഷം മുതൽ ഒമാനിലെ സര്‍ക്കാര്‍ ആശുപത്രികളില്‍ നേരിട്ട് പണം അടക്കാൻ കഴിയില്ല
2018 ജനുവരി ഒന്നുമുതൽ ഒമാനിലെ സര്‍ക്കാര്‍ ആശുപത്രികളില്‍ നേരിട്ട് പണം അടക്കാൻ കഴിയില്ല. നാളെ മുതൽ സര്‍ക്കാര്‍ ആശുപത്രികളില്‍ ഇ-പേയ്മെന്റ് സംവിധാനം നടപ്പാക്കുമെന്ന് ആരോഗ്യ മന്ത്രാലയം അറിയിച്ചു. 2016 ഒക്ടോബര്‍ മാസം മുതല്‍ ആശുപത്രികളില്‍ ബാങ്ക് കാര്‍ഡുകള്‍ ഉപയോഗിച്ചുള്ള ഇലക്ട്രോണിക് പേയ്മെന്റ് സംവിധാനത്തിന് തുടക്കം കുറിച്ചിരുന്നു. എന്നാല്‍ ഇതോടൊപ്പം നേരിട്ട് പണം അടക്കാനുള്ള സംവിധാനവും ഉണ്ടായിരുന്നു. നാളെ മുതൽ നിർബന്ധമായും ഇ-പേയ്മെന്റ് സംവിധാനം നടപ്പാക്കുകയാണ്.
പൊതുമേഖലാ സ്ഥാപനങ്ങള്‍ ഇലക്ട്രോണിക് പേയ്മെന്റ് സേവനത്തിലേക്ക് മാറുന്ന ദേശീയ പദ്ധതിയുടെ ഭാഗമായാണ്. ഈ നിയമം പ്രാബല്യത്തില്‍ വരുന്നതോടു കൂടി സര്‍ക്കാര്‍ ആശുപത്രികളില്‍ അടക്കേണ്ട എല്ലാ ഫീസുകളും ക്രെഡിറ്റ്/ഡെബിറ്റ് കാര്‍ഡ് മുഖേന അടക്കേണ്ടി വരും. ആശുപത്രിയില്‍ ചികിത്സക്കായി എത്തുന്ന രോഗികള്‍ ബാങ്ക് കാര്‍ഡ് കൂടെ കരുതുവാന്‍ വീഴ്ച വരുത്തരുതെന്ന് ആരോഗ്യ മന്ത്രാലയ അധികൃതര്‍ അറിയിച്ചു.
ആരോഗ്യ മന്ത്രാലയത്തിന് കീഴിലുള്ള എല്ലാ ആരോഗ്യ പരിചരണ കേന്ദ്രങ്ങളും എല്ലാവിധ ഫീസുകളും ബില്ലുകളും ഈ പേയ്മെന്റ് വഴി സ്വീകരിക്കുവാന്‍ ആരോഗ്യ കേന്ദ്രങ്ങള്‍ സജ്ജമാണെന്നും മന്ത്രാലയം വ്യക്തമാക്കിയിട്ടുണ്ട്.
https://www.facebook.com/Malayalivartha
