ദുബായ്: ഇൗ വര്‍ഷം ഇതുവരെ ദുബായില്‍ നടന്നത്​ 25 ആത്മഹത്യകളാണ്. അതേസമയം 50 പേര്‍ ആത്മഹത്യാ ശ്രമവും നടത്തി. വിഷാദരോഗികളാണ്​ മരിച്ചവരില്‍ 60 ശതമാനവും. കുടുംബപ്രശ്​നങ്ങ​ളെത്തുടര്‍ന്ന്​ 35 ശതമാനംപേര്‍ ജീവനൊടുക്കിയത്. ബാക്കിയുള്ളവര്‍ സാമ്പത്തിക പ്രശ്​നങ്ങളെത്തുടര്‍ന്നാണ്​ ജീവിതം അവസാനിപ്പിച്ചത്​.

'ആത്മഹത്യ: കാരണങ്ങളും പ്രതിരോധവും' എന്ന വിഷയത്തില്‍ ദുബൈ പൊലീസ്​ നടത്തിയ സംവാദത്തിലാണ്​ ഇൗ കണക്കുകള്‍ പുറത്തുവിട്ടത്. കഴിഞ്ഞ വര്‍ഷം 90 ആത്മഹത്യകൾ ദുബൈയില്‍ നടന്നിരുന്നു. 101 പേരാണ്​ ആത്മഹത്യാശ്രമം നടത്തിയത്​. 30 വയസില്‍ താഴെയുള്ള ചെറുപ്പക്കാര്‍ക്കിടയിലാണ്​ ആത്മഹത്യാ നിരക്ക്​ കൂടുതല്‍. കുടുതലും ഏഷ്യന്‍ വംശജരാണ്​ മരണം സ്വയം തെരഞ്ഞെടുക്കുന്നത്​.

ആത്മഹത്യക്കെതിരെ യോഗങ്ങളും ബോധവല്‍ക്കരണ പരിപാടികളും പൊലീസ്​ സംഘടിപ്പിക്കാറുണ്ടെന്ന്​ പരിപാടിയില്‍ സംസാരിച്ച ദുബൈ പൊലീസിലെ ക്രിമിനല്‍ ഇന്‍വെസ്​റ്റിഗേഷന്‍ വകുപ്പ്​ അസിസ്​റ്റന്‍റ്​ കമാന്‍റന്‍റ്​ ഇന്‍ ചീഫ്​ മേജര്‍ ജനറല്‍ ഖലീല്‍ ഇബ്രാഹിം അല്‍ മന്‍സൂറി പറഞ്ഞു.

വിദേശ പൗരന്മാര്‍ അനുഭവിക്കുന്ന പ്രശ്​നങ്ങള്‍, തൊഴിലാളികള്‍ നേരിടുന്ന സമ്മര്‍ദ്ദം എന്നിവക്ക്​ പുറമെ വീഡിയോ ഗെയിമുകള്‍ക്കും മറ്റും അടിമപ്പെട്ട്​ കുട്ടികള്‍ ജീവനൊടുക്കുന്നത് വരെ ചര്‍ച്ചയായി.​ കുടുംബങ്ങള്‍ തകരുന്നത്​ ഒഴിവാക്കാന്‍ എടുക്കേണ്ട നടപടികളും ചര്‍ച്ചചെയ്​തു.