ലോകം നമിച്ച ധീരതയ്ക്ക് ഒരു ബിഗ് സല്യൂട്ട്. എങ്കിലും ആ മരണം ആ കുടുംബത്തിന് ഉണ്ടാക്കിയത് തീരാ നഷ്ടം. തായ് ഗുഹയില്‍ സ്വന്തം ജീവന്‍ പോലും പണയം വെച്ച് രക്ഷാപ്രവര്‍ത്തനത്തിന് ഇറങ്ങിയ ദൗത്യ സംഘത്തിനാണ് ലോകത്തിന്റെ മുഴുവന്‍ കൈയടിയും. എന്നാല്‍ രക്ഷാ പ്രവര്‍ത്തനം പൂര്‍ത്തിയാക്കി തിരിച്ചു കയറാന്‍ സമന്‍ കുനന്‍ ഉണ്ടായിരുന്നില്ല. തായ് ലന്‍ഡില്‍ ഗുഹയില്‍ അകപ്പെട്ടവരെ രക്ഷിക്കാനുള്ള ശ്രമങ്ങള്‍ക്കിടെ സമന്‍ കുനന്‍ എന്ന 38 കാരന്‍ ശ്വാസംമുട്ടി മരിക്കുകായിരുന്നു. രക്ഷാ പ്രവര്‍ത്തനത്തില്‍ ഗുഹയില്‍ അകപ്പെട്ട എല്ലാവരെയും സുരക്ഷിതമായി പുറത്തെത്തിക്കാന്‍ കഴിഞ്ഞെങ്കിലും സമന്റെ വേര്‍പാട് ഒരു നൊമ്പരമായി.
ഒപ്പം രക്ഷപ്പെട്ട കുട്ടികളോടും അവര്‍ക്കൊന്ന് പറയാനുണ്ട്. സമന്റെ മരണത്തിന് കാരണമായി എന്ന് ഒരിക്കലും നിങ്ങള്‍ ചിന്തിക്കരുത് എന്ന്. അവരെ ആശ്വസിപ്പിച്ച നിരവധി പേരാണ് രംഗത്ത് വന്നിരിക്കുന്നത്. നിങ്ങളുടെ ഈ ദുഃഖനിമിഷത്തില്‍ ലോകം മുഴുവന്‍ നിങ്ങളോടൊപ്പം ഉണ്ട്, ഒരാള്‍ കുറിച്ചു. നിങ്ങളുടെ ഭര്‍ത്താവ് ഏറെ ധീരനാണ്. അദ്ദേഹത്തിന്റെ സേവനത്തെ ലോകം എന്നും സ്മരിക്കും മറ്റൊരാള്‍ കുറിച്ചു. ഇത്തരത്തില്‍ നിരവധി പേരാണ് ആശ്വാസവാക്കുമായി രംഗത്തു വന്നത്.
ഗുഹാമുഖത്തു നിന്നും ഒന്നര കിലോമീറ്റര്‍ അകലെ ഓക്‌സിജന്‍ ടാങ്കുകള്‍ സ്ഥാപിച്ച് മടങ്ങുന്നതിനിടെയാണ് ശ്വാസം മുട്ടി സമന്‍ മരണപ്പെടുന്നത്. ബാങ്കോക്ക് എയര്‍പോട്ടില്‍ സേവനമനുഷ്ടിച്ച കൊണ്ടിരുന്ന സമന്‍ 2006 ലാണ് തായ് നേവി സീലില്‍ ചേരുന്നത്. ജൂലൈ ഒന്നു മുതല്‍ തായ് ദൗത്യ സംഘത്തോടൊപ്പം സമനും ഉണ്ടായിരുന്നു. എന്നാല്‍ ദൗത്യം പൂര്‍ത്തിയാക്കി മടങ്ങുമ്പോള്‍ അദ്ദേഹം ഉണ്ടായില്ല.
സമന്‍ കുനന്റെ വേര്‍പാടില്‍ മനമുരുകി ഭാര്യ വെലീപോന്‍ കുനാന്‍ കുറിച്ചിട്ട വരികള്‍ ലോക ജനതയുടെ കണ്ണുനനയിക്കുകയാണ്. 'എന്റെ ഹൃദയം പോലെ എനിക്ക് പ്രിയപ്പെട്ടവനേ… ഇനിയാരെയാണ് ഉണരുമ്പോള്‍ ഞാനുമ്മ വയ്ക്കുക…ഐ മിസ് യൂ…' വെലീപോന്‍ തന്റെ ഇന്‍സ്റ്റഗ്രാമില്‍ കുറിച്ചു. ഒപ്പം പ്രിയതമനുമൊത്തുള്ള ചിത്രങ്ങളും അവര്‍ പങ്കുവെച്ചു.