തമിഴ്‌നാട്ടിലെ കുറുവാ സംഘം മണ്ണഞ്ചേരി പോലീസ് സ്‌റ്റേഷന്‍ അതിര്‍ത്തിയില്‍ നടത്തിയ മോഷണക്കേസില്‍ ഒന്നാം പ്രതിക്ക് ശിക്ഷ, രണ്ടാം പ്രതിയെ വെറുതെവിട്ടു. കുറുവാ സംഘത്തിന്റെ തലവന്‍ സന്തോഷ് സെല്‍വം (26) എന്നയാളെയാണ് ആലപ്പുഴ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് ശീതള്‍ ശശിധരന്‍ ശിക്ഷിച്ചത്. രണ്ടുവര്‍ഷം തടവും 25000 രൂപ പിഴയുമാണ് ശിക്ഷ. സന്തോഷ് സെല്‍വം കഴിഞ്ഞ 22 മാസമായി ജയിലിലാണ്. ഇയാള്‍ ശിക്ഷാവിധിയില്‍ ഈ കാലയളവ് കുറച്ചുള്ള ശിക്ഷ അനുഭവിച്ചാല്‍ മതിയാവും.

രണ്ടാം പ്രതി കട്ടുപൂച്ചന്‍ (56) എന്നയാളെ കോടതി വെറുതെവിട്ടു. ദൃക്‌സാക്ഷികള്‍ ഇല്ലാത്ത കേസില്‍ സിസിടിവി ദൃശ്യങ്ങളും മറ്റു ശാസ്ത്രീയ തെളിവുകളും ഹാജരാക്കിയാണ് മണ്ണഞ്ചേരി പോലീസ് കുറ്റപത്രം സമര്‍പ്പിച്ചത്. 17 സാക്ഷികളെ വിസ്തരിച്ചു. തേനിയില്‍ നിന്നാണ് കട്ടുപൂച്ചനെ പിടികൂടിയത്.