ഇസ്രയേലിനെ പൂര്‍ണമായും ജൂത രാഷ്ട്രമായി അംഗീകരിക്കുന്ന ബില്ലിന് ഇസ്രേലി പാര്‍ലമെന്റിന്റെ അംഗീകാരം. 55ന് എതിരെ 62 വോട്ടുകള്‍ക്കാണ് ബില്ല് പാസായത്. ഇസ്രയേല്‍ ജൂതന്മാരുടെ പിതൃഭൂമിയാണെന്നും ജൂത വിഭാഗത്തിന് സ്വയം നിര്‍ണ്ണയാവകാശമുണ്ടെന്നു വലതുപക്ഷ സര്‍ക്കാരിന്റെ പിന്തുണയോടെ പാസാക്കിയ നിയമം വ്യക്തമാക്കുന്നു. ജൂതരാഷ്ട്ര ബില്‍ നിയമമായതോടെ അറബി ഭാഷയുടെ ഔദ്യോഗിക ഭാഷയെന്ന പദവി ഇല്ലാതാക്കപ്പെട്ടു.
അറബി ഭാഷയ്ക്ക് പ്രത്യേക പദവി മാത്രമാണ് നല്‍കുന്നത്. ഹിബ്രു മാത്രമായിരിക്കും രാജ്യത്തിന്റെ ഔദ്യോഗിക ഭാഷ. ജറുസലേം തലസ്ഥാനമായിരിക്കും. പുതിയ നിയമനിര്‍മാണത്തിലൂടെ ജനാധിപത്യാവകാശങ്ങള്‍ക്കും പൗരാവകാശങ്ങള്‍ക്കും ജൂതന്മാര്‍ക്ക് മുന്‍ഗണന ലഭിക്കുമെന്നും ഉറപ്പ് നല്‍കുന്നു. ഇസ്രയേലിലെ ജനസംഖ്യയുടെ 20 ശതമാനത്തോളം വരുന്ന അറബ് സമൂഹത്തിന് തിരിച്ചടിയാകുന്നതാണ് തീരുമാനം. ക്‌നെസെറ്റില്‍ എട്ടു മണിക്കൂര്‍ നീണ്ട സമ്മേളനത്തിനൊടുവിലാണ് ബില്ല് പാസാക്കിയത്.
ഇസ്രേലി അറബ് എംപി അടക്കം നിരവധി പ്രതിനിധികള്‍ ബില്ലിനെ എതിര്‍ത്തു. സമൂഹത്തില്‍ വിഭജനം ഉണ്ടാക്കുന്നതാണ് ബില്ലെന്ന് ആരോപിച്ച് തലസ്ഥാനമായ ടെല്‍ അവീവിലടക്കം ആയിരങ്ങള്‍ തെരുവിലിറങ്ങി പ്രതിഷേധിച്ചിരുന്നു.