രമണ് മഗ്സാസെ അവാര്ഡ് ജേതാക്കളില് രണ്ട് ഇന്ത്യക്കാരും
ഏഷ്യന് നൊബേല് എന്നറിയപ്പെടുന്ന രമണ് മഗ്സാസെ അവാര്ഡ് ജേതാക്കളില് രണ്ട് ഇന്ത്യക്കാരും. മനോരോഗികള്ക്കിടയില് തുല്യതകളില്ലാത്ത പ്രവര്ത്തനം നടത്തിയ ഡോ. ഭരത് വത്വാനി, ലഡാക്കിലെ സാധാരണക്കാര്ക്കിടയില് പ്രവര്ത്തിക്കുന്ന സോനം വാങ്ചുക് എന്നിവര്ക്കാണ് ഇത്തവണ മറ്റു നാലുപേര്ക്കൊപ്പം അവാര്ഡ് ലഭിച്ചത്.
കംബോഡിയന് വംശഹത്യയെ അതിജീവിച്ച് ഖമര്റൂഷ് ക്രൂരതകള് രേഖപ്പെടുത്താന് പ്രവര്ത്തിച്ച യോക് ഛാങ്, കമ്യൂണിസ്റ്റ് തീവ്രവാദികളുമായുള്ള സമാധാനചര്ച്ചക്ക് മുന്കൈയെടുത്ത ഫിലിപ്പീന്സ് സ്വദേശി ഹൊവാര്ഡ് ഡീ, ഭിന്നശേഷിക്കാര്ക്കെതിരായ വിവേചനങ്ങള്ക്കെതിരെ പോരാടിയ പോളിയോ ബാധിതനായ വിയറ്റ്നാമീസ് പൗരന് വോ തി ഹൊവാങ് യെന് റോം, ആഭ്യന്തര പ്രശ്നങ്ങള്ക്കിടയില് ദുരിതമനുഭവിക്കുന്ന പാവങ്ങള്ക്കായി സംരക്ഷണ കേന്ദ്രങ്ങള് നിര്മിച്ച കിഴക്കന് തിമൂറുകാരന് മരിയ ഡി ലൂര്ദ് മാര്ട്ടിന്സ് ക്രൂസ് എന്നിവരാണ് മറ്റ് അവാര്ഡ് ജേതാക്കള്.ഇവര് ഏഷ്യന് പ്രതീക്ഷയുടെ താരങ്ങളാണെന്ന് മഗ്സാസെ അവാര്ഡ് ഫൗണ്ടേഷന് പ്രസിഡന്റ് കാര്മെന്സിത അബെല്ല പറഞ്ഞു. ഫിലിപ്പീന്സിന്റെ മൂന്നാമത് പ്രസിഡന്റിന്റെ പേരില് 1957ല് സ്ഥാപിതമായ മഗ്സാസെ അവാര്ഡ് ഏഷ്യയിലെ ഏറ്റവും വലിയ അംഗീകാരമായാണ് പരിഗണിക്കപ്പെടുന്നത്.
ആഗസ്റ്റ് 31ന് ഫിലിപ്പീന്സില് നടക്കുന്ന ചടങ്ങില് അവാര്ഡ് സമ്മാനിക്കും. മനോനില തെറ്റി തെരുവില് അലയുന്ന ആയിരങ്ങളെ ചികിത്സിക്കാനും അവരെ വീണ്ടും കുടുംബവുമായി കൂട്ടിയിണക്കാനും നേതൃത്വം നല്കിയ വ്യക്തിയാണ് ഡോ. ഭരത് വത്വാനി. വത്വാനിയും ഭാര്യയും ചേര്ന്നാണ് ആദ്യ പ്രവര്ത്തനങ്ങള് തുടങ്ങിയത്.സോനം വാങ്ചുക് '88ല് എന്ജിനീയറിങ് ബിരുദം നേടിയ ശേഷം 'സ്റ്റുഡന്റ്സ് എജുക്കേഷന് ആന്ഡ് കള്ചറല് മൂവ്മന്റെ് ഓഫ് ലഡാക്ക്' എന്ന സംഘടന തുടങ്ങി. പരീക്ഷകളില് പരാജയപ്പെടുന്ന ലഡാക്കിലെ വിദ്യാര്ഥികള്ക്ക് പരിശീലനം നല്കിയാണ് ആദ്യ ചുവടുവെച്ചത്.
https://www.facebook.com/Malayalivartha
