രൂപയുടെ മൂല്യമിടിയുന്നത് രാജ്യത്തെ ടൂറിസം രംഗത്തിന് നല്ലതാണെന്ന് കേന്ദ്രമന്ത്രി അല്‍ഫോണ്‍സ് കണ്ണന്താനം. ദില്ലിയില്‍ തുടങ്ങിയ ടൂറിസം മാര്‍ട്ടില്‍ കേരളത്തിന്റെ വിനോദ സഞ്ചാര സാധ്യതകള്‍ ചര്‍ച്ചയാകും. രൂപയുടെ മൂല്യമിടിഞ്ഞത് രാജ്യത്തിന്റെ വിനോദ സഞ്ചാര സാധ്യതകളെ ബാധിക്കില്ലെന്നാണ് മന്ത്രിയുടെ പക്ഷം. ചൈനയില്‍ നിന്ന് കൂടുതല്‍ ടൂറിസ്റ്റുകളെ ആകര്‍ഷിക്കാനാണ് ശ്രമമെന്നും കണ്ണന്താനം പറഞ്ഞു.

രാജ്യത്ത് ആദ്യമായി സംഘടിപ്പിക്കുന്ന ടൂറിസം മാര്‍ട്ടില്‍ കേരളത്തിലെ ടൂറിസം രംഗം പ്രധാന ചര്‍ച്ചാ വിഷയമാകും. അറുപത് രാജ്യങ്ങളിലെ പ്രതിനിധികള്‍ മൂന്നു ദിവസം നീളുന്ന മാര്‍ട്ടില്‍ പങ്കെടുക്കുന്നു. ഇന്ത്യയിലെ കൂടുതുല്‍ വിനോദ സഞ്ചാര കേന്ദ്രങ്ങളെ ലോകത്തിന് പരിചയപ്പെടുത്തുകയാണ് ടൂറിസം മാര്‍ട്ടിന്റെ ലക്ഷ്യം. എന്നാല്‍ പ്രളയം കാരണം കേരളത്തിന്റെ പവലിയന്‍ ഇത്തവണയില്ല.