ഓസ്‌ട്രേലിയയിലെ വിവിധ സംസ്ഥാനങ്ങളില്‍ സ്‌ട്രോബെറിക്കുള്ളില്‍ തയ്യല്‍ സൂചി കണ്ടെത്തിയതിനേത്തുടര്‍ന്ന് സര്‍ക്കാര്‍ അന്വേഷണത്തിന് ഉത്തരവിട്ടു. ഓസ്‌ട്രേലിയയിലെ ആറ് സംസ്ഥാനങ്ങളില്‍ നിന്നായി സൂചി ഒളിപ്പിച്ച നിലയിലുള്ള സ്‌ട്രോബെറികള്‍ പിടിച്ചെടുത്തതായി ബിബിസി റിപ്പോര്‍ട്ട് ചെയ്തു.

സൂചി ഒളിപ്പിച്ചിരുന്ന സ്‌ട്രോബെറി കഴിച്ചതിനെ തുടര്‍ന്ന് തൊണ്ടയില്‍ മുറിവേറ്റ ഒരാളെ ആശുപത്രിയില്‍ പ്രവേശിപ്പിച്ചിട്ടുണ്ട്. ഇയാള്‍ വാങ്ങിയ മറ്റ് സ്‌ട്രോബെറികളിലും സൂചി കണ്ടെത്തിയിരുന്നു. സംഭവത്തേക്കുറിച്ച് അന്വേഷിക്കാന്‍ ഓസ്‌ട്രേലിയ- ന്യൂസിലാന്‍ഡ് ഭക്ഷ്യ സുരക്ഷാ ഉദ്യോഗസ്ഥരോട് ആരോഗ്യ വകുപ്പ് മന്ത്രി ഗ്രെഗ് ഹണ്ട് ഉത്തരവിട്ടിട്ടുണ്ട്.

ക്വീന്‍സ്ലാന്റ്, ന്യൂ സൗത്ത് വെയില്‍സ്, വിക്ടോറിയ സംസ്ഥാനങ്ങളില്‍ നിന്നും വാങ്ങിയ സ്‌ട്രോബെറികള്‍ കഴിക്കരുതെന്ന് പോലീസും ആരോഗ്യ വകുപ്പും നിര്‍ദേശം നല്‍കിയിട്ടുണ്ട്. കഴിക്കുന്നതിന് മുമ്പ് സ്‌ട്രോബെറി മുറിച്ചുനോക്കണമെന്നും നിര്‍ദേശമുണ്ട്.

സംഭവത്തെ തുടര്‍ന്ന് ബെറി ഒബ്‌സെഷന്‍ (Berry Obsession), ബെറി ലീഷ്യസ് (Berry Licious.), ലവ് ബെറി (Love Berry), ഡോണിബ്രൂക്ക് ബെറീസ് (Donnybrook Berrise)തുടങ്ങിയ സ്‌ട്രോബെറി ബ്രാന്റുകള്‍ വിതരണം നിര്‍ത്തിവെച്ചിട്ടുണ്ട്.

സംഭവം ആദ്യം റിപ്പോര്‍ട്ട് ചെയ്തത് കഴിഞ്ഞയാഴ്ച ക്വീന്‍സ്ലാന്റിലാണ്. പിന്നീട് ന്യൂ സൗത്ത് വെയില്‍സ്, വിക്ടോറിയ, ക്യാന്‍ബെറ, ടാസ്മാനിയ എന്നിവിടങ്ങളില്‍ നിന്ന് സമാന സംഭവങ്ങള്‍ റിപ്പോര്‍്ട്ട് ചെയ്യുകയായിരുന്നു.