വിമാന യാത്രക്കാരിയെ വസ്ത്രധാരണത്തിന്റെ പേരില്‍ അമേരിക്കന്‍ എയര്‍ലൈന്‍സ് അധിക്ഷേപിച്ചതായി പരാതി
ജമൈക്കയില്‍ നിന്നു മിയാമിയിലേക്ക് പറന്ന വിമാനത്തില്‍ യാത്ര ചെയ്ത ജമൈക്കന്‍ വംശജയെ വസ്ത്രധാരണത്തിന്റെ പേരില്‍ അമേരിക്കന്‍ എയര്‍ലൈന്‍സ് അധിക്ഷേപിച്ചതായി പരാതി.
കഴിഞ്ഞ ആഴ്ച മകനോടൊപ്പം യാത്ര ചെയ്ത ടിഷ റോവെയ്ക്കാണ് ദുരനുഭവം. അമേരിക്കയിലെ ഹൂസ്റ്റണില്‍ ഡോക്ടറായി ജോലിനോക്കുന്ന ടിഷയും എട്ടു വയസ്സുള്ള മകനും ജമൈക്കയില്‍ അവധിയാഘോഷിച്ച ശേഷം ഹുസ്റ്റണിലേക്ക് മടങ്ങവെ കിങ്സ്റ്റണ്‍ വിമാനത്താവളത്തില്‍ വച്ചായിരുന്നു സംഭവം. വിമാനത്തില്‍ കയറാന്‍ ഒരുങ്ങിയപ്പോള്‍ എയര്‍ഹോസ്റ്റ്‌സ് എത്തി ടിഷയുടെ വസ്ത്രധാരണത്തെ കുറിച്ചു പരാതി പറയുകയായിരുന്നു.
കറുത്ത നിറമുള്ള പ്രിന്റഡ് റോംപറാണ് ടിഷ ധരിച്ചിരുന്നത്. ജാക്കറ്റ് ധരിക്കാതെ വിമാനത്തില്‍ യാത്ര ചെയ്യാന്‍ സാധിക്കില്ലെന്നായിരുന്നു എയര്‍ഹോസ്റ്റസിന്റെ നിലപാട്. തന്റെ പക്കല്‍ ജാക്കറ്റില്ലെന്ന് ടിഷ അറിയിച്ചതിനെത്തുടര്‍ന്ന് എയര്‍ഹോസ്റ്റ്‌സ് ഒരു ബ്ലാങ്കറ്റ് നല്‍കി. അതു പുതച്ചതോടെയാണ് യാത്രചെയ്യാന്‍ സമ്മതിച്ചെന്ന് ടിഷ സമൂഹമാധ്യമത്തില്‍ എഴുതിയ കുറിപ്പില്‍ പറഞ്ഞു. യാത്ര ചെയ്യുമ്പോള്‍ ധരിച്ച വസ്ത്രമിട്ടു കൊണ്ടുള്ള ചിത്രം സഹിതമാണ് ടിഷയുടെ കുറിപ്പ്.
വിമാനാധികൃതരുടെ പ്രതികരണത്തില്‍ തന്റെ മകന്‍ വളരെയധികം വിഷമിച്ചെന്നും അവനെ കാര്യങ്ങള്‍ പറഞ്ഞു ബോധ്യപ്പെടുത്താന്‍ പ്രയാസപ്പെട്ടെന്നും ടിഷ പറഞ്ഞു. വിമാനയാത്രയില്‍ താന്‍ ധരിച്ച വസ്ത്രത്തേക്കാള്‍ ഇറക്കംകുറഞ്ഞ വസ്ത്രം ധരിച്ച മറ്റൊരു യുവതി വിമാനത്തിലുണ്ടായിരുന്നു. എന്നാല്‍ അവരെക്കുറിച്ച് അധികൃതര്‍ യാതൊരു അതൃപ്തിയും പ്രകടിപ്പിച്ചില്ല. വിമാനം ലാന്‍ഡ് ചെയ്ത ശേഷം അവരോട് അനുഭവം പങ്കുവച്ചപ്പോള്‍ പരാതി നല്‍കാന്‍ സഹായിക്കാമെന്ന് അവര്‍ ഉറപ്പുനല്‍കിയെന്നും ടിഷ പറഞ്ഞു.
സംഭവത്തില്‍ ഖേദം പ്രകടിപ്പിക്കുന്നതായി അമേരിക്കന്‍ എയര്‍ലൈന്‍സ് വക്താവ് ഷാനന്‍ ഗില്‍സണ്‍ പറഞ്ഞു. ടിഷയുടെ ടിക്കറ്റ് ചാര്‍ജ് പൂര്‍ണമായും മടക്കിനല്‍കിയതായി വക്താവ് അറിയിച്ചു. എന്നാല്‍ അമേരിക്കന്‍ എയര്‍ലൈന്‍സ് വസ്ത്രധാരണത്തില്‍ വ്യക്തമായ നിയമങ്ങള്‍ പാലിക്കുന്നുണ്ടെന്നും പ്രലോഭനമായ രീതിയിലുള്ള വസ്ത്രം അനുവദിക്കില്ലെന്നും അവര്‍ അറിയിച്ചു. അതേസമയം വിമാനാധികൃതരുടെ പക്കല്‍ നിന്നു പണമൊന്നും ലഭിച്ചിട്ടില്ലെന്നു ടിഷ പറഞ്ഞു.
https://www.facebook.com/Malayalivartha
