പഞ്ചാബ് നാഷനല്‍ ബാങ്കുമായി ബന്ധപ്പെട്ട 13,500 കോടി രൂപയുടെ വായ്പ തട്ടിപ്പു കേസിലെ മുഖ്യപ്രതി മെഹുല്‍ ചോക്‌സി രാജ്യം വിട്ടത് നിയമാനുസൃതമെന്ന ഇന്ത്യയുടെ മുന്‍ നിലപാട് ദൗര്‍ഭാഗ്യകരമെന്ന് ആന്റിഗ്വ പ്രധാനമന്ത്രി ഗാസ്റ്റണ്‍ ബ്രൗണ്‍. ചോക്‌സി രാജ്യം വിട്ടത് നിയമാനുസൃതമെന്ന് മുന്‍പു നിലപാട് സ്വീകരിച്ച ഇന്ത്യന്‍ അധികൃതര്‍, പിന്നീട് അദ്ദേഹം വഞ്ചകനാണെന്ന് അറിയിക്കുകയായിരുന്നുവെന്ന് ഗാസ്റ്റണ്‍ ബ്രൗണ്‍ അറിയിച്ചു.

'മെഹുല്‍ ചോക്‌സി വഞ്ചകനാണെന്ന വിവരം ലഭിച്ചിട്ടുണ്ട്. അദ്ദേഹത്തെക്കൊണ്ട് ഞങ്ങളുടെ രാജ്യത്തിന് യാതൊരു ഗുണവുമില്ല. ചോക്‌സിയുടെ അപേക്ഷകള്‍ തള്ളിക്കളഞ്ഞ ശേഷം ഇന്ത്യയിലേക്ക് തിരിച്ചയയ്ക്കും. അദ്ദേഹത്തിനു മേലുള്ള കേസുകളില്‍ നടപടി സ്വീകരിക്കാന്‍ ഇന്ത്യയ്ക്ക് സ്വാതന്ത്ര്യമുണ്ട്. ഞങ്ങളുടെ സര്‍ക്കാര്‍ അക്കാര്യത്തില്‍ ഇടപെടില്ല. നടപടികള്‍ പൂര്‍ത്തിയാകാന്‍ കുറിച്ചു സമയം വേണ്ടിവരും.'- ഗാസ്റ്റണ്‍ ബ്രൗണ്‍ പറഞ്ഞു. മെഹുല്‍ ചോക്‌സിയെ ഇന്ത്യയിലേക്കു തിരിച്ചയക്കുമെന്ന് ആന്റിഗ്വ പ്രധാനമന്ത്രി പറഞ്ഞു.

2018 ജനുവരിയിലാണ് 13,500 കോടി രൂപയുടെ തട്ടിപ്പു നടത്തിയ ചോക്‌സിയും നീരവ് മോദിയും കുടുംബസമേതം രാജ്യം വിട്ടത്. ഇതിനു രണ്ടാഴ്ചയ്ക്ക് ശേഷമാണ് പിഎന്‍ബിയുടെ തട്ടിപ്പിനെക്കുറിച്ചു പുറംലോകം അറിയുന്നത്. തുടര്‍ന്ന് ഇരുവരുടെയും പാസ്‌പോര്‍ട്ട് കേന്ദ്രസര്‍ക്കാര്‍ റദ്ദാക്കി. ഇരുവര്‍ക്കുമെതിരെ ജാമ്യമില്ലാ വാറന്റാണു പുറപ്പെടുവിച്ചത്. ഇന്റര്‍പോള്‍ റെഡ്‌കോര്‍ണര്‍ നോട്ടിസും ഇറക്കി. കരീബിയന്‍ രാജ്യമായ ആന്റിഗ്വയിലെത്തിയ ചോക്‌സി അവിടുത്തെ പാസ്‌പോര്‍ട്ട് സംഘടിപ്പിച്ചു. തുടര്‍ന്ന് ആന്റിഗ്വയുടെ പൗരത്വവും ചോക്‌സിക്കു ലഭിച്ചു.

തന്നെ ഇന്ത്യയിലെത്തിച്ചാല്‍ ജനക്കൂട്ടം മര്‍ദ്ദിച്ചുകൊല്ലുമെന്നു വ്യക്തമാക്കി ചോക്‌സി ജാമ്യമില്ലാ വാറന്റ് റദ്ദാക്കണമെന്ന് ആവശ്യപ്പെട്ടിരുന്നു. മുന്‍ജീവനക്കാരും കടം വാങ്ങിയവരും തന്നെ ആക്രമിക്കുമെന്നും ജയിലില്‍ പോലും സുരക്ഷയുണ്ടാവില്ലെന്നുമാണ് ചോക്‌സി അറിയിച്ചത്. നീരവ് മോദിക്കും മെഹുല്‍ ചോക്‌സിക്കുമായി ഇന്ത്യയിലും യുകെയിലും യുഎഇയിലുമായി 3,500 കോടി രൂപയുടെ സ്വത്തുക്കളുണ്ടെന്ന് എന്‍ഫോഴ്‌സ്‌മെന്റ് ഡയറക്ടറേറ്റ് മുംബൈയിലെ കോടതിയെ അറിയിച്ചിരുന്നു.