ഇനി മുതല് എല്ലാ ഔദ്യോഗിക രേഖകളിലും സംസ്ഥാനത്തിന്റെ പേര് കേരളം ; ബില്ലിന് അംഗീകാരം നല്കി രാഷ്ട്രപതി ദ്രൗപദി മുര്മു
സംസ്ഥാനത്തിന്റെ പേര് ഔദ്യോഗികമായി കേരളം എന്നാക്കി മാറ്റുന്ന ബില്ലിന് രാഷ്ട്രപതി ദ്രൗപദി മുര്മു അംഗീകാരം നല്കി. പാര്ലമെന്റിന്റെ ഇരുസഭകളും നേരത്തെ ബില് പാസാക്കിയിരുന്നു. രാഷ്ട്രപതിയുടെ അനുമതി ലഭിച്ചതോടെ ഇനി മുതല് എല്ലാ ഔദ്യോഗിക രേഖകളിലും സംസ്ഥാനത്തിന്റെ പേര് കേരളം എന്നാകും രേഖപ്പെടുത്തുക. ഘട്ടംഘട്ടമായി ആയിരിക്കും പേരുമാറ്റം നടപ്പാക്കുക.
പേരു മാറുമ്പോള് 'ഗവണ്മെന്റ് ഒഫ് കേരളം' എന്ന് ഇഗ്ലീഷിലും മലയാളത്തില് 'കേരളം സര്ക്കാര്' എന്നും മാറ്റണം. കേരള നിയമസഭ കേരളം നിയമസഭ എന്നാവും. സെക്രട്ടേറിയറ്റ് മുതല് വില്ലേജ് ഓഫിസുകള് വരെയുള്ള സര്ക്കാര് ഓഫീസുകളുടെ ബോര്ഡുകള്, മുദ്രകള്, ലെറ്റര്പാഡുകള്, വെബ്സൈറ്റുകള്, ആപ്പുകള്, ലോഗോകള് എന്നിവയെല്ലാം മാറ്റേണ്ടിവരും.
സര്ട്ടിഫിക്കറ്റുകള്, ഗസറ്റുകള്, റേഷന് കാര്ഡ് ഉള്പ്പെടെയുള്ള രേഖകള് എന്നിവയെല്ലാം പുതിയ പേരില് അച്ചടിക്കേണ്ടി വരും. പൊതുമേഖല സ്ഥാപനങ്ങളുടെയും ബോര്ഡ് കോര്പ്പറേഷനുകളുടെയും പേര് മാറും. പി.എസ്.സിയുടെ പേരിനൊപ്പം കേരളം ചേര്ക്കും. കമ്മിഷനുകളുടെയും ക്ഷേമനിധികളുടെയുമെല്ലാം പേരും മാറും.
https://www.facebook.com/Malayalivartha
