ജീവനക്കാര്‍ക്ക് വാര്‍ഷികാഘോഷത്തിന്റെ ഭാഗമായി അപ്രതീക്ഷിത ബോണസ് നല്‍കി ഞെട്ടിച്ച് അമേരിക്കയിലെ മേരിലാന്‍ഡിലെ റിയല്‍ എസ്റ്റേറ്റ് കമ്പനിയായ സെന്റ് ജോണ്‍ പ്രോപ്പര്‍ട്ടീസ്. 198 ജീവനക്കാര്‍ക്കായി ഏകദേശം 70.78 കോടി രൂപയാണ് കമ്പനി നൽകിയത്. 50,000 ഡോളര്‍ വീതം ഒരോരുത്തര്‍ക്കും ബോണസ് ലഭിച്ചതായാണ് വിവരം. കഴിഞ്ഞ ദിവസം ജോലിയില്‍ പ്രവേശിച്ച ജീവനക്കാരന് കിട്ടിയത് നൂറ് ഡോളർ. ഏറ്റവും കൂടുതല്‍ കിട്ടിയ ബോണസ് തുക 2,70,000 ഡോളറും.

20 മില്യണ്‍ ചതുരശ്ര അടിയെന്ന നേട്ടം കൈവരിച്ചതോടെയാണ് ഇത്രയുമധികം തുക ബോണസായി നല്‍കാന്‍ തീരുമാനിച്ചതെന്ന് സെന്റ് ജോണ്‍സ് പ്രോപ്പര്‍ട്ടീസ് പ്രസിഡന്റ് ലോറന്‍സ് മേയ്ക്രാന്റ്സ് പ്രതികരിച്ചു.  വലിയ നേട്ടം കൈവരിച്ചപ്പോള്‍ ജീവനക്കാര്‍ എന്തെങ്കിലും വലിയ സമ്മാനം നല്‍കണമെന്ന് തീരുമാനിച്ചിരുന്നു. ഞങ്ങളുടെ ജീവനക്കാരില്‍ ഞങ്ങള്‍ക്ക് അഭിമാനമുണ്ട്. ഈ കമ്പനിയുടെ അടിത്തറയും വിജയത്തിന് പിന്നിലെ രഹസ്യവും അവരാണെന്ന് അദ്ദേഹം കൂട്ടിച്ചേർത്തു. ഓരോ ജീവനക്കാര്‍ക്കും നല്‍കിയ ചുവന്ന കവറിലായിരുന്നു അവരുടെ ബോണസ് തുകയുടെ വിവരങ്ങളും ഉള്‍ക്കൊള്ളിച്ചിരുന്നത്.