അടുത്തിടെ കൊച്ചിയില്‍ മെട്രോ തൂണുകള്‍ക്കിടയില്‍ കുടുങ്ങിപ്പോയ പൂച്ചകുഞ്ഞിനെ രക്ഷിക്കാന്‍ ഒരു നാടുമുഴുവന്‍ പരിശ്രമിച്ചത് വാര്‍ത്തയായിരുന്നു. മെട്രോയില്‍ കുടുങ്ങിയ പൂച്ചയ്ക്ക് 'മെട്രോ മിക്കി'യെന്ന് പേരു നല്‍കി നാം അവളെ സ്നേഹിച്ചുകൊണ്ടിരിക്കുന്നു.

കാനഡയില്‍ മഞ്ഞിനുള്ളില്‍ ഉറഞ്ഞുപോയ മൂന്നു പൂച്ചകുഞ്ഞുങ്ങളെ രക്ഷിക്കുവാന്‍ ഒരു വഴിയാത്രക്കാരന്‍ നടത്തിയ ശ്രമങ്ങള്‍ എല്ലാവരുടേയും മനസ്സ് കീഴടക്കി. കെന്‍ഡാല്‍ ദിവിസ്‌ക് എന്ന യുവാവ് ഇപ്പോള്‍ നാട്ടിലെ താരമാണ്.

ഇക്കഴിഞ്ഞ ജനുവരി 22- ന് ആല്‍ബെര്‍ട്ടയ്ക്ക് സമീപമുള്ള തൊമഹൗകിലെ ഒരു എണ്ണകിണര്‍ പരിശോധിക്കാന്‍ എത്തിയതായിരുന്നു കെന്‍ഡാല്‍ ദിവികസ്‌ക്. മഞ്ഞുമൂടിക്കിടക്കുന്ന വഴിയിലൂടെ കടന്നുപോകവേ ആ കൊടും മഞ്ഞത്ത് വഴിയില്‍ മൂന്ന് പൂച്ചക്കുഞ്ഞുങ്ങള്‍ ഇരിക്കുന്ന കണ്ടപ്പോള്‍ അതിലല്‍പ്പം അസ്വാഭാവികത ഉണ്ടല്ലോയെന്ന് തോന്നിയതിനാല്‍ കെന്‍ഡാല്‍ അവിടേക്ക് എത്തി.

മഞ്ഞില്‍ വാലുകള്‍ ഉറച്ചുപോയതിനാല്‍ മുന്നോട്ടുനീങ്ങാന്‍ കഴിയാത്ത അവസ്ഥയില്‍ ഇരിക്കയായിരുന്നു അവ. അവയെ എടുത്തുമാറ്റാന്‍ കെന്‍ഡാല്‍ ശ്രമിച്ചുവെങ്കിലും കഴിഞ്ഞില്ല. ഇതോടെ തന്റെ വാഹനത്തിലിരുന്ന ഫ്ളാസ്‌കില്‍ നിന്നും ചൂടു കാപ്പി കൊണ്ടു വന്ന് പൂച്ചകുഞ്ഞുങ്ങളുടെ വാലില്‍ ഒഴിച്ചു. ആ ചൂടില്‍ അവിടത്തെ മഞ്ഞ് ഉരുകിത്തുടങ്ങിയതോടെ കെന്‍ഡാലിന് അവയെ മഞ്ഞില്‍ നിന്ന് 'പറിച്ചെടുക്കാന്‍' കഴിഞ്ഞു!

തണുത്തു വിറച്ചിരുന്ന പൂച്ചകുഞ്ഞുങ്ങളാകട്ടെ ആ സമയം കിട്ടിയ ആ ചൂടുകാപ്പിയും ആര്‍ത്തിയോടെ നക്കിക്കുടിച്ചു. വിശന്ന് വലഞ്ഞുകിടന്നിരുന്ന പൂച്ചകുഞ്ഞുങ്ങളെ കെന്‍ഡാല്‍ തന്റെ വീട്ടിലേക്ക് കൊണ്ടുപോയി ഭക്ഷണം നല്‍കി. കെന്‍ഡാല്‍ തന്നെയാണ് ഈചിത്രങ്ങളും വീഡിയോയും ഫെയ്സ്ബുക്ക് വഴി പുറത്തുവിട്ടത്.

പൂച്ചകുട്ടികളെ ഏറ്റെടുക്കാന്‍ ആരെങ്കിലുമുണ്ടോയെന്നും കെന്‍ഡാല്‍ അന്വേഷിച്ചിരുന്നു. മൂന്നു പേരെയും ഒരുമിച്ച് സ്വീകരിക്കാന്‍ കഴിയണമെന്നും അവയെ വേര്‍പിരിക്കാന്‍ ആഗ്രഹിക്കുന്നില്ലെന്നും കെന്‍ഡാല്‍ വ്യക്തമാക്കിയിരുന്നു. പോസ്റ്റ് കണ്ട് നിരവധി പേര്‍ ദത്തെടുക്കാന്‍ ആഗ്രഹം പ്രകടിപ്പിച്ച് എത്തി.

'മൂന്ന് കൊച്ചു തെമ്മാടികളും അവരുടെ പുതിയ വീട്ടിലേക്ക് താമസം മാറ്റിയെന്നും ഭക്ഷണം കഴിച്ച് അവര്‍ ഊര്‍ജസ്വലരായിരിക്കുന്നുവെന്നും' കെന്‍ഡാല്‍ പിന്നീട് പോസ്റ്റ് ചെയ്തു. മൂന്നു ജീവനുകളെ സംരക്ഷിച്ച കെന്‍ഡാലിന് ഇപ്പോള്‍ അഭിനന്ദന പ്രവാഹമാണ്.