പ്രസിഡണ്ട് ഡോണൾഡ് ട്രംപിനെ ഇംപീച്ച് ചെയ്യേണ്ടെന്ന് അമേരിക്കൻ സെനറ്റ്. ട്രംപ് അധികാര ദുര്‍വിനിയോഗം നടത്തിയിട്ടില്ലെന്ന് സെനറ്റ് അഭിപ്രായപ്പെട്ടു...

ട്രംപിനെതിരായ ഇംപീച്ച്മെന്‍റ് പ്രമേയം സെനറ്റ് വോട്ടിനിട്ട് തള്ളുകയായിരുന്നു. റിപ്പബ്ലിക്കന്‍ പാര്‍ട്ടിക്ക് ഭൂരിപക്ഷമുള്ള സെനറ്റില്‍ വിധി ട്രംപിന് അനുകൂലമാകുമെന്നു തന്നെയായിരുന്നു പ്രതീക്ഷ. അധികാര ദുർവിനിയോഗം, കോൺഗ്രസിന്റെ പ്രവർത്തനം തടസ്സപ്പെടുത്തല്‍ എന്നിവയായിരുന്നു ട്രംപിനെരായ കുറ്റങ്ങള്‍.സെനറ്റില്‍ രണ്ടിനും വെവ്വേറെ വോട്ടെടുപ്പ് നടത്തി . ട്രംപ് അധികാര ദുർവിനിയോഗം നടത്തിയെന്ന കുറ്റത്തിൽ നിന്ന് 48 നെതിരെ 52 വോട്ടുകൾക്കും കോൺഗ്രസ് പ്രവർത്തനം തടസപ്പെടുത്തിയെന്ന കുറ്റത്തിൽ നിന്ന് 47നെതിരെ 53 വോട്ടുകൾക്കുമാണ് ട്രംപ് കുറ്റവിമുക്തനായിരിക്കുന്നത്.

പ്രമേയം സെനറ്റ് തള്ളിയതിലൂടെ നാല് മാസം നീണ്ട് നിന്ന ഇംപീച്ച്മെന്‍റ് നടപടികൾക്കാണ് അവസാനമായിരിക്കുന്നത്. പ്രസിഡണ്ട് സ്ഥാനാര്‍ഥി ജോ ബൈഡനും മകനും നേരെ അന്വേഷണം നടത്താന്‍ യുക്രൈനുമേല്‍ സമ്മര്‍ദം ചെലുത്തിയെന്ന കേസിന്മേലാണ് ട്രംപിനുനേരെ ഇംപീച്ച്‌മെന്റ് നടപടി ആരംഭിക്കുന്നത്. നേരത്തെ ഡിസംബറിൽ പ്രതിനിധിസഭ ട്രംപിനെ ഇംപീച്ച് ചെയ്തിരുന്നു. ഡിസംബർ 18നായിരുന്നു ഇത്.

100 അംഗ സെനറ്റില്‍ 67 പേരുടെ ഭൂരിപക്ഷം ലഭിച്ചാല്‍ മാത്രമേ ട്രംപിനെ പുറത്താക്കാനാവുമായിരുന്നുള്ളു. അതുകൊണ്ട് തന്നെ റിപ്പബ്ലിക്കന്‍ പാര്‍ട്ടിക്ക് ഭൂരിപക്ഷമുള്ള സെനറ്റില്‍ ട്രംപിനെതിരെയുള്ള പ്രമേയം പാസാകില്ലെന്ന് നേരത്തെ വ്യക്തമായിരുന്നു. ഡെമോക്രാറ്റിക് പാര്‍ട്ടിക്ക് 47 അംഗങ്ങള്‍ മാത്രമാണ് സെനറ്റിലുള്ളത്. എന്നാല്‍ റിപ്പബ്ലിക്കന്‍ സെനറ്റര്‍ മിറ്റ് റോമ്നി സ്വന്തം പാര്‍ട്ടിക്കാരനായ ഒരാളെ പുറത്താക്കാനുളള പ്രമേയത്തെ അനുകൂലിച്ചത് അമേരിക്കന്‍ ചരിത്രത്തിലെ തന്നെ ആദ്യ സംഭവമായി മാറി .. യുഎസിന്‍റെ ചരിത്രത്തില്‍ സെനറ്റില്‍ ഇംപീച്ച്‌മെന്‍റ് വിചാരണ നേരിടുന്ന മൂന്നാമത്തെ പ്രസിഡണ്ടാണ് ട്രംപ്.

കുറ്റ വിമുക്തനാകാൻ ഒരുങ്ങി നിൽക്കുന്ന ട്രംപ് വാര്‍ഷിക നയപ്രഖ്യാപിന പ്രസംഗത്തിനായി ജനപ്രതിനിധി സഭയിലെത്തിയപ്പോൾ നാടകീയ രംഗങ്ങളാണ് അരങ്ങേറിയത് ..സഭയിലെത്തിയ ട്രംപ് പ്രസംഗത്തിന്‍റെ പകര്‍പ്പ് സ്‍പീക്കറായ നാന്‍സി പെലോസിക്ക് നല്‍കിയപ്പോൾ അവര്‍ ഷേക്ക് ഹാന്‍ഡിനായി കൈ നീട്ടി. എന്നാല്‍ ട്രംപ് കൈ കൊടുക്കാതെ മുഖം തിരിച്ച് നടന്നു..
സഭാ സ്‍പീക്കര്‍ക്ക് പ്രസിഡന്‍റ് ഹസ്‍തദാനം ചെയ്യുകയെന്നതാണ് ജനാധിപത്യ മര്യാദ. എന്നാല്‍ തനിക്കെതിരെ ഇംപീച്ച്മെന്‍റിന് ശുപാര്‍ശ ചെയ്‍ത പെലോസിയെ ട്രംപ് മനപൂര്‍വം അവഗണിച്ചു എന്നാണു ഡെമോക്രാറ്റുകള്‍ ആരോപിക്കുന്നത്

ഇംപീച്ച്മെന്‍റ് പ്രമേയം പരാജയപ്പെട്ടതിനു പിന്നാലെ തന്നെ 'ഇംപീച്ച്മെന്‍റ് തട്ടിപ്പിലെ' വിജയത്തെക്കുറിച്ച് നാളെ പ്രതികരിക്കുമെന്ന് ഡോണള്‍ഡ് ട്രംപ് പറഞ്ഞു. അമേരിക്കന്‍ പ്രസിഡന്റായി എക്കാലവും താന്‍ തന്നെ തുടരുമെന്ന് സൂചിപ്പിക്കുന്ന വീഡിയോയും‍‍‍ ഡോണള്‍ഡ് ട്രംപ് ഷെയര്‍ ചെയ്തിട്ടുണ്ട്

ട്രംപിന്‍റെ പ്രസംഗം നടക്കുന്നതിനിടെ തന്നെ നാന്‍സി പെലോസി ഇതിന് പകരം വീട്ടുകയും ചെയ്‍തു. ട്രംപ് പ്രസംഗിക്കുന്നതിനിടെ എഴുന്നേറ്റുനിന്ന നാന്‍സി പെലോസി പ്രസംഗത്തിന്‍റെ പകര്‍പ്പ് വലിച്ചുകീറി