കൊറോണ ബാധിച്ചവരുടെ പരിചരണത്തിനായി ഒരു ചൈനീസ് ഡോക്ടര്‍-വരന്‍ തന്റെ കല്യാണസമയം വെട്ടിച്ചുരുക്കി. ഷാന്‍ഡോംഗ് സര്‍വകലാശാലയിലെ ക്ലിനിക്കില്‍ ജോലി ചെയ്യുന്ന ഡോ. ലി സി ക്യാംഗ് ആണ് രാജ്യത്തിന്റെ പ്രതിസന്ധി പരിഗണിച്ചു തന്റെ കല്യാണം പത്തു മിനിറ്റിലൊതുക്കിയത്.

വരന്റേയും വധുവിന്റേയും മാതാപിതാക്കള്‍ മാത്രമാണ് ചടങ്ങില്‍ പങ്കെടുത്തത്. കൊറോണ വരും മുമ്പേ നിശ്ചയിച്ചിരുന്ന കല്യാണം, കെങ്കേമമാക്കാനായിരുന്നു ഇരുവരുടെയും കുടുംബാംഗങ്ങള്‍ പദ്ധതിയിട്ടിരുന്നത്. എന്നാല്‍, രോഗം പടര്‍ന്ന സാഹചര്യത്തില്‍ കല്യാണം ഏറ്റം ലളിതമാക്കാനുള്ള ക്യാംഗിന്റെ തീരുമാനത്തിനു വധു യു ഹോംഗ്യാന്റെ പൂര്‍ണ പിന്തുണയുമുണ്ടായിരുന്നു.

കല്യാണത്തിനു ശേഷം വധുവിനെ മാതാപിതാക്കള്‍ക്കൊപ്പം പറഞ്ഞുവിട്ട ഡോ. ലി സി ക്യാംഗ് നേരേ പോയത് ആശുപത്രിയിലേക്കാണ്.

പല ഡോക്ടര്‍മാര്‍ക്കും 24 മണിക്കൂറും ആശുപത്രിയില്‍ തന്നെ ചെലവിടേണ്ടിവരുന്ന ഈ അടിയന്തര ഘട്ടത്തില്‍ ആഘോഷങ്ങള്‍ക്കു കളയാന്‍ തനിക്കു സമയമില്ലെന്നു ഡോ. ലി സി ക്യാംഗ് പറഞ്ഞു.