അമേരിക്കയിലും കൊറോണ വൈറസ് ബാധ രൂക്ഷമാകുന്നു. കഴിഞ്ഞ ദിവസം എട്ട് പേര്‍ കൂടി മരിച്ചതോടെ മരണസംഖ്യ 38 ആയി ഉയര്‍ന്നു. പുതുതായി 328 പേര്‍ക്ക് കൂടി രോഗബാധ സ്ഥിരീകരിച്ചതോടെ അമേരിക്കയിലെ രോഗബാധിതരുടെ എണ്ണം 1300 കവിഞ്ഞു. ഇതോടെ ന്യൂയോര്‍ക്കും വാഷിങ്ടണും ഉള്‍പ്പെടെ 11 സംസ്ഥാനങ്ങളില്‍ പ്രസിഡന്റ് ഡൊണാള്‍ഡ് ട്രംപ് ആരോഗ്യ അടിയന്തരാവസ്ഥ പ്രഖ്യാപിച്ചു. ലോകാരോഗ്യസംഘടന കൊറോണയെ മഹാമാരിയായി പ്രഖ്യാപിച്ചതിന് തൊട്ടുപിന്നാലെയാണ് അമേരിക്കയുടെ പ്രഖ്യാപനം. അതിവേഗം പടരുന്ന അസുഖം തടയുന്നതില്‍ പലയിടത്തും ജാഗ്രതക്കുറവുണ്ടായെന്നും നേരത്തെ ലോകാരോഗ്യ സംഘടന നിരീക്ഷിച്ചിരുന്നു.

അതുപോലെ യൂറോപ്പില്‍ നിന്നുള്ള എല്ലാ യാത്രാസര്‍വീസുകളും 30 ദിവസത്തേക്ക് നിര്‍ത്തിവെക്കുന്നതായി യുഎസ് പ്രസിഡന്റ്് വ്യക്തമാക്കി. വെള്ളിയാഴ്ച അര്‍ധരാത്രി മുതലാണ് നിയന്ത്രണം പ്രാബല്യത്തില്‍ വരിക. യൂറോപ്പിലും വൈറസ് പടരുന്ന സാഹചര്യത്തിലും യൂറോപ്പില്‍ നിന്ന് വരുന്നവര്‍ യുഎസില്‍ രോഗം പടര്‍ത്താതിരിക്കാനുമാണ് യാത്രാനിരോധനം ഏര്‍പ്പെടുത്തുന്നത്. എന്നാല്‍ ബ്രിട്ടന് മാത്രം നിയന്ത്രണത്തില്‍ നിന്ന് ഒഴിവാക്കിയിട്ടുണ്ട്. അതേസമയം, അമേരിക്കയും മറ്റ് ലോകരാജ്യങ്ങളും തമ്മിലുള്ള വ്യാപാരത്തില്‍ ഒരു തരത്തിലും തടസ്സമുണ്ടാകില്ലെന്നാണ് ട്രംപ് വ്യക്തമാക്കുന്നത്. എന്നാല്‍ ഇതെത്രത്തോളം നടപ്പാകുമെന്നതില്‍ വ്യക്തതയില്ല.

അമെരിക്കയിലെ 30 സംസ്ഥാനങ്ങളിലാണ് ഇതുവരെ കൊറോണ ബാധ സ്ഥിരീകരിച്ചിരിക്കുന്നത്. എന്നാല്‍ സ്ഥിതി രൂക്ഷമായ 11 സംസ്ഥാനങ്ങളിലാണ് ഇപ്പോള്‍ അടിയന്തരാവസ്ഥ പ്രഖ്യാപിച്ചിട്ടുള്ളത്. ന്യൂയോര്‍ക്ക്, കാലിഫോര്‍ണിയ, വാഷിങ്ടണ്‍, ഫ്‌ലോറിഡ. ഒറിഗോണ്‍, യൂട്ടാ, മേരിലാന്‍ഡ്, കെന്റക്കി, മസാച്യുസെറ്റ്‌സ്, ന്യൂജഴ്‌സി, കൊളറാഡോ എന്നീ സസംസ്ഥാനങ്ങളിലാണ് അടിയന്തരാവസ്ഥ പ്രഖ്യാപിച്ചത്.

വൈറസ് പടരുന്ന പശ്ചാത്തലത്തില്‍ രാജ്യത്ത് കടുത്ത നിയന്ത്രണങ്ങളാണ് ഏര്‍പ്പെടുത്തിയത്. ഓഫീസുകളും സ്‌കൂളുകളും അടച്ചു. ഡെമോക്രാറ്റിക് പ്രസിഡന്റ് സ്ഥാനാര്‍ഥിയാകാന്‍ മത്സരിക്കുന്ന ബേണി സാന്‍ഡേഴ്‌സും ജോ ബൈഡനും റാലികള്‍ റദ്ദാക്കി. വൈസ് പ്രസിഡന്റ് മൈക്ക് പെന്‍സിന്റെ നേതൃത്വത്തില്‍ പ്രത്യേക സംഘം രൂപീകരിച്ചതാണ് വൈറസ് പ്രതിരോധ പ്രവര്‍ത്തനങ്ങള്‍ ഏകോപിപ്പിക്കുന്നത്.

അതുപോലെ, രോഗബാധയുടെ പശ്ചാത്തലത്തില്‍ 2019-2020 സീസണ്‍ സസ്‌പെന്‍ഡ് ചെയ്യാന്‍ അമേരിക്കന്‍ ബാസ്‌കറ്റ്‌ബോള്‍ ലീഗായ എന്‍ബിഎ തീരുമാനിച്ചു. ഉട്ടാ ജാസ് ടീമിലെ ഒരു കളിക്കാരന് കൊറോണ വൈറസ് ബാധ സ്ഥിരീകരിച്ചതിനെ തുടര്‍ന്നാണ് മത്സരങ്ങള്‍ ഒഴിവാക്കാന്‍ തീരുമാനിച്ചത്. ബുധനാഴ്ച മുതലുള്ള മത്സരങ്ങളാണ് ഒഴിവാക്കിയത്.

രാജ്യത്തോടുള്ള അഭിസംബോധനയ്ക്ക് തൊട്ടുമുമ്പ്, ''അമേരിക്ക കൊറോണ വൈറിനെ് പ്രതിരോധിക്കാനും തടയാനും കണ്ടെത്താനുമുള്ള ഒരു വാക്‌സിന്‍ കണ്ടുപിടിക്കാനുള്ള ശ്രമം തുടങ്ങിക്കഴിഞ്ഞു. ഇതിനായി ഒരു പോളിസി രൂപീകരിക്കും''എന്നും ട്രംപ് ട്വീറ്റ് ചെയ്തിരുന്നു. അതേസമയം, ലോകത്തെമ്പാടും കൊറോണവൈറസ് അഥവാ കൊവിഡ് 19 ബാധിച്ചവരുടെ എണ്ണം 1,24,000 ആയി ഉയര്‍ന്നിരുന്നു. 4500 മരണങ്ങളും റിപ്പോര്‍ട്ട് ചെയ്തു. ചൈനയ്ക്ക് ശേഷം രോഗബാധിതരുടെ എണ്ണം കുത്തനെ കൂടിയ രാജ്യങ്ങള്‍ ഇറാനും ഇറ്റലിയുമാണ്.