ലോകപ്രശസ്തനായ ഇന്ത്യന് പാചകവിദഗ്ധന് ഫ്ലോയ്ഡ് കാര്ഡോസ് കോവിഡ് ബാധിച്ച് അമേരിക്കയില് മരിച്ചു... പ്രശസ്ത ഭക്ഷ്യശൃംഖലയായ ബോംബെ കാന്റീനിന്റെ ശില്പികളിലൊരാളുമാണ് കാര്ഡോസ്
ലോകപ്രശസ്തനായ ഇന്ത്യന് പാചകവിദഗ്ധന് ഫ്ലോയ്ഡ് കാര്ഡോസ് (59) കോവിഡ് ബാധിച്ച് അമേരിക്കയില് മരിച്ചു. പ്രശസ്ത ഭക്ഷ്യശൃംഖലയായ ബോംബെ കാന്റീനിന്റെ ശില്പികളിലൊരാളുമാണ് കാര്ഡോസ്. മാര്ച്ച് എട്ടിനാണ് അദ്ദേഹം മുംബൈയില്നിന്ന് ഫ്രാങ്ക്ഫുര്ട് വഴി ന്യൂയോര്ക്കിലെത്തിയത്. മാര്ച്ച് 18-നാണ് കൊറോണ രോഗബാധ സ്ഥിരീകരിച്ചത്. അദ്ദേഹം മരണമടഞ്ഞ കാര്യം ബുധനാഴ്ചയാണ് ബോംബെ കാന്റീനിന്റെ ഉടമസ്ഥകമ്പനിയായ ഹംഗര് ഇന്കോര്പ്പറേറ്റഡ് അറിയിച്ചത്.
മുംബൈയില് മാര്ച്ച് ഒന്നിന് ബോംബെ കാന്റീനിന്റെ അഞ്ചാംവാര്ഷികത്തോട് അനുബന്ധിച്ച് വിരുന്ന് ഒരുക്കിയിരുന്നു. ബോംബെ കാന്റീനിന്റെ ഉടമകളിലൊരാളും പാചകവിഭാഗം മേധാവിയുമായ കാര്ഡോസ് തന്നെയാണ് വിരുന്നൊരുക്കിയത്. വിരുന്നില് ഇരുനൂറോളം ആളുകള് പങ്കെടുത്തിരുന്നു. ഇതിന് ശേഷമാണ് കാര്ഡോസ് അമേരിക്കയിലേക്ക് പോയത്. കാര്ഡോസ് മരിച്ചത് അറിഞ്ഞതോടെ മുംബൈയിലെ വിരുന്നില് പങ്കെടുത്ത മഹാരാഷ്ട്രയിലെ ഉന്നതര് പരിഭ്രാന്തിയിലാണ്.
കൊറോണ സംശയിച്ച് ആശുപത്രിയിലാണെന്ന് കാര്ഡോസ് കഴിഞ്ഞ ദിവസം സമൂഹികമാധ്യമങ്ങളിലൂടെ ആരാധകരെ അറിയിച്ചിരുന്നു. മുംബൈയിലെ ചടങ്ങില് പങ്കെടുത്തവരെയും ഹോട്ടലിലെ പാചകക്കാരെയും ഉദ്യോഗസ്ഥരെയും എല്ലാം വിവരം അറിയിച്ചിരുന്നെന്നും ആര്ക്കും രോഗലക്ഷണമൊന്നും കണ്ടെത്തിയിട്ടില്ലെന്നും ഹംഗര് ഇന്കോര്പ്പറേറ്റഡ് അറിയിച്ചു.
മുംബൈയില്വെച്ച് കാര്ഡോസുമായി സമ്ബര്ക്കത്തിലുണ്ടായിരുന്നവരെയെല്ലാം കണ്ടെത്താനുള്ള ശ്രമത്തിലാണ് അധികൃതര്. മുംബൈയില് ജനിച്ച് അവിടെയും ഗോവയിലുമായി വളര്ന്ന ഫ്ലോയ്ഡ് കാര്ഡോസ് ഇന്ത്യയിലും സ്വിറ്റ്സര്ലന്ഡിലുമുള്ള പ്രശസ്തകേന്ദ്രങ്ങളില്നിന്നാണ് പാചക കലയില് വൈദഗ്ധ്യം നേടിയത്. കുറച്ചുകാലമായി ന്യൂയോര്ക്ക് തട്ടകമായാണ് കാര്ഡോസ് പ്രവര്ത്തിച്ചുവന്നിരുന്നത്.
"
https://www.facebook.com/Malayalivartha