ലോകത്ത് കോവിഡ് ബാധിച്ച് മരിച്ചവരുടെ എണ്ണം നാല്‍പത്തി രണ്ടായിരത്തി ഒരുനൂറ്റി അന്‍പത്തിയൊന്നായി. രോഗബാധിതരുടെ എണ്ണത്തില്‍ അമേരിക്കയാണ് ഏറ്റവും മുന്നില്‍. ഒരുലക്ഷത്തി എണ്‍പത്തിഎട്ടായിരത്തി അഞ്ഞൂറ്റിമുപ്പതുപേര്‍ക്ക് അമേരിക്കയില്‍ കോവിഡ് 19 സ്ഥിരീകരിച്ചു. രോഗബാധ നിയന്ത്രിക്കാനാവാത്ത മറ്റൊരു രാജ്യം ഇറ്റലിയാണ്. ഒരുലക്ഷത്തി അയ്യായിരത്തി എഴുനൂറ്റി തൊണ്ണൂറ്റിരണ്ട് പേര്‍ക്ക് രോഗം സ്ഥിരീകരിച്ച ഇറ്റലിയില്‍ പന്ത്രണ്ടായിരത്തി നാനൂറ്റി ഇരുപത്തിയെട്ടുപേര്‍ മരിച്ചു. കഴിഞ്ഞ ഇരുപത്തിനാല് മണിക്കൂറിനുള്ളില്‍ 837 പേരാണ് ഇറ്റലിയില്‍ മരിച്ചത്. സ്പെയിനില്‍ 8,464 പേര്‍ മരിച്ചു. ഫ്രാന്‍സില്‍ 3,523 പേരും യുകെയില്‍ 1789 പേരും ജര്‍മനിയില്‍ 775 പേരും മരിച്ചു.

ചൈനയില്‍ പുതിയ രോഗബാധിതരില്ല. മരണം 3,305 ആണ്. ഇറാനില്‍ ഇതുവരെ 2898 പേര്‍ക്ക് ജീവന്‍ നഷ്ടമായി. അമേരിക്കയിലും ഫ്രാന്‍സിലും കോവിഡ് ബാധിച്ച് മരിക്കുന്നവരുടെ എണ്ണം അതിവേഗം ഉയരുന്നു. 3,860 പേരാണ് അമേരിക്കയില്‍ ഇതുവരെ മരിച്ചത്. ഇന്നലെ മാത്രം 719 പേര്‍ക്ക് ജീവന്‍ നഷ്ടമായി. രാജ്യത്ത് ഒരുദിവസമുണ്ടാകുന്ന ഏറ്റവും ഉയര്‍ന്ന മരണസംഖ്യയാണിത്. ആകെ രോഗികളുടെ എണ്ണം 1,87,347 ആണ്. ഫ്രാന്‍സില്‍ മരണം 3523 ആയി. 499 പേര്‍ ഇന്നലെ മാത്രം മരിച്ചു. അടിയന്തര സാഹചര്യം നേരിടാന്‍ നൂറുകണക്കിന് താല്‍ക്കാലിക ആശുപത്രികള്‍ നിര്‍മിക്കാന്‍ അമേരിക്ക നീക്കം തുടങ്ങി.

ന്യൂയോര്‍ക്കിലും മറ്റ് രോഗബാധിത പ്രദേശങ്ങളിലുമായിട്ടാണ് താല്‍ക്കാലിക ആശുപത്രികള്‍ നിര്‍മിക്കുന്നത്. ഹോട്ടലുകള്‍, ഡോര്‍മെറ്ററികള്‍, കണ്‍വന്‍ഷന്‍ സെന്ററുകള്‍, തുറസായ സ്ഥലങ്ങള്‍ എന്നിവിടങ്ങള്‍ ഇതിനായി ഏറ്റെടുക്കും. യു.എസ് ആര്‍മി എഞ്ചിനീയറിംഗ് വിഭാഗത്തിനാണ് നിര്‍മാണ ചുമതല. ന്യൂയോര്‍ക്കില്‍ ഒരാഴ്ചയ്ക്കകം ആയിരം കിടക്കകളുള്ള ആശുപത്രിയുടെ നിര്‍മാണം പൂര്‍ത്തിയാകും. കോവിഡ് ഇതര രോഗികളെയാണ് താല്‍ക്കാലിക ആശുപത്രികളില്‍ പ്രവേശിപ്പിക്കുക. കോവിഡ് രോഗികളെ നിലവിലെ ആശുപത്രികളില്‍ തന്നെ ചികില്‍സിക്കും. ഇതിലൂടെ ആരോഗ്യപ്രവര്‍ത്തകരുടെ ആയാസം കുറയ്ക്കാനും ലക്ഷ്യമിടുന്നുണ്ട്.

മരണസംഖ്യ അതിവേഗമുയരുന്ന ഫ്രാന്‍സിലും ആശുപത്രികള്‍ കോവിഡ് രോഗികളെ കൊണ്ട് നിറഞ്ഞു. പാരീസ് അടക്കമുള്ള നഗരങ്ങളില്‍ നിന്ന് രോഗികളെ വൈറസ് ബാധയില്ലാത്തെ രാജ്യത്തിന്റെ മറ്റ് ഭാഗങ്ങളിലെ ആശുപത്രികളിലേക്ക് ഹൈസ്പീഡ് ട്രെയിന്‍ കൊണ്ടുപോയാണ് ചികില്‍സിക്കുന്നത്. കഴിഞ്ഞ മൂന്നാഴ്ചയായി ഫ്രാന്‍സ് ലോക്ക് ഡൗണിലാണ്. എന്നിട്ടും മരണസംഖ്യയും രോഗികളുടെ എണ്ണവും വര്‍ധിക്കുന്നത് ആശങ്കപ്പെടുത്തുന്നുണ്ട്. മൂന്നുദിവസമായി കുറഞ്ഞുനിന്ന ബ്രിട്ടണിലെ മരണനിരക്ക് കഴിഞ്ഞ ദിവസം കുതിച്ചുയര്‍ന്നു. കഴിഞ്ഞദിവസം മാത്രം കോവിഡ് രോഗബാധയെത്തുടര്‍ന്ന് ബ്രിട്ടണില്‍ മരിച്ചത് 381 പേരാണ്. അതേസമയം കോവിഡ് രോഗം പടരുന്നതിനിടെ ബ്രിട്ടനില്‍ കൊലപാതകങ്ങളും കൂടുന്നു. ബ്രിട്ടനിലെ സസക്സില്‍ നാലംഗ കുടുംബത്തെയും ഹെര്‍ട്ഫോഡ്ഷെറില്‍ മൂന്നംഗ കുടുംബത്തെയും മരിച്ച നിലയില്‍ കണ്ടെത്തി.