ഇന്ന് ലോകത്തെ മുഴുവന്‍ ഭീതിപ്പെടുത്തുന്നത് കൊറോണയാണ് എന്നാല്‍ അതിനെക്കാള്‍ ഭയാനകമാണ് ഉത്തരകൊറിയയിലെ ഇപ്പോഴത്തെ അവസ്ഥ. അവിടെ നടമാടുന്നത് കടുത്ത മനുഷ്യാവകാശ ലംഘനങ്ങളാണ്. ഏറെ ഗുരുതരമായ ആരോപണങ്ങള്‍ നേരത്തേ ഉയര്‍ന്നിട്ടുണ്ട് എങ്കിലും. ഇപ്പോള്‍ പുറത്തുവരുന്നത് മനുഷ്യ മനസാക്ഷിയെ തന്നെഞെട്ടിക്കുന്ന വിവരങ്ങളാണ് വിചാരണത്തടവുകാരുടെ മൃതദേഹങ്ങള്‍ കൃഷിത്തോട്ടങ്ങളില്‍ വളമായി ഉപയോഗിക്കുന്നതായി  ഉത്തരകൊറിയയിലെ കോണ്‍സ്‌ട്രേഷന്‍ ക്യാംപില്‍ നിന്ന് രക്ഷപ്പെട്ടെത്തിയ യുവതിയുടെ വെളിപ്പെടുത്തലാണ് ഏറെ ഭീതിയിലാഴ്ത്തുന്നത്.

ഉത്തരകൊറിയയിലെ പ്യോങ്യാങ്ങില്‍ നിന്ന് 500 മൈലുകള്‍ അകലെ കെയ്‌ച്ചോണ്‍ പ്രവിശ്യയിലുള്ള കോണ്‍സ്‌ട്രേഷന്‍ ക്യാംപില്‍ നിന്ന് രക്ഷപ്പെട്ട കിം ഇല്‍ സങ് എന്ന യുവതിയാണ് ഉത്തരകൊറിയയ്‌ക്കെതിരെ ഗുരുതരമായ ആരോപണങ്ങള്‍ ഉന്നയിച്ചത്.  യുഎസ് ഗവണ്‍മെന്റ് കമ്മിറ്റിയോടാണ് യുവതിയുടെ വെളിപ്പെടുത്തല്‍. യുവതിയുടെ വെളിപ്പെടുത്തലിന്റെ അടിസ്ഥാനത്തില്‍ കെയ്‌ച്ചോണിലെ കോണ്‍സ്‌ട്രേഷന്‍ ക്യാംപിലെ ദൃശ്യങ്ങള്‍ പരിശോധിച്ചതോടെ ജയിലില്‍ മൃതദേഹങ്ങള്‍ ദഹിപ്പിക്കാനുള്ള സംവിധാനങ്ങള്‍ ഇല്ലെന്നു കണ്ടെത്തിയതായും ചില രാജ്യാന്തരമാധ്യമങ്ങള്‍ റിപ്പോര്‍ട്ട് ചെയ്തു. വളരെ ഇടുങ്ങിയ കുഴികളിലാണു തടവുകാരുടെ മൃതദേഹങ്ങള്‍ മറവു ചെയ്യുന്നതെന്നും കൂടുതല്‍ തടവുകാര്‍ മരിച്ചാല്‍ കൃഷിയിടത്തിന്റെ നടുവില്‍  വലിയൊരു കുഴികുത്തി മൃതദേഹങ്ങള്‍ കൂട്ടമായി മറവ് ചെയ്യുന്നതാണ് രീതിയെന്നും യുവതി പറയുന്നു. 2000 മുതല്‍ 6000 വരെയാണ് ഇവിടത്തെ തടവുകാരുടെ എണ്ണം. സ്ത്രീകളും കുട്ടികളും എല്ലാം ഇതില്‍ ഉള്‍പ്പെടും.

അതുപോലെതന്നെ ഉത്തരകൊറിയയിലെ കോണ്‍സന്‍ട്രേഷന്‍ ക്യാംപില്‍ നിന്ന് രക്ഷപ്പെട്ട ലീ സൂണ്‍ എന്ന വിചാരണത്തടവുകാരനും യുഎസ് ഗവണ്‍മെന്റ് കമ്മിറ്റിയോട് സമാനമായ തുറന്നുപറച്ചില്‍ നടത്തിയിരുന്നു. 18 മണിക്കൂറുകള്‍ തുടര്‍ച്ചയായി ജോലി ചെയ്യേണ്ടി വന്നുവെന്നും 300 പേര്‍ക്ക് ഒരു ശുചിമുറി മാത്രമാണ് ഉണ്ടായിരുന്നതെന്നും ലീ സൂണ്‍ മൊഴി നല്‍കി. എലികളെ ജീവനോടെ പിടിച്ചു തിന്നാണ് പലപ്പോഴും വിശപ്പടക്കിയിരുന്നതെന്നും ലീ സൂണ്‍ പറയുന്നു. സ്ത്രീ തടവുകാരെ കൂട്ടത്തോടെ ബലാല്‍സംഗം ചെയ്യുന്നതും കൊന്നൊടുക്കുന്നതും പതിവാണെന്നും നേരത്തെ ഉത്തര കൊറിയയില്‍ നിന്നും രക്ഷപ്പെട്ട വനിത ജയില്‍ വാര്‍ഡനും വെളിപ്പെടുത്തിയിരുന്നു.

മാത്രമല്ല ഈ ക്രൂര പീഡനങ്ങള്‍ സഹിക്കവയ്യാതെ ജയില്‍നിന്ന് രക്ഷപ്പെടാന്‍ ശ്രമിക്കുന്നവര്‍ക്കും ജയിലില്‍ മോഷണം നടത്തുന്നവര്‍ക്കും നേരെ അതിക്രൂരമായ ശിക്ഷാരീതികളാണു നടപ്പാക്കുന്നതെന്നും യുഎന്‍ പുറത്തു വിട്ട റിപ്പോര്‍ട്ടില്‍ പരാമര്‍ശിച്ചിരുന്നു. ഇത്തരക്കാരെ പൊതുജനമധ്യത്തില്‍ തൂക്കിക്കൊല്ലുന്നതു പതിവാണ്. തടവറകളില്‍ കിടക്കുന്നവരെ ലൈംഗികമായി ദുരുപയോഗം ചെയ്യുകയാണ് അവിടുത്തെ അധികാരികള്‍. എതിര്‍ക്കുന്നവര്‍ ലോഹദണ്ഡുകള്‍ കൊണ്ടുള്ള മര്‍ദനമേറ്റ് പലരും കൊല്ലപ്പെട്ടതായും യുഎന്‍  പുറത്തുവിട്ട റിപ്പോര്‍ട്ടില്‍ പറയുന്നു.