വെറ്റ് മാര്ക്കറ്റുകള്ക്ക് പൂട്ടിടുന്നു. പട്ടിയിറച്ചിയും പൂച്ചയിറച്ചിയും വില്ക്കുന്നതിനും കഴിക്കുന്നതിനും ഷെന്ഴെനില് നിരോധനം. ചൈനയില് ഇതാദ്യം. ഒടുവില് പഠിച്ചു?
ചൈനയില് കൊറോണ വൈറസ് പടര്ന്ന് പിടിച്ചതോടെ നിരവധി പ്രശ്നങ്ങളാണ് ഉടലെടുത്തത്. ചൈന മൃഗങ്ങളെ തിന്നുന്നത് കൊണ്ടാണ് ഇത്തരം മഹാമാരികള് വരുന്നതെന്ന് കടുത്ത പ്രചാരണമുണ്ടായിരുന്നു. കൊറോണയില് നിന്നും മുക്തിനേടിയെന്ന് കാണിച്ച് ദിവസങ്ങള്ക്ക് മുമ്പേ വെറ്റ് മാര്ക്കറ്റ് തുറന്ന് ചൈന ലോകത്തെ തന്നെ ഞെട്ടിക്കുകയും ചെയ്തിരുന്നു. ഈനാംപേച്ചികളില് നിന്നോ വവ്വാലില് നിന്നോ ഒക്കെയാണ് രോഗം പടര്ന്നതെന്ന് റിപ്പോര്ട്ടുകളും പിന്നാലെ വന്നിരുന്നു. പക്ഷേ ഇത്തരം മൃഗങ്ങളെ ചൈന ഭയന്ന് തുടങ്ങിയെന്ന് സൂചിപ്പിക്കുന്ന ചൈനീസ് അധികൃതരുടെ നടപടിയുമായി ബന്ധപ്പെട്ടൊരു വാര്ത്തയാണ് ഇപ്പോള് പുറത്തുവരുന്നത്.
പട്ടിയിറച്ചിയും പൂച്ചയിറച്ചിയും വില്ക്കുന്നതും കഴിക്കുന്നതും ചൈനീസ് പട്ടണമായ ഷെന്ഴെനില് നിരോധിക്കാനൊരുങ്ങുന്നുവെന്നാണ് റിപ്പോര്ട്ട്. അങ്ങനെയെങ്കില് ഇങ്ങനെയൊരു നടപടി സ്വീകരിക്കുന്ന ആദ്യ ചൈനീസ് പട്ടണമായും ഷെന്ഴെന് മാറും. മെയ് ഒന്നോടെ നിരോധനം പ്രാബല്യത്തില് വരുമെന്നാണ് കരുതുന്നത്. ലോകമെമ്പാടും പടര്ന്നുപിടിച്ച കൊറോണ വൈറസിന് വുഹാനിലെ ഇത്തരം വസ്തുക്കള് വില്ക്കുന്ന ഇറച്ചി കടകളുമായി ബന്ധമുണ്ട് എന്ന റിപ്പോര്ട്ടിന് തൊട്ടുപിന്നാലെയാണ് അധികൃതരുടെ ഈ നടപടി. നേരത്തെ, മൃഗങ്ങളെ ഭക്ഷണത്തിനായി ഉപയോഗിക്കുന്നത് നിര്ത്തണമെന്ന് ഡോക്ടര്മാരും ആവശ്യപ്പെട്ടിരുന്നു.
പട്ടിയുടെയും പൂച്ചയുടെയും ഇറച്ചിയുടെ വില്പ്പനയും വളര്ത്തുന്നതിനായുള്ള വില്പ്പനയുമാണ് തടഞ്ഞത്. ഇവയ്ക്കു പുറമേ മറ്റ് വന്യജീവികളെ കൊന്നു തിന്നുന്നതും നിരോധിച്ചിട്ടുണ്ട്. മൃഗങ്ങളുടെ വില്പ്പനയോ മാംസം വില്ക്കുകയോ ചെയ്യരുതെന്നും വിലക്കിന്റെ ഭാഗമായി പറയുന്നു്. മറ്റ് മൃഗങ്ങളെ അപേക്ഷിച്ച് നായകളും പൂച്ചകള്ക്കും മനുഷ്യരുമായി വളരെ അടുത്ത ബന്ധം പുലര്ത്തുന്നവരാണ്. പ്രത്യേകിച്ച് വളര്ത്ത് മൃഗങ്ങളാവുമ്പോള് ഇവര് മനുഷ്യരുമായി സമ്പര്ക്കം പുലര്ത്താനും സാധ്യത കൂടുതലാണ്. ഇവയുടെ ഇറച്ചി കഴിക്കുന്നതിലൂടെയും ഇത്തരം മാരക രോഗങ്ങള് വരാന് സാധ്യതയുണ്ടന്നും ഷെന്ഴെന് അധികൃതര് പറയുന്നു. മൃഗ സംരക്ഷ സംഘടനകള് ഈ നീക്കത്തെ പിന്തുണച്ചിട്ടുണ്ട്. ഷെന്സെന് നേരത്തെ ആമകളെയും തവളകളെയും കൊല്ലുന്നത് നിരോധിച്ചിരുന്നു. അതേസമയം, തായ്വാന്, ഹോങ്കോങ് പോലെയുള്ള രാജ്യങ്ങളിലും നായ്ക്കളും പൂച്ചകളും പോലുള്ള മൃഗങ്ങളെ ഭക്ഷണത്തിനായി ഉപയോഗിക്കുന്നത് നേരത്തെ നിരോധിച്ചിരുന്നു.
ഹ്യുമെന് സൊസൈറ്റി ഇന്റര്നാഷണല് റിപ്പോര്ട്ട് പ്രകാരം പ്രതിവര്ഷം ഏകദേശം 30 മില്യണ് നായ്ക്കളെയാണ് ഏഷ്യയില് ഭക്ഷണത്തിന് ഉപയോഗിക്കാനായി കൊല്ലുന്നത്. ചൈനയില് മാത്രം പത്ത് മില്യണ് നായകളെയും നാല് മില്യണ് പൂച്ചകളെയും കൊല്ലുന്നുണ്ട്. ഇത് ഒരു വര്ഷത്തെ കണക്കാണ്. ചില മേഖലകളില് ഇപ്പോഴും ഇവയെ ഭക്ഷിക്കാറില്ലെന്നും റിപ്പോര്ട്ടുണ്ട്. ചെനയുടെ പരമ്പരാഗത മരുന്നുകളില് ഇത് ഉപയോഗിക്കുന്നുണ്ട്. അതേസമയം, കൊറോണ വൈറസ് ബാധയെ തുടര്ന്ന് ചൈനയില് മാത്രം ഇതുവരെ 3318 പേരാണ് മരിച്ചത്. 81,589 പേര്ക്കാണ് രോഗം സ്ഥിരീകരിച്ചത്. കൊറോണ ബാധയുടെ പ്രഭവകേന്ദ്രമായ വുഹാനില് രോഗം പടര്ന്ന് പിടിച്ചത് വവ്വാലുകള്, പാമ്പുകള്, വെരുകുകള് എന്നിവയിലൂടെയാണ് നേരത്തെ റിപ്പോര്ട്ടുകള് വന്നിരുന്നു. കഴിഞ്ഞ ദിവസം വന്ന റിപ്പോര്ട്ടില് ഈനാംപേച്ചിയുടെ ശരീരത്തില് കൊറോണ വൈറസിന് സമാനമായ വൈറസ് കണ്ടെത്തിയതായും റിപ്പോര്ട്ടുകള് പുറത്തുവന്നിരുന്നു. ചൈനയിലേക്ക് കള്ളക്കടത്തിലൂടെ കൊണ്ടുവരുന്ന ഈനാംപേച്ചികളിലാണ് ഇത്തരം വൈറസുകള് കണ്ടിരുന്നതെ്ന്നാണ് നിഗമനം.
https://www.facebook.com/Malayalivartha