ലോകം നെട്ടോട്ടമോടുകയാണ് എങ്ങനെ ഈ മഹാമാരിയെ പിടിച്ചുകെട്ടും. ഇനി വേരോടെ പിഴുതെറിയാതെ നിവര്‍ത്തിയില്ല. അതിന് ഏക വഴി വാക്‌സിനേഷനാണ്. പല പരീക്ഷണങ്ങളും നടക്കുന്നു പക്ഷേ ശുഭകരമായ ഒരു വാര്‍ത്തയും പുറത്തുവരുന്നില്ല. ലോകം ഇന്ന് ഉറക്കമുണരുമ്പോള്‍ ചോദിക്കുന്ന ഒരു സ്ഥിരം ചോദ്യമുണ്ട് കൊറോണക്ക് വാക്‌സിന്‍ കണ്ടെത്തിയോ.... എന്നാല്‍ ഇതാ ആ പ്രതീക്ഷകള്‍ക്ക് ചിറകു നല്‍കുന്ന ഒരു വാര്‍ത്ത അമേരിക്കയിലെ ചില പ്രതിരോധ വിദഗ്ദര്‍ പുറത്തുവിടുകയാണ്. വാക്‌സിനേഷന്‍ പരീക്ഷണം വിജയമായി എന്നുള്ളതാണ് ആ വാര്‍ത്ത.

നമുക്കറിയാം കോവിഡ് 19-നെ ഫലപ്രദമായി നേരിടുന്നതിനായി പ്രതിരോധ വാക്സിന്‍ വികസിപ്പിച്ചെടുക്കുന്നതിന് വേണ്ടിയുള്ള തീവ്ര പരിശ്രമം ലോകത്തിന്റെ വിവിധ ഭാഗങ്ങളില്‍ നടക്കുകയാണ്. ഈ സാഹചര്യത്തിലാണ് എന്നാല്‍ തങ്ങള്‍ വികസിപ്പിച്ചെടുത്ത വാക്സിനുപയോഗിച്ച് എലികളില്‍ നടത്തിയ പഠനം പ്രത്യാശ നല്‍കുന്നതാണെന്ന് അമേരിക്കയിലെ പിറ്റ്സ്ബര്‍ഗ് സര്‍വകലാശാലയിലെ ഗവേഷകര്‍ അവകാശപ്പെടുന്നത്. എലികളില്‍ പരീക്ഷണം നടത്തിയപ്പോള്‍ പ്രോട്ടോടൈപ്പ് വാക്സിന്റെ ഫലമായി പുതിയ കൊറോണ വൈറസിനെതിരെ രണ്ടാഴ്ചക്കുള്ളില്‍ ആന്റിബോഡികളുടെ ഒരു തള്ളിക്കയററം ഉണ്ടായെന്നും അവര്‍ പറയുന്നു. അടുത്ത കുറച്ചുമാസത്തിനുള്ളില്‍ വാക്സിന്‍ മനുഷ്യരില്‍ പരീക്ഷിച്ചുനോക്കാനാകുമെന്നാണ് ഗവേഷകര്‍ പ്രത്യാശ പ്രകടിപ്പിച്ചത്. വാക്സിന്റെ ശേഷി വര്‍ധിപ്പിക്കുന്നതിനായി മൈക്രോനീഡില്‍ അറേ ഉപയോഗിച്ചാണ് ഇത് നല്‍കുന്നത്. വിരല്‍ത്തുമ്പിന്റെ വലിപ്പമുള്ള 400 ചെറിയ സൂചികള്‍ ചേര്‍ത്തുണ്ടാക്കിയതാണ് മൈക്രോ നീഡില്‍ അറേ.

ഇത്തരത്തില്‍ എലികളില്‍ നടത്തിയ പരീക്ഷണത്തില്‍ പുതിയ കൊറോണ വൈറസിനെതിരെ പ്രതിരോധ പ്രതികരണം വര്‍ധിപ്പിക്കുന്നതിനായി പുതിയ വാക്സിന് കഴിയുമെന്ന് കണ്ടെത്തിയതായി ഗവേഷകര്‍ പറയുന്നു. ഗുരുതരമായ അക്യൂട്ട് റെസ്പിറേറ്ററി സിന്‍ഡ്രോം (SARS), മിഡില്‍ ഈസ്റ്റ് റെസ്പിറേറ്ററി സിന്‍ഡ്രോം (MERS) എന്നിവയ്ക്ക് കാരണമാകുന്ന മറ്റ് കൊറോണ വൈറസുകളിലും ഇത് ഫലപ്രദമാവുകയാണെങ്കില്‍ കോവിഡ് 19ന് എതിരായ വാക്സിന്‍ വികസനത്തിലേക്ക് അതിവേഗം മുന്നേറാനാകുമെന്ന് ഗവേഷകര്‍ പറയുന്നു.

ഈ രണ്ടു വൈറസുകളും, SARS-CoV-2 വുമായി വളരെ അടുത്ത ബന്ധമുള്ളതാണ്. വൈറസിനെതിരായ പ്രതിരോധശക്തി ഉണ്ടാക്കുന്നതിന് വേണ്ടി സ്പൈക്ക് പ്രോട്ടീന്‍ എന്ന ഒരു പ്രത്യേക പ്രോട്ടീന്‍ ആവശ്യമാണെന്ന് ഇത് ഞങ്ങളെ പഠിപ്പിച്ചു. പിറ്റ്സ്ബര്‍ഗിലെ അസോസിയേറ്റ് പ്രൊഫസറായ ആന്‍ഡ്രിയ ഗംബോട്ടോ പറയുന്നു. എവിടെ നിന്നാണ് ഈ വൈറസിനെതിരായി പോരാടേണ്ടത് എന്ന് ഞങ്ങള്‍ക്ക് വളരെ കൃത്യമായി അറിയാമെന്നും ഇവര്‍ ആത്മവിശ്വാസം പ്രകടിപ്പിക്കുന്നു.