മാര്പാപ്പയുടെ ഈസ്റ്റര് സന്ദേശത്തില് കലഹം മാറ്റിവച്ച് ഒന്നിക്കാന് ആഹ്വാനം
ഉയിര്പ്പ് ഞായറാഴ്ചയില് ഭക്തജനസാന്നിധ്യമില്ലാതെ, ഏതാനും വൈദികരുടെയും ചെറിയൊരു ഗായകസംഘത്തിന്റെയും അകമ്പടിയോടെ സെന്റ് പീറ്റേഴ്സ് ബസിലിക്കയില് മാര്പാപ്പ അര്പ്പിച്ച കുര്ബാന ലോകമെങ്ങും തല്സമയം ലഭ്യമായി. ആദ്യമായാണ് വത്തിക്കാനില് നിന്നു മാര്പാപ്പയുടെ ഈസ്റ്റര് കുര്ബാന തല്സമയം സംപ്രേഷണം ചെയ്യുന്നത്. കഴിഞ്ഞ വര്ഷം 70,000 പേരാണ് സെന്റ് പീറ്റേഴ്സ് ചത്വരത്തില് ഈ ദിനത്തില് എത്തിയിരുന്നത്. കോവിഡ് ബാധയുടെ കെടുതിയിലായ ലോകത്തിനായി ഫ്രാന്സിസ് മാര്പാപ്പ പ്രാര്ഥിച്ചു.
രാജ്യങ്ങള് സൈന്യങ്ങളെ തിരിച്ചുവിളിച്ചും നേതാക്കള് രാഷ്ട്രീയ വ്യത്യാസങ്ങള് മാറ്റിവച്ചും ഈ അടിയന്തര സാഹചര്യത്തെ നേരിടണമെന്ന് മാര്പാപ്പ ഈസ്റ്റര് സന്ദേശത്തില് ആവശ്യപ്പെട്ടു. ഇത് ഭിന്നിച്ചുനില്ക്കാനുള്ള സമയമല്ലെന്നും ലോകത്തേതെല്ലാം മൂലയില് സംഘര്ഷങ്ങളുണ്ടോ അവിടെല്ലാം വെടിനിര്ത്തല് പ്രഖ്യാപിക്കണമെന്നും സാമ്പത്തിക ഉപരോധങ്ങള് പിന്വലിക്കണമെന്നും ദരിദ്ര രാജ്യങ്ങളുടെ കടങ്ങള് ഇളവു ചെയ്തുകൊടുക്കണമെന്നും അദ്ദേഹം അഭ്യര്ഥിച്ചു.
ലോകമാകെ ആരാധനാലയങ്ങള് അടഞ്ഞുകിടക്കുകയും ക്രൈസ്തവ സമൂഹം വീടുകളില് ഒതുങ്ങിക്കഴിയുകയുംചെയ്യുന്ന സാഹചര്യത്തില്, എക്കാലവും ഏറ്റവും വിശ്വാസ തീവ്രതയോടെ ആചരിച്ചുപോന്നിരുന്ന വിശുദ്ധവാരം ചരിത്രത്തിലാദ്യമായി ഇത്തവണ സമൂഹമാധ്യമങ്ങളുടെയും ടിവി ചാനലുകളുടെയും സഹായത്തോടെയാണ് പൂര്ത്തീകരിച്ചത്.
കോവിഡ് മഹാമാരിയുടെ പേരില് അടച്ചിട്ടിരിക്കുന്ന, പഴയ ജറുസലം നഗരത്തിലെ ഹോളി സെപ്പുള്ക്കര് പള്ളി വിശുദ്ധവാരം പ്രമാണിച്ച് തുറന്നെങ്കിലും അധികം പേരെ പങ്കെടുപ്പിക്കാതെയാണ് ആരാധന നടത്തിയത്. ഇവിടെയെത്തിയ ഏതാനും വിശ്വാസികള്ക്കായി ആര്ച്ച് ബിഷപ് പിയര്ബാറ്റിസ്റ്റ പിസബെല്ല കുര്ബാന അര്പ്പിച്ചു.
പല രാജ്യങ്ങളിലും വിശ്വാസികള് ഓണ്ലൈനായി തല്സമയം ഈസ്റ്റര് ആരാധനകളില് പങ്കുകൊണ്ടു. ലബനനില് സര്ക്കാരിന്റെ ഔദ്യോഗിക ടിവി ചാനലില് തിരുക്കര്മങ്ങള് കാണാനായി. ശ്രീലങ്കയിലും തല്സമയം സംപ്രേഷണം നടത്തി. ഫ്രാന്സിലും സിറിയയിലും ഫെയ്സ്ബുക്കിലും യുട്യൂബിലുമായി ആരാധന ലൈവായി ലഭ്യമായി. ബ്രിട്ടനില് ആംഗ്ലിക്കന് സഭ ഈസ്റ്റര് പോഡ്കാസ്റ്റുകള് പുറത്തിറക്കി. പാനമ ആര്ച്ച് ബിഷപ് ഹെലികോപ്റ്ററില് പറന്നുയര്ന്ന് രാജ്യത്തെ ആശീര്വദിച്ചു. സ്പെയിനില് അടഞ്ഞുകിടക്കുന്ന പള്ളികള്ക്കു മുന്നില് വിശ്വാസികള് പുഷ്പാര്ച്ചന നടത്തി. ഫിലിപ്പീന്സ് തലസ്ഥാനമായ മനിലയിലെ പള്ളിയില് ഇടവകാംഗങ്ങളുടെ കുടുംബചിത്രങ്ങള് വച്ച് ആരാധന നടത്തി.
https://www.facebook.com/Malayalivartha