ഇന്ത്യക്ക് മുന്നില് കൈനീട്ടി പാക്കിസ്ഥാനും മലേഷ്യയും. ആപത്ത് കാലത്ത് കൈവിടില്ലെന്ന് ഇന്ത്യ.
കൊറോണക്കാലത്തും അതിര്ത്തിയിലെ ഗ്രാമങ്ങള്ക്കു നേരെ ഷെല്ലാക്രമണം നടത്തുകയും ഇന്ത്യന് സൈനിക പോസ്റ്റുകള്ക്കെതിരേയും പാക്കിസ്ഥാന് ആക്രമണം നടത്തിയതിന്റെ വാര്ത്ത ഇതിനോടകം നിരവധി തവണ വന്നുകഴിഞ്ഞതാണ്. എന്നാല് അത്തരത്തില് നിലവിട്ട് പെരുമാറിയ പാക്കിസ്ഥാന് ഇപ്പോള് ഇന്ത്യയോട് സഹായം അഭ്യര്ത്ഥിച്ച് നില്ക്കുകയാണെന്ന വാര്ത്തയാണ് ഇപ്പോള് പുറത്തുവരുന്നത്. രാജ്യത്തെ കൊറോണ വൈറസ് വ്യാപനത്തിന്റെ പശ്ചാത്തലത്തിലാണ് പാക് സര്ക്കാര് ഇന്ത്യയോട് സഹായമഭ്യര്ത്ഥിച്ചിരിക്കുന്നത്. കൊറോണ ചികിത്സയ്ക്കായി ഫലപ്രദമെന്ന് വിലയിരുത്തപ്പെടുന്ന ഹൈഡ്രോക്സി ക്ലോറോക്വിനു വേണ്ടി പാക് പ്രധാനമന്ത്രി ഇമ്രാന്ഖാന് ഇന്ത്യയോട് ആവശ്യപ്പെട്ടതായി കേന്ദ്രസര്ക്കാരിനോട് ബന്ധപ്പെട്ട വൃത്തങ്ങള് അറിയിച്ചു. പാകിസ്താനില് കൊറോണ വൈറസ് ബാധിതരുടെ എണ്ണം അനിയന്ത്രിതമായി വര്ധിക്കുന്ന സാഹചര്യത്തിലാണ് പാകിസ്താന് മരുന്നിനായി ഇന്ത്യയ്ക്ക് മുന്പില് കൈ നീട്ടിയിരിക്കുന്നത്.
അതേസമയം, പാകിസ്താനില് 6,000 പേര്ക്കാണ് ഇതുവരെ കൊറോണ വൈറസ് ബാധ സ്ഥിരീകരിച്ചിരിക്കുന്നത്. നൂറിലധികം മരണങ്ങളും റിപ്പോര്ട്ട് ചെയ്തിട്ടുണ്ട്. കൊറോണ വൈറസ് വ്യാപനത്തിന്റെ പശ്ചാത്തലത്തില് തുടക്കം മുതല് തന്നെ കാര്യമായ പ്രതിരോധ പ്രവര്ത്തനങ്ങള് അവലംബിക്കാതെ ഇരുന്നതാണ് പാകിസ്താനില് രോഗികളുടെ എണ്ണം വര്ധിക്കാന് കാരണമായത്. രാജ്യത്ത് കൊറോണ രോഗികളുടെ എണ്ണം ആയിരം കടന്നതിന് ശേഷമാണ് പാകിസ്താനില് പ്രതിരോധ പ്രവര്ത്തനങ്ങള് ആരംഭിച്ചത്. കൊറോണ പ്രതിരോധ പ്രവര്ത്തനങ്ങള് വിശകലനം ചെയ്യാന് ചേര്ന്ന സാര്ക്ക് രാജ്യങ്ങളുടെ വീഡിയോ സമ്മേളനവും പാകിസ്താന് ബഹിഷ്കരിച്ചിരുന്നു. അതിനിടെ, സാമൂഹ്യ അകലം പാലിക്കണമെന്ന സര്ക്കാര് നിര്ദ്ദേശം വകവയ്ക്കാതെ ഒരു കൂട്ടം പുരോഹിതര് പ്രാര്ത്ഥനകളുമായി മുന്നോട്ട് പോകുമെന്ന് പരസ്യമായി പ്രഖ്യാപിച്ചിരിക്കുന്നതും പാക്കിസ്ഥാനില് പ്രതിസന്ധി സൃഷ്ടിക്കുന്നുണ്ട്. മതപുരോഹിതരുമായി പ്രധാനമന്ത്രി ഇമ്രാന് ഖാന് ചര്ച്ച നടത്താനിരിക്കെയാണ് നിലപാട് വ്യക്തമാക്കി പുരോഹിതര് തന്നെ നേരിട്ട് രംഗത്തു വന്നിരിക്കുന്നത്. ഇതോടെ പാക്കിസ്ഥാനിലെ സ്ഥിതി ഇനിയും വഷളാകുമെന്നാണ് വിലയിരുത്തല്.
അതിനിടെ, കോവിഡ് രോഗികളെ ചികിത്സിക്കാന് ഉപയോഗിക്കുന്ന ഹൈഡ്രോക്സി ക്ലോറോക്വിന് മലേഷ്യയ്ക്ക് നല്കാമെന്ന് ഇന്ത്യ സമ്മതിച്ചതായി റിപ്പോര്ട്ട്. മരുന്ന് നല്കണമെന്ന തങ്ങളുടെ ആവശ്യം ഇന്ത്യ അംഗീകരിച്ചുവെന്ന് മലേഷ്യന് വിദേശകാര്യ ഉപമന്ത്രി കമറുദ്ദീന് ജാഫര് റോയിട്ടേഴ്സിനോട് പറഞ്ഞു. മലേഷ്യയ്ക്ക് ഒരു ലക്ഷത്തോളം ഹൈഡ്രോക്സി ക്ലോറോക്വിന് ഗുളികകള് നല്കാനാണ് കേന്ദ്രസര്ക്കാര് അനുവാദം നല്കിയിരിക്കുന്നത്. ഏപ്രില് 14നാണ് ഇക്കാര്യത്തില് അനുവാദം നല്കിയതെന്നാണ് കമറുദ്ദീന് ജാഫര് പറയുന്നത്. ലഭ്യത കണക്കാക്കി ഇന്ത്യയില്നിന്ന് കൂടുതല് ടാബ്ലറ്റുകള് ഇറക്കുമതി ചെയ്യാന് ശ്രമിക്കുമെന്നും അദ്ദേഹം പറഞ്ഞു. എന്നാല് മലേഷ്യന് മന്ത്രിയുടെ പരാമര്ശത്തിന് ഇന്ത്യന് അധികൃതര് മറുപടി നല്കിയിട്ടില്ല.
ദക്ഷിണേഷ്യയില് ഏറ്റവുമധികം കോവിഡ് ബാധിതരുള്ള രാജ്യങ്ങളിലൊന്നാണ് മലേഷ്യ. 5,000 കേസുകളാണ് ഇതുവരെ റിപ്പോര്ട്ട് ചെയ്തിട്ടുള്ളത്. ഇതില് 82 പേര് ഇതുവരെ മരിച്ചു. മലേഷ്യയുമായി നിലവിലുള്ള നയതന്ത്ര ബന്ധത്തിലെ അസ്വാരസ്യങ്ങള് ഒഴിവായി മഞ്ഞുരുകുന്നുവെന്നതിന്റെ സൂചനയായാണ് ഈ നീക്കത്തെ കാണുന്നത്. 10 ലക്ഷം ടാബ്ലറ്റുകളാണ് മലേഷ്യ ഇന്ത്യയോട് ആവശ്യപ്പെട്ടതെന്നാണ് വിവരങ്ങള്.
അതേസമയം, കോവിഡ് 19ന് എതിരായ ഏറ്റവും മികച്ച പ്രതിരോധം ഹൈഡ്രോക്സി ക്ലോറോക്വിന് മരുന്നാണെന്ന് യുഎസ് പ്രസിഡന്റ് ഡോണാള്ഡ് ട്രംപ് കൂടി പറഞ്ഞതോടെയാണ് ഈ മരുന്നിന്റെ ആവശ്യം ആഗോളതലത്തില് തന്നെ കുതിച്ചുയര്ന്നത്. ലോകത്ത് ഏറ്റവുമധികം ഹൈഡ്രോക്സി ക്ലോറോക്വിന് ടാബ്ലറ്റുകള് ഉത്പാദിപ്പിക്കുന്ന രാജ്യമാണ് ഇന്ത്യ. ടെവ ഫാര്മസ്യൂട്ടിക്കല്സ്, ഐപിസിഎ ലബോറട്ടറീസ്, കാഡില ഹെല്ത്ത്കെയര് എന്നീ കമ്പനികളാണ് പ്രധാനമായും മരുന്ന് ഉത്പാദിപ്പിക്കുന്നത്. ആഗോള തലത്തില് ആവശ്യകത ഉയര്ന്നതിനെ തുടര്ന്ന് കമ്പനികള് ഉത്പാദനം വര്ധിപ്പിച്ചിട്ടുണ്ട്. രോഗവ്യാപനത്തിന്റെ പശ്ചാത്തലത്തില് നേരത്തെ അമേരിക്ക, ബ്രസീല് തുടങ്ങിയ മുപ്പതോളം രാജ്യങ്ങള് ഇന്ത്യയോട് മരുന്ന് ആവശ്യപ്പെട്ടിരുന്നു. ഇതിന് പിന്നാലെയാണ് പാകിസ്താനും മലേഷ്യയും ഇന്ത്യയോട് മരുന്ന് കയറ്റുമതി ചെയ്യണമെന്ന് അഭ്യര്ത്ഥിച്ചിരിക്കുന്നത്.
https://www.facebook.com/Malayalivartha