ഇന്ത്യയില്‍ കോവിഡ് ബാധിതരുടെ എണ്ണം 12,380 ആയി. മരണസംഖ്യ 414 ആയി ഉയര്‍ന്നു. 1488 പേര്‍ക്ക് രോഗം ഭേദമായിട്ടുണ്ട് എങ്കിലും. 24 മണിക്കൂറിനിടെ 37 മരണം റിപ്പോര്‍ട്ട് ചെയ്തത് ആശങ്ക പരത്തുകയാണ്. മഹാരാഷ്ട്രയില്‍ കോവിഡ് ബാധിതര്‍ മൂവായിരത്തിനോട് അടുത്തുകഴിഞ്ഞു. 232 പേര്‍ക്ക് കൂടി രോഗം സ്ഥിരീകരിച്ചതോടെ ആകെ രോഗികളുടെ എണ്ണം 2916 ആണ്. 187 ആണ് ഇവിടുത്ത ആകെ മരണസംഖ്യ. എങ്കിലും 295 പേര്‍ ഇതുവരെ രോഗമുക്തരായി എന്നത് ആശ്വാസം നല്‍കുന്നു. മുംബൈയിലാണ് രോഗവ്യാപനം കൂടുതല്‍. 114 മരണം റിപ്പോര്‍ട്ട് ചെയ്ത നഗരത്തില്‍ 1936 രോഗികളുണ്ട്. രാജസ്ഥാനിലും രോഗികളുടെ എണ്ണം ആയിരം കടന്നു. ഇതുവരെ 1023 പേര്‍ക്കു രോഗം സ്ഥിരീകരിച്ചു. മൂന്നു പേരാണ് മരിച്ചത്. മധ്യപ്രദേശിലെ ഇന്‍ഡോറില്‍ 159 പേര്‍ക്ക് കൂടി കോവിഡ് സ്ഥിരീകരിച്ചു. ഇതോടെ ജില്ലയിലെ ആകെ രോഗികളുടെ എണ്ണം 597 ആയി. മധ്യപ്രദേശിലാകെ 987 കോവിഡ് രോഗികളുണ്ട്.

കേരളത്തില്‍ ഇന്നലെ ഒരാള്‍ക്കു മാത്രമാണ് കോവിഡ് സ്ഥിരീകരിച്ചത്. രണ്ടു ദിവസങ്ങളിലായി 20 പേര്‍ രോഗമുക്തരായി. ഇപ്പോള്‍ 167 പേരാണു ചികിത്സയിലുള്ളത്. രോഗമുക്തരായത് 218 പേര്‍. സംസ്ഥാനത്തു നിരീക്ഷണത്തില്‍ കഴിയുന്നവരുടെ എണ്ണം ഒരു ലക്ഷത്തില്‍ താഴെയെത്തി. സംസ്ഥാനത്തെ തുടര്‍നടപടികളും ഇളവുകളും തീരുമാനിക്കാന്‍ ഇന്നു രാവിലെ പ്രത്യേക മന്ത്രിസഭാ യോഗം ചേരും.

അതേസമയം കോവിഡ് രോഗികള്‍ വര്‍ധിക്കുന്നതിനിടെ യുഎസില്‍ നിയന്ത്രണങ്ങളില്‍ ഇളവ് കൊണ്ടുവരികയാണ് പ്രസിഡന്റ് ഡോണള്‍ഡ് ട്രംപ്. രാജ്യത്ത് വൈറസ് അതിതീവ്രഘട്ടം അവസാനിച്ചുവെന്നും. അതിനാല്‍ ചില സംസ്ഥാനങ്ങളില്‍ നിയന്ത്രണങ്ങള്‍ പിന്‍വലിക്കുമെന്നുമാണ് പ്രഖ്യാപനം. ഇത് സംബന്ധിച്ച മാര്‍ഗനിര്‍ദേശങ്ങള്‍ വ്യാഴാഴ്ച പുറത്തിറക്കും. ഗവര്‍ണര്‍മാരുമായി വ്യാഴാഴ്ച സംസാരിക്കുമെന്ന് സൂചിപ്പിച്ച ട്രംപ്, കോവിഡ് ആഘാതത്തില്‍ നിന്നു രാജ്യം ഉടന്‍ കരകയറുമെന്ന പ്രതീക്ഷയും പങ്കുവച്ചു. രാജ്യത്ത് 24 മണിക്കൂറിനിടെ രണ്ടായിരത്തിഅഞ്ഞൂറിലധികം മരണം റിപ്പോര്‍ട്ടു ചെയ്തതിനു പിന്നാലെയാണ് നിയന്ത്രണങ്ങളില്‍ ഇളവ് നല്‍കാന്‍ ആലോചിക്കുന്നതായി ട്രംപ് വാര്‍ത്താസമ്മേളനത്തില്‍ അറിയിച്ചത്. ജനങ്ങള്‍ നിര്‍ദേശങ്ങള്‍ കൃത്യമായി പാലിക്കണമെന്ന് ചില പ്രതിഷേധങ്ങള്‍ ചൂണ്ടിക്കാട്ടി വൈറ്റ് ഹൗസ് ആവശ്യപ്പെട്ടു. കോവിഡ് കാലത്തും രാജ്യത്തെ ഭക്ഷ്യവിതരണം കൃത്യമായാണ് പോകുന്നതെന്നും ആശങ്കപ്പെടേണ്ട സാഹചര്യമില്ലെന്നും യുഎസ് ഭരണകൂടം വ്യക്തമാക്കി.

പക്ഷേ ആഗോള തലത്തില്‍ ഒരു ദിവസം ഒരു രാജ്യത്ത് രേഖപ്പെടുത്തുന്ന ഏറ്റവും വലിയ മരണസംഖ്യയാണ് ബുധനാഴ്ച യുഎസില്‍ രേഖപ്പെടുത്തിയത്. 24 മണിക്കൂറിനിടെ 2600ഓളം മരണമാണ് റിപ്പോര്‍ട്ട് ചെയ്തത്. ഏപ്രില്‍ 11ന്, 2108 പേര്‍ മരിച്ച യുഎസിലേതു തന്നെയായിരുന്നു ഇതുവരെ ഒരു ദിവസത്തെ ഏറ്റവും ഉയര്‍ന്ന മരണനിരക്ക്. ഇതോടെ യുഎസില്‍ കോവിഡ് ബാധിച്ച മരിച്ചവരുടെ എണ്ണം 28,529 ആയി ഉയര്‍ന്നു. ലോകത്ത് ഏറ്റവും കൂടുതല്‍ കോവിഡ് രോഗ ബാധിതരുമുള്ള യുഎസില്‍ 6,44,089 പേര്‍ക്കാണ് ഇതുവരെ രോഗം സ്ഥിരീകരിച്ചത്.