ലോകം വാക്സിന് പരീക്ഷണങ്ങളുമായി നെട്ടോട്ടമോടുകയാണ്. നിലവില്‍ കോവിഡ്-19 മഹാമാരിക്കെതിരെയുള്ള പ്രതിരോധമരുന്നിന് മാത്രമേ ലോകത്തെ സാധാരണ നിലയിലേക്ക് തിരിച്ചെത്തിക്കാന്‍ കഴിയൂവെന്നും മറ്റുവഴികളൊന്നും മുന്നിലില്ലെന്നും വ്യക്തമാക്കി ഐക്യരാഷ്ട്രസഭാ സെക്രട്ടറി ജനറല്‍ അന്റോണിയോ ഗുട്ടെറസും രംഗത്തുവരികയാണ്. അതിന് നാം എത്രനാള്‍ കാത്തിരിക്കണമെന്നും ഗുട്ടെറസ് വ്യക്തമാക്കുന്നുണ്ട്. 2020 അവസാനത്തിന് മുന്‍പ് അത് പ്രതീക്ഷിക്കാമെന്നാണ് അദേഹം പ്രതീക്ഷ പങ്കുവക്കുന്നത്. ഐക്യരാഷ്ട്രസഭാംഗങ്ങളായ അമ്പതോളം ആഫ്രിക്കന്‍ രാജ്യങ്ങളുമായി നടത്തിയ വീഡിയോ കോണ്‍ഫറന്‍സില്‍ അദ്ദേഹം ഇക്കാര്യം വ്യക്തമാക്കുന്നത്.

ലോകത്തെ ദശലക്ഷണക്കണക്കിന് ആളുകളുടെ ജീവന്‍ രക്ഷിക്കാനും ആഗോളസാമ്പത്തിക പ്രതിസന്ധിയെ മറികടക്കാനും ലോകത്തെ സാധാരണനിലയിലേക്കും എത്തിക്കാനുള്ള ഒരേയൊരു വഴിയാണ് കോവിഡിനെതിരെയുള്ള ഫലപ്രദവും സുരക്ഷിതവുമായ പ്രതിരോധമരുന്ന് എന്നാണ് അദ്ദേഹം അഭിപ്രായപ്പെട്ടത്. ഈ വര്‍ഷം അവസാനിക്കുന്നതിന് മുന്‍പ് കോവിഡ് വാക്‌സിന്‍ കണ്ടുപിടിക്കുന്നതിനായി ലോകരാജ്യങ്ങളുടെ കൂട്ടായ പരിശ്രമം വേണം, ഇതിന് എല്ലാ രാജ്യങ്ങളുടേയും സഹകരണം ഉണ്ടെന്ന് ഞങ്ങള്‍ക്ക് ഉറപ്പുവരുത്തേണ്ടതുണ്ട്.

പകര്‍ച്ചവ്യാധി പ്രതിരോധപ്രവര്‍ത്തനങ്ങള്‍ക്കായി ലോകരാജ്യങ്ങളില്‍ നിന്നും 2 ബില്യണ്‍ ഡോളര്‍ സമാഹരിക്കണമെന്ന് താന്‍ നേരത്തെ അഭ്യര്‍ഥിച്ചിരുന്നു. ഇത് പ്രകാരം 20 ശതമാനത്തോളം ഇതുവരെ സമാഹരിച്ചു. ലോകാരോഗ്യ സംഘടനയിലൂടെ 47 ആഫ്രിക്കന്‍ രാജ്യങ്ങളെ കോവിഡ് -19 പരീക്ഷണങ്ങളുമായി സജ്ജമാക്കാന്‍ ഐക്യരാഷ്ട്രസഭക്ക് കഴിഞ്ഞുവെന്നും അദ്ദേഹം പറഞ്ഞു.

നികുതി റിട്ടേണ്‍ സമര്‍പ്പിക്കാന്‍ ബിസിനസുകള്‍ക്ക് ഉഗാണ്ട കൂടുതല്‍ സമയം നല്‍കി. ജോലി നഷ്ടപ്പെട്ട തൊഴിലാളികള്‍ക്ക് അടിയന്തര വരുമാനം നല്‍കാനായി നമീബിയ നടപടികള്‍ സ്വീകരിച്ചു. ഈജിപ്ത് വ്യവസായങ്ങള്‍ക്കുള്ള നികുതി കുറച്ചു. ഇത്തരത്തില്‍ പകര്‍ച്ചവ്യാധിയുടെ അനന്തരഫലങ്ങള്‍ ലഘൂകരിക്കാനുള്ള രാജ്യങ്ങളുടെ പരിശ്രമങ്ങളേയും അദ്ദേഹം പ്രശംസിച്ചു.


അതേസമയം ലോകത്താകെ കൊവിഡ് ബാധിതരുടെ എണ്ണം 21 ലക്ഷത്തിലേക്ക് അടുക്കുന്നു. ജോണ്‍സ് ഹോപ്കിന്‍സ് യൂണിവേഴ്സിറ്റി കണക്ക് പ്രകാരം 185 രാജ്യങ്ങളിലായി 2,060,927 പേര്‍ക്ക് വൈറസ് സ്ഥിരീകരിച്ചു. വൈറസ് ബാധിച്ച് 134,354 പേരുടെ ജീവന്‍ നഷ്ടമായി. അല്‍പം ആശ്വാസം പകര്‍ന്ന് കൊവിഡ് പൂര്‍ണമായും ഭേദമായവരുടെ എണ്ണം അഞ്ച് ലക്ഷം പിന്നിട്ടു. 511,356 പേര്‍ ഇതുവരെ രോഗമുക്തരായി. ചൈനയിലാണ് കൂടുതല്‍ രോഗമുക്തരുള്ളത്, 78,311 പേര്‍. ജര്‍മനിയില്‍ 72,600 പേര്‍ക്ക് രോഗം ഭേദമായി. സ്പെയ്നില്‍ 70,853 പേരും അമേരിക്കയില്‍ 52,305 പേരും രോഗംമാറി ആശുപത്രിവിട്ടു.

ഏറ്റവും കൂടുതല്‍ രോഗബാധിതരും മരണവും അമേരിക്കയിലാണ്. രോഗം സ്ഥിരീകരിച്ച 637,359 പേരില്‍ 28,529 പേര്‍ മരിച്ചു. ബുധനാഴ്ച മാത്രം 2,459 മരണം റിപ്പോര്‍ട്ട് ചെയ്തു. ഇറ്റലിയില്‍ മരണം 21,600 കവിഞ്ഞു. രോഗികള്‍ 165,155 ആയി. സ്പെയ്നില്‍ രോഗബാധിതരുടെ എണ്ണം 1.9 ലക്ഷത്തിലേക്ക് അടുക്കുന്നു. മരണം 18,812 ആയി വര്‍ധിച്ചു. ഫ്രാന്‍സിലും മരണനിരക്ക് ദിനംപ്രതി ഉയരുകയാണ്. കഴിഞ്ഞ ദിവസം 1500ഓളം പേര്‍ മരിച്ചു. ആകെ ആള്‍നാശം 17,167 ആയി. ബ്രിട്ടണില്‍ മരണസംഖ്യ 13,000ത്തോളമായി. ജര്‍മനിയില്‍ 134,753 പേര്‍ക്ക് വൈറസ് സ്ഥിരീകരിച്ചു. 3804 പേര്‍ മരിച്ചു. ഇറാനിലും ബെല്‍ജിയത്തിലും മരണം അയ്യായിരത്തോടടുക്കുന്നു. നെതര്‍ലാന്‍ഡില്‍ മരണസംഖ്യ മൂവായിരവും കാനഡയില്‍ ആയിരവും കടന്നു. ഇന്ത്യയില്‍ 11,933 പേര്‍ക്കാണ് വൈറസ് സ്ഥിരീകരിച്ചിട്ടുള്ളത്. 392 പേര്‍ മരിച്ചു