മാരക വൈറസില്‍ സംഭവിച്ചത് എന്താണ്. ആരാണ് തുറന്നുവിട്ടത്. അല്ലെങ്കില്‍ ആരുടെ ലാബില്‍ നിന്നാണ് ചാടിയത്, ആരാണ് ലോകത്തിന് മുഴുവന്‍ പടര്‍ത്തിയത്. ഇന്നലെ വരെ ചൈന പറഞ്ഞ നുണക്കഥകളെന്ന് പറഞ്ഞ് അമേരിക്ക രംഗത്ത് വന്നത് ഒന്നും കാണാതെ ആയിരിക്കില്ല. മൈക്ക് പോംപിയോ ഷീ ചിങ്ങ് പിന്നും നേര്‍ക്കു നേര്‍ പോരാട്ടത്തിനിറങ്ങുന്നുവെങ്കില്‍ വ്യാപാരയുദ്ധത്തിന് ശേഷം ഇനി വൈറസ് യുദ്ധം കാണാന്‍ പോവുകയാണ് ലോകം. ചൈന പറഞ്ഞതൊന്നുമല്ല സത്യമെന്ന വിമര്‍ശനവുമായി നേരത്തെ അന്താരാഷ്ട്ര മാധ്യമങ്ങളടക്കം രംഗത്ത് വന്നിരുന്നു.

മരിച്ച കണക്കുകളില്‍ പുകമറ സൃഷ്ടിച്ച് ചൈന ആരെയാണ് പറ്റിക്കാന്‍ നോക്കുന്നത്. മരിച്ചതിനേക്കാള്‍ ചിതാഭസ്മക്കുടങ്ങള്‍ ചൈന കരുതിയത് പിന്നെ എന്തിന് വേണ്ടി. ആര് പറഞ്ഞതാണ് സത്യം. ലോകത്ത് കൊറോണ ബാധി്തരുടെ എണ്ണം 20 ലക്ഷത്തിലേക്ക് കടന്നതോടെ ചൈനക്കെതിരെ ആരോപണവുമായി അമേരിക്ക വീണ്ടും. കൊറോണ രോഗം ആദ്യം ബാധിച്ച ചൈന അവരുടെ മരണനിരക്കിനെ സംബന്ധിച്ച് നുണപറയുകയാണെന്നാണ് അമേരിക്കയുടെ ആരോപണം.

മൂവായിരത്തിനപ്പുറം ചൈനയിലെ മരണനിരക്ക് ഉയര്‍ന്നില്ലെന്ന വാദം ഒട്ടും വിശ്വസനീയമല്ലെന്നാണ് അമേരിക്ക പറയുന്നത്. നിലവില്‍ അമേരിക്കയിലെ മരണം മുപ്പതിനായിരത്തിലേക്ക് എത്തിയതിന് പുറകേയാണ് ട്രംപ് സംശയം പ്രകടിപ്പിച്ചത്. കഴിഞ്ഞ ഒറ്റ ദിവസം അമേരിക്കയില്‍ മരണസംഖ്യ 2600ന് മുകളിലായിരിക്കുകയാണ്. ഫ്രാന്‍സില്‍ 1438 പേരും ഇന്നലെ മാത്രം മരണമടഞ്ഞു. ഇറ്റലിയില്‍ ആകെ മരണസംഖ്യ ഇരുപത്തിയൊന്നായിരമായിരിക്കുകയാണ്. അമേരിക്കയില്‍ കൊറോണ ബാധ ഏറ്റവും രൂക്ഷമായ ന്യൂയോര്‍ക്ക് നഗരത്തിലെ മരണനിരക്കില്‍ നേരിയ കുറവ് വന്നതായാണ് പുതിയ വിവരം.

ഇതിനിടെ 77 ദരിദ്രരാജ്യങ്ങളുടെ കടം എഴുതിതള്ളാന്‍ ജി20 രാജ്യങ്ങളുടെ കൂട്ടായ്മ തീരുമാനമെടുത്തു.സൈനികര്‍ക്കിടയിലുള്ള കൊറോണ ബാധയില്‍ അമേരിക്കയ്ക്ക് പുറമേ ഫ്രഞ്ച് നാവിക സേനയിലെ 668 പേര്‍ക്ക് രോഗം ബാധിച്ചത് ആശങ്ക ഉണ്ടാക്കിയിരിക്കുകയാണ്. അമേരിക്ക അഫ്ഗാനിലും മറ്റ് പ്രദേശങ്ങളിലും അയച്ചിരിക്കുന്ന സൈനികരുടെ ആരോഗ്യരക്ഷക്കായി പ്രത്യേക സംവിധാനം ഒരുക്കിക്കഴിഞ്ഞു.