ലോകവ്യാപകമായി ദുരന്തം വിതച്ച കോവിഡ് പൊട്ടിപ്പുറപ്പെട്ട ചൈനയിലെ വുഹാന്‍ പ്രവശ്യയില്‍ വൈറസ് ബാധിച്ച് മരിച്ചവരുടെ എണ്ണത്തില്‍ ചൈനീസ് സര്‍ക്കാര്‍ തിരുത്തല്‍ വരുത്തുന്നു. സര്‍ക്കാര്‍ നിലവില്‍ പുറത്തുവിട്ട കണക്കിന്റെ 50 ശതമാനം വര്‍ധനവാണ് പുതിയ കണക്കിലുള്ളത്. പുതിയ കണക്കിന്റെ അടിസ്ഥാനത്തില്‍ വുഹാനില്‍ മാത്രം 3,869 പേര്‍ മരണമടഞ്ഞിട്ടുണ്ട്. തെറ്റായി റിപ്പോര്‍ട്ട് ചെയ്തുവെന്നും പഴയ കണക്കില്‍ പലതും വിട്ടുപോയിട്ടുണ്ടെന്നുമാണ് ഇതിന് അധികൃതര്‍ നല്‍കുന്ന വിശദീകരണം.

നേരത്തെ വുഹാനില്‍ 1,290 പേര്‍ കോവിഡ് ബാധിച്ച് മരിച്ചിട്ടുണ്ടെന്നാണ് സാമൂഹ്യമാധ്യമങ്ങള്‍ വഴി സര്‍ക്കാര്‍ അറിയിച്ചത്. ഇതോടെ വെള്ളിയാഴ്ച പുറത്തുവിട്ട ഔദ്യോഗിക കണക്കുകളുടെ അടിസ്ഥാനത്തില്‍ ദേശീയ മരണ സംഖ്യ 39 ശതമാനമായി ഉയര്‍ന്ന് 4,632 ആയി.