ഔദ്യോഗിക കണക്കു പ്രകാരം ലോകമാകെ കോവിഡ് മരണം 1.86 ലക്ഷം കവിഞ്ഞു. എന്നാല്‍ പല രാജ്യങ്ങളും ആശുപത്രിയിലെ മരണങ്ങള്‍ മാത്രമേ കണക്കില്‍പെടുത്താറുള്ളു. കോവിഡ് പരിശോധന പരിമിതമായതായതിനാല്‍ മരണസംഖ്യയെകുറിച്ച് കൃത്യമായ കണക്കില്ലാതായി. 

24 മണിക്കൂറിനിടെ യുഎസില്‍ 1738 പേരാണ് മരണമടഞ്ഞത്. ആകെ മരണം 46,500 കവിഞ്ഞു. ലോകരാജ്യങ്ങളില്‍ ഏറ്റവും ഉയര്‍ന്ന മരണനിരക്കാണിത്. മഞ്ഞുകാലത്തു മരണം വര്‍ധിക്കുമെന്ന ആരോഗ്യ വിദഗ്ധരുടെ മുന്നറിയിപ്പ് യുഎസ് പ്രസിഡന്റ് ഡോണള്‍ഡ് ട്രംപ് തള്ളി. രോഗം വന്നാലും ചെറിയ തോതിലാകുമെന്നും നിയന്ത്രണ വിധേയമായിരിക്കുമെന്നും ട്രംപ് അവകാശപ്പെട്ടു.

കോവിഡ് വാക്‌സിന്‍ വികസിപ്പിക്കുന്ന ഗവേഷക സംഘത്തിന്റെ തലവനായ ഡോ. റിക് ബ്രൈറ്റിനെ ട്രംപ് പുറത്താക്കി. ബയോമെഡിക്കല്‍ അഡ്വാന്‍സ്ഡ് റിസര്‍ച് ആന്‍ഡ് ഡവലപ്‌മെന്റ് അതോറിറ്റി ഡയറക്ടര്‍ കൂടിയായ ഡോ. റിക് ബ്രൈറ്റ് മലേറിയയുടെ മരുന്നായ ക്ലോറോക്വിന്‍ കോവിഡ് ചികിത്സയ്ക്ക് ഉപയോഗിക്കുന്നതിനെ എതിര്‍ത്തിരുന്നയാളാണ്.

യുകെ-യില്‍ ബുധനാഴ്ച 759 പേര്‍ കൂടി മരണമടഞ്ഞപ്പോള്‍ ബ്രിട്ടന്‍, ഏറ്റവുമധികം മരണം സംഭവിച്ച യൂറോപ്പിലെ നാലാമത്തെ രാജ്യമായി. ആകെ മരണം 18,000 കവിഞ്ഞു.

ഈ വര്‍ഷം മുഴുവന്‍ ബ്രിട്ടനില്‍ സാമൂഹിക അകലം പാലിക്കേണ്ടി വരുമെന്ന് സര്‍ക്കാരിന്റെ ഉപദേഷ്ടാവ് പ്രഫ. ക്രിസ് വിറ്റി. കോവിഡ് ബാധിച്ച് ബ്രിട്ടനില്‍ 420 ലേറെ ഇന്ത്യക്കാര്‍ മരിച്ചെന്ന് സര്‍ക്കാര്‍ കണക്ക്. ബ്രിട്ടനിലെ ന്യൂനപക്ഷങ്ങള്‍ക്കിടയില്‍ കൂടുതല്‍ മരണം ഇന്ത്യന്‍ സമൂഹത്തിലാണ്.

ആഫ്രിക്ക : റുവാണ്ടയിലും യുഗാണ്ടയിലും കോവിഡ് പരിശോധനയ്ക്കുള്ള മൊബൈല്‍ ലാബുകള്‍ ജര്‍മനി നല്‍കി.

ഗ്രീസ് : ലെസ്‌ബോസ് ദ്വീപില്‍ അഭയാര്‍ഥി ക്യാംപുകളില്‍ ക്വാറന്റീന്‍ ലംഘിച്ചതിനു 2 പേരെ പൊലീസ് വെടിവച്ചിട്ടു. പരുക്ക് ഗുരുതരമല്ല.

ജപ്പാന്‍ : നാഗസാക്കി തീരത്തുള്ള ഇറ്റാലിയന്‍ വിനോദസഞ്ചാരക്കപ്പലില്‍ 14 പേര്‍ക്കു കൂടി രോഗബാധ. ഇതോടെ കപ്പലില്‍ 48 രോഗികളായി. കപ്പലില്‍ 623 ജീവനക്കാര്‍ മാത്രമേയുള്ളു.

ദക്ഷിണ കൊറിയ : ജിഡിപിയില്‍ 1.4 % ഇടിവ്. 2008 നുശേഷം ഇത്രയും തകര്‍ച്ച ഇതാദ്യം.

കാനഡ : കോവിഡ് പ്രതിരോധത്തിനു സൈന്യത്തിന്റെ സഹായം തേടി ഒന്റാറിയോ, ക്യുബെക് പ്രവിശ്യകള്‍. കാനഡയില്‍ ആകെ മരണം 2,000 കവിഞ്ഞു. പകുതിയും അഭയകേന്ദ്രങ്ങളിലെ വയോധികരാണ്.

സ്‌പെയിന്‍: 24 മണിക്കൂറിനിടെ 440 മരണം. ആകെ മരണം 22,000 കവിഞ്ഞു. 2.13 ലക്ഷം രോഗികള്‍.

പാക്കിസ്ഥാന്‍ : ഇന്നലെ മാത്രം 765 രോഗികള്‍. ആകെ 10,000 കവിഞ്ഞു. 5 ദിവസത്തിനിടെ രോഗവ്യാപനം വര്‍ധിച്ചു.

സിംഗപ്പൂര്‍ : 24 മണിക്കൂറിനിടെ 1,037 പുതിയ രോഗികള്‍. ആകെ രോഗികള്‍ 11,178. ഡോര്‍മിറ്ററികളില്‍ താമസിച്ചിരുന്ന കുടിയേറ്റക്കാരാണു രോഗികളിലേറെയും.

മലേഷ്യ : 5,500 ലേറെ രോഗികള്‍. യാത്രാവിലക്ക് ഉള്‍പ്പെടെയുള്ള നിയന്ത്രണങ്ങള്‍ മേയ് 12 വരെ നീട്ടി.

ലോകമാകെ രോഗികള്‍ 26,76,470, മരണം 1,87,460, രോഗമുക്തര്‍ 7,35,367

ഏറ്റവുമധികം മരണം സംഭവിച്ച 10 രാജ്യങ്ങള്‍, ബ്രാക്കറ്റില്‍ രോഗബാധിതര്‍

1. യുഎസ്: 48,358 (8,53,972)

2. ഇറ്റലി: 25,549 (1,89,973)

3. സ്‌പെയിന്‍: 22,157 (2,13,024)

4. ഫ്രാന്‍സ്: 21,340 (1,59,877)

5. ബ്രിട്ടന്‍: 18,738 (1,38,078)

6. ബല്‍ജിയം: 6,490 (42,797)

7. ഇറാന്‍: 5,481 (87,026)

8. ജര്‍മനി: 5,354 (1,51,175)

9. ചൈന: 4,632 (82,798)

10.നെതര്‍ലന്‍ഡ്‌സ്: 4,177 (35,729)