കള്ളന്‍ കപ്പലില്‍ തന്നെ. അത്ര പെട്ടൊന്നൊന്നും പോകില്ല. ഇത് ഒരു തന്ത്രം മാത്രമെന്ന് ഒരിക്കല്‍ കൂടി തെളിയിക്കുകയാണ് കിം. അല്‍ഭുതങ്ങളുടെ യാത്രകള്‍ കിമ്മിന് ഒരു പുതുമയല്ലല്ലോ. എല്ലാത്തിലും വ്യത്യസ്തന്‍. ഏതായാലും ഉത്തര കൊറിയയിലെ കമ്യൂണിസ്റ്റ് ഏകാധിപതി കിം ജോങ് ഉന്‍ വീണ്ടും പൊതുവേദിയില്‍. ഉത്തര കൊറിയന്‍ തലസ്ഥാനമായ പ്യോങ്യാങ്ങിനു സമീപം സന്‍ചോണിലെ ഒരു വളം ഫാക്ടറിയുടെ ഉദ്ഘാടനത്തില്‍ വെള്ളിയാഴ്ച കിം പങ്കെടുത്തെന്നാണ് സൂചന പുറത്തുവരുമ്പോള്‍ ഇതെല്ലാം ആ ബുദ്ധിശാലിയായ കുറുക്കന്റെ തന്ത്രമെന്ന് തന്നെ കരുതാം.

കഴിഞ്ഞ രണ്ടാഴ്ചയിലേറേയായി കിമ്മിന്റെ ആരോഗ്യസ്ഥിതിയെക്കുറിച്ചു പരക്കുന്ന അഭ്യൂഹങ്ങള്‍ക്കിടെയാണ് പൊതുവേദിയിലെ പ്രത്യക്ഷപ്പെടല്‍. വെള്ളിയാഴ്ച നടന്ന പരിപാടിയിലേക്ക് കിം വന്നപ്പോള്‍ പങ്കെടുത്തവരെല്ലാം ആഹ്ലാദത്തോടെ ഹര്‍ഷാരവം മുഴക്കി. തീര്‍ന്നില്ല ആവേശം കൂട്ടാന്‍ കിം വളം ഫാക്ടറി പരിശോധിക്കുകയും ഉല്‍പാദന പ്രക്രിയകളെക്കുറിച്ച് വിശദീകരിക്കുകയും ചെയ്തുവെന്നും റിപ്പോര്‍ട്ടുകള്‍ ബലപ്പെടുന്നു.

ആധുനിക ഫോസ്ഫറ്റിക് വളം ഫാക്ടറി നിര്‍മിച്ചുവന്ന വാര്‍ത്ത കേട്ടാല്‍ തന്റെ മുത്തച്ഛന്‍ കിം ഇല്‍ സുങ്ങും പിതാവ് കിം ജോങ് ഇല്ലും വളരെയധികം സന്തോഷിക്കുമെന്ന് കിം വൈകാരികമായി പ്രതികരിച്ച ചടങ്ങില്‍ അടുത്ത അവകാശിയെന്ന് വരെ വിശേഷിപ്പിക്കപ്പെട്ട കിമ്മിന്റെ സഹോദരി കിം യോ ജാങ് ഉള്‍പ്പെടെയുള്ളവരും പങ്കെടുത്തിരുന്നു. ഏതായാലും ഇതുവരെ സിനിമയിലൊക്കെ കാണുന്ന പോലെ കിമ്മിന് ഡ്യൂപ്പുണ്ടെന്ന് ആരും ്അവകാശപ്പെട്ട് രംഗത്ത് വന്നിട്ടില്ല. അങ്ങനെയെങ്കില്‍ കഴിഞ്ഞ ദിവസങ്ങളിലെ വാര്‍ത്തകള്‍ അമേരിക്ക കെട്ടിചമച്ചതോ, ഉത്തര കൊറിയയുടെ മൗനം എന്തിനായിരുന്നു. കാര്യങ്ങള്‍ അന്വേഷിച്ച് പോയ ചൈനീസ് സംഘം എന്തുകൊണ്ട് ഒന്നും പറഞ്ഞില്ല. പതിവ് പോലെ പുകമറ തന്നെ. ഏപ്രില്‍ 15ന് , മുത്തച്ഛനും രാഷ്ട്രപിതാവുമായ കിം ഇല്‍ സുങ്ങിന്റെ ജന്മവാര്‍ഷികച്ചടങ്ങില്‍ കിമ്മിനെ കാണാതിരുന്നതു ചൂണ്ടിക്കാട്ടിയാണ് കിമ്മിന്റെ നില അതീവഗുരുതരമാണെന്നും മസ്തിഷ്‌കമരണം സംഭവിച്ചെന്നും വരെയുള്ള കാര്യങ്ങള്‍ ആദ്യം പുറത്ത് വന്നത്. 11ന് വ്യോമതാവളം സന്ദര്‍ശിച്ചു യുദ്ധവിമാന പരിശീലനം കണ്ടയാള്‍ 15നു സുപ്രധാന ചടങ്ങിനു വരാതിരുന്നതിനു പിന്നില്‍ ആരോഗ്യപ്രശ്‌നങ്ങളാണെന്നായിരുന്നു വാദം.

എന്നാല്‍ ഇക്കാര്യം ദക്ഷിണ കൊറിയയും ചൈനയും തള്ളിയിരുന്നു. കിം പൊതുവേദിയില്‍ വരാത്തത് കോവിഡ് പിടിപെടാതിരിക്കാനുള്ള മുന്‍കരുതലാകാമെന്ന് ദക്ഷിണ കൊറിയന്‍ മന്ത്രി പറഞ്ഞിരുന്നു. മുത്തച്ഛന്റെ ജന്മവാര്‍ഷികച്ചടങ്ങില്‍ കിം പങ്കെടുക്കാത്തതും ഇതുകൊണ്ടാകുമെന്നാണു ദക്ഷിണ കൊറിയന്‍ മന്ത്രി കിം യൂണ്‍ ചുള്‍ പറഞ്ഞത്. എനിക്ക് കിമ്മിന്റെ ആരോഗ്യത്തെപ്പറ്റി നന്നായി അറിയാം, പക്ഷേ ഞാന്‍ ഒന്നും പറയില്ലെന്നായിരുന്നു യുഎസ് പ്രസിഡന്റ് ഡോണള്‍ഡ് ട്രംപിന്റെ പ്രതികരണം. എന്തായാലും ട്രംപ് പറയാതിരുന്നത് നേരിട്ട് വന്ന് കിം തെളിയിച്ചിരിക്കുന്നു.