കോവിഡ് മുക്തരാജ്യമെന്ന് പ്രഖ്യാപിച്ച് സ്‌ലൊവീനിയ. പകര്‍ച്ചവ്യാധികളെ പ്രതിരോധിക്കാന്‍ യൂറോപ്പില്‍ ഏറ്റവും മികച്ച സാഹചര്യമുള്ള രാജ്യമാണ് സ്‌ലൊവീനിയ. ഇത് കോവിഡ് മഹാമാരിയെ തുടച്ചുനീക്കാന്‍ തങ്ങളെ പ്രാപ്തരാക്കിയെന്ന് പ്രധാനമന്ത്രി ജാനസ് ജാന്‍സ പറഞ്ഞു. രണ്ടു മാസത്തെ ലോക്ഡൗണിന് ശേഷമാണ് സ്‌ലൊവീനിയയെ കോവിഡ് മുക്ത രാഷ്ട്രമായി പ്രഖ്യാപിച്ചത്. 

എന്നാല്‍ പുതിയ കോവിഡ് കേസുകള്‍ റിപ്പോര്‍ട്ട് ചെയ്യപ്പെട്ടിട്ടും വൈറസ് മുക്ത രാജ്യമെന്ന് പ്രഖ്യാപിച്ച് അതിര്‍ത്തികള്‍ തുറന്നിരിക്കുകയാണ് സ്‌ലൊവീനിയ.
ഇറ്റലിയുമായി അതിര്‍ത്തി പങ്കിടുന്ന സ്‌ലൊവീനിയയില്‍ 20 ദശലക്ഷം ജനങ്ങളുണ്ട്. രാജ്യത്ത് ഇതുവരെ 1,500 കോവിഡ് വൈറസ് കേസുകളും 103 മരണങ്ങളും റിപ്പോര്‍ട്ട് ചെയ്തിട്ടുണ്ട്.പുതിയ കോവിഡ് കേസുകളുടെ തോത് കുറഞ്ഞതോടെ എല്ലാ യൂറോപ്യന്‍ യൂനിയന്‍ പൗരന്മാര്‍ക്കും അതിര്‍ത്തി കടന്നുള്ള യാത്രക്ക് സര്‍ക്കാര്‍ അനുമതി നല്‍കി. കോവിഡ് വൈറസ് പടരുന്ന സാഹചര്യം നിലനില്‍ക്കുന്നതിനാല്‍, രാഷ്ട്രം പ്രത്യേകമായി കൈകൊണ്ട നടപടികള്‍ പ്രാബല്യത്തില്‍ തുടരുമെന്നും പ്രധാന മന്ത്രി പ്രസ്താവനയിലൂടെ അറിയിച്ചു.
മേയ് 23 മുതല്‍ ഫുട്ബാളും മറ്റ് കായിക ടീമുകളുടെ മത്സരങ്ങളും പുനഃരാരംഭിക്കാമെന്നും അറിയിപ്പുണ്ട്.
പൊതു ഇടങ്ങളില്‍ കൂട്ടംകൂടി നില്‍ക്കുന്നതിനുള്ള നിരോധനം നിലനില്‍ക്കും. സാമൂഹിക അകലം പാലിക്കല്‍ നിയമങ്ങളും പൊതു ഇടങ്ങളില്‍ മാസ്‌ക് ധരിക്കുന്നതും നിര്‍ബന്ധമാണ്.സ്‌ലൊവീനിയ പകര്‍ച്ചവ്യാധി മുക്തമെന്ന് പ്രഖ്യാപിച്ചെങ്കിലും വൈറസ് ഭീഷണിയില്‍ തന്നെയാണെന്ന് വിദഗ്ധര്‍ പറയുന്നു. മറ്റൊരു യൂറോപ്യന്‍ രാജ്യവും ഇതുവരെ പകര്‍ച്ചവ്യാധി അവസാനിച്ചതായി പ്രഖ്യാപിച്ചിട്ടില്ല.