2017 ല്‍ പ്രസിഡന്റ് സ്ഥാനം ഒഴിഞ്ഞതിനു ശേഷം പൊതുരംഗത്ത് വളരെ കുറച്ചുമാത്രമാണ് ഒബാമ പ്രത്യക്ഷപ്പെടുന്നത്. എന്നാല്‍ അടുത്തിടെയായി ഒബാമ പ്രത്യക്ഷപ്പെടുന്നുണ്ട്. രാഷ്ട്രീയ എതിരാളി ട്രംപ് തന്നെയാണ് ലക്ഷ്യമെങ്കിലും പറയുന്നതില്‍ നിരവധി കാര്യങ്ങളുണ്ട്. കോവിഡ് പ്രതിരോധം തുടങ്ങി വംശീയ പ്രശ്‌നം വരെ. കൊവിഡ് 19 സൃഷ്ടിച്ച പ്രതിസന്ധി അമേരിക്കയിലെ വംശീയ അസമത്വത്തിന് കൂടി അടിവരയിടുന്നതാണെന്ന് മുന്‍ അമേരിക്കന്‍ പ്രസിഡന്റ് ബരാക് ഒബാമ വെറുതെ പറഞ്ഞതല്ല. വരാന്‍ പോകുന്ന തിരഞ്ഞെടുപ്പ് മാത്രമല്ല പലതും വ്യക്തമായി പഠിച്ചിട്ട് തന്നെയാണ്.

ജോഗിങ്ങിന് പോയപ്പോള്‍ 25 കാരനായ അഹമ്മദ് അര്‍ബറിയെ വെടിവെച്ച് കൊന്നത് ഇതിന് ഉദാഹരണമാണെന്ന് ഒബാമ കൂട്ടിച്ചേര്‍ത്തത് ട്രംപിനുള്ള ചുട്ട മറുപടി കൂടിയാണ്. ഫെബ്രുവരി 23നായിരുന്നു കറുത്ത വംശജനായ അഹമ്മദ് അര്‍ബെറിയെ കൊലപ്പെടുത്തിയത്. കൊവിഡ് പോലൊരു രോഗം കറുത്ത വംശജര്‍ ചരിത്രപരമായി ഈ രാജ്യത്ത് നേരിടേണ്ടി വന്ന അസമത്വങ്ങളിലേക്കും വിരല്‍ ചൂണ്ടുന്നുവെന്ന് ഒബാമ അഭിപ്രായപ്പെട്ടു. ഞങ്ങളുടെ കമ്മ്യൂണിറ്റികളില്‍ കൊവിഡ് 19 വലിയ പ്രശ്നങ്ങളാണ് സൃഷ്ടിച്ചിരിക്കുന്നത്. ഒരു കറുത്ത വംശജന്‍ ജോഗിങ്ങിന് പോകുമ്പോള്‍ ചില ആളുകള്‍ക്ക് അവരെ തടയണമെന്ന് തോന്നിയാല്‍ ഉടന്‍ അത് ചെയ്യാം. അവര്‍ക്ക് ഞങ്ങളെ നിര്‍ത്താനും ചോദ്യം ചെയ്യാനും വെടിവെക്കാനും പറ്റുമെന്ന് തോന്നുന്നു. ഒബാമ പറഞ്ഞു അര്‍ബറിയുടെ പേര് പ്രതിപാദിക്കാതെയായിരുന്നു ഒബാമയുടെ പ്രതികരണം.

അമേരിക്കയില്‍ ഇപ്പോള്‍ നേരിടുന്ന കടുത്ത ആരോഗ്യ പ്രതിസന്ധിയേയും ഒബാമ രൂക്ഷമായി വിമര്‍ശിച്ചു. ഉത്തരവാദിത്തപ്പെട്ട സ്ഥാനങ്ങളില്‍ ഇരിക്കുന്ന പലര്‍ക്കും തങ്ങള്‍ എന്താണ് ചെയ്യുന്നത് എന്ന് പോലും അറിയില്ല. ആ വിമര്‍ശനങ്ങളിലും ഇപ്പോഴത്തെ സാഹചര്യത്തില്‍ കഴമ്പുണ്ട്്. ജര്‍മനിയടക്കമുള്ള ലോകരാജ്യങ്ങള്‍ കോവിഡിനെ തുരത്താന്‍ വലിയ ശ്രമങ്ങള്‍ നടത്തുമ്പോള്‍ അമേരിക്കയില്‍ വൈറസ് പ്രതിരോധ പ്രവര്‍ത്തനങ്ങള്‍ക്ക് മേല്‍നോട്ടം വഹിക്കുന്ന ഉദ്യോഗസ്ഥര്‍ക്കെതിരെയും വിമര്‍ശനമുന്നയിച്ചിരിക്കുകയാണ് ഒബാമ.
പ്രതിരോധപ്രവര്‍ത്തനങ്ങളുടെ ചുമതലയുള്ള ഉന്നത ഉദ്യോഗസ്ഥരില്‍ പലരും പ്രവര്‍ത്തിക്കുന്നില്ലെന്നു മാത്രമല്ല അതിന് ഉത്തരവാദപ്പെട്ട ആളാണെന്ന് ഭാവിക്കുകപോലും ചെയ്യുന്നില്ലെന്ന് ഒബാമ കുറ്റപ്പെടുത്തി. കൊറോണവൈറസിനെ ഫലപ്രദമായി പ്രതിരോധിക്കാന്‍ ട്രംപിന് സാധിക്കാത്തതിനെ ഒബാമ നേരത്തെയും വിമര്‍ശിച്ചിരുന്നു. 'മഹാദുരന്തം' എന്നാണ് കോവിഡ് പ്രതിസന്ധിയെ പ്രസിഡന്റ് ട്രംപ് കൈകാര്യം ചെയ്യുന്നതിനെ മെയ് ആദ്യം ഒബാമ വിശേഷിപ്പിച്ചത്. ലോകത്ത് ഏറ്റവുമധികം കൊറോണവൈറസ് കേസുകള്‍ യുഎസിലാണ് റിപ്പോര്‍ട്ട് ചെയ്തിട്ടുള്ളത്. കോവിഡ് വ്യാപനം ആദ്യഘട്ടത്തില്‍ ഫലപ്രദമായി തടയാന്‍ സാധിക്കാത്തതില്‍ ട്രംപിനെതിരെ വിവിധ ഭാഗങ്ങളില്‍ നിന്ന് വിമര്‍ശനമുയര്‍ന്നിരുന്നു.