നാളുകളേറെയായി നിഗൂഢതകള്‍ നിറച്ചുവെച്ച് ലോകത്തെ കബിളിപ്പിക്കലാണ് ചൈനയുടെ പണി.ഇത് മറ്റാരുമല്ല സാക്ഷാല്‍ അമേരിക്കയുടെ കണ്ടെത്തലാണ് .ഒരു വര്‍ഷത്തോളം നീണ്ടു നിന്ന വ്യാപാര യുദ്ധം അവസാനിപ്പിക്കാന്‍ ഇരു രാജ്യങ്ങളും തയ്യാറാകുന്ന വേളയിലാണ് മഹാമാരിയെന്നു വിശേഷിപ്പിക്കപ്പെടുന്ന തരത്തില്‍ കോവിഡ് 19 ലോകത്താകമാനം പടര്‍ന്ന് പന്തലിച്ചത് .ഇതിന്റെ ഉത്ഭവ സ്ഥലം ചൈനയിലെവുഹാന്‍ നഗരമായതിനാലും ,നിലവില്‍ രോഗികളുടെ എണ്ണത്തിലും മരണനിരക്കിലും ചൈന പുറത്തു വിടുന്ന കണക്കുകളില്‍ പന്തികേടുള്ളതിനാലും അമേരിക്കയുടെ സംശയങ്ങള്‍ ന്യായമാണ് എന്ന് തന്നെയാണ് ലോകരാജ്യങ്ങള്‍ അനുമാനിക്കുന്നത് .അതിനാല്‍ തന്നെ ചൈനയുടെ നടപടികള്‍ക്കുമേല്‍ അന്വേഷണം വേണമെന്ന നിലപാടിലേക്ക് കൂടുതല്‍ രാജ്യങ്ങള്‍ എത്തിച്ചേര്‍ന്നിരിക്കുകയാണ് . ചൈനയുടെ സ്വാര്‍ത്ഥ താല്പര്യങ്ങള്‍ ഏതൊക്കെയാണ് എന്ന കാര്യം ഇപ്പോള്‍ മറ്റെന്തിനേക്കാളും പ്രാധാന്യത്തോടെ ലോകരാജ്യങ്ങള്‍ അറിയാന്‍ ശ്രമിച്ചുകൊണ്ടിരിക്കുകയാണ് .ആഗോള മഹാമാരിയായ കൊറോണ വൈറസിന്റെ ഉത്ഭവവുമായി ബന്ധപ്പെട്ട കാര്യങ്ങളില്‍ വ്യക്തത വരുത്തണമെന്ന ആവശ്യത്തിനോട് അനുകൂല നിലപാട് സ്വീകരിച്ച് ഇന്ത്യ മുന്നോട്ട് നീങ്ങുമ്പോള്‍ അത് ചൈനയെ സംബന്ധിച്ചടത്തോളം ഓര്‍ക്കാമ്പുറത്തു കിട്ടിയ ഇരുട്ടടിപോലെയാണ് .

സാര്‍സ് കോവ്-2 വൈറസ് മൃഗങ്ങളില്‍ നിന്ന് മനുഷ്യരിലേക്ക് പകര്‍ന്നതാണെന്ന ലോകാരോഗ്യ സംഘടനയുടെ പ്രതികരണത്തില്‍ വ്യക്തത വരുത്തണമെന്ന് ലോകരാജ്യങ്ങള്‍ ആവശ്യപ്പെട്ടിരുന്നു. ഇക്കാര്യത്തില്‍ ഇന്ത്യയുടെ പിന്തുണ നിര്‍ണായകമാകുമെന്നാണ് വിലയിരുത്തല്‍.ലോകാരോഗ്യ സംഘടനയുടെ വാര്‍ഷിക യോഗം നാളെ ആരംഭിക്കാനിരിക്കെ കൊറോണ വിഷയത്തില്‍ സുതാര്യത ആവശ്യപ്പെട്ട് നിരവധി രാജ്യങ്ങള്‍ രംഗത്തെത്തിയിരുന്നു. ഇതിന്റെ ഭാഗമായി ബംഗ്ലാദേശ്, കാനഡ, റഷ്യ, ഇന്തോനേഷ്യ, ദക്ഷിണാഫ്രിക്ക, തുര്‍ക്കി, യുകെ, ജപ്പാന്‍ എന്നിവയുള്‍പ്പെടെ 62 രാജ്യങ്ങളുടെ പിന്തുണയോടെ കരട് പ്രമേയം അവതരിപ്പിക്കാനുള്ള ശ്രമങ്ങളാണ് നടക്കുന്നത്. ഇതിന് ഇന്ത്യയുടെ പിന്തുണ ലഭിക്കുമെന്നാണ് വ്യക്തമായിരിക്കുന്നത്.ഇതോടു കൂടി ചൈന കൂടുതല്‍ ഒറ്റപ്പെടുന്ന തരത്തിലേക്ക് നീങ്ങിക്കൊണ്ടിരിക്കുകയാണ് എന്നതും വ്യക്തമാകുന്നു

ലോകാരോഗ്യ സംഘടനയുടെ ഡയറക്ടര്‍ ജനറല്‍ ടെഡ്രോസ് അദാനോം ഗബ്രിയാസിസ് തുടക്കം മുതല്‍ ചൈനക്ക് അനുകൂല നിലപാടാണ് സ്വീകരിച്ചത്. ലോകാരോഗ്യ സംഘടന പക്ഷപാതപരമായ നിലപാട് സ്വീകരിച്ചതിനെതിരെ അമേരിക്ക ഉള്‍പ്പെടെയുള്ള ലോക രാജ്യങ്ങള്‍ രംഗത്തെത്തിയിരുന്നു. ഇതിനു പിന്നാലെ ലോകാരോഗ്യ സംഘടനക്ക് നല്‍കി വന്നിരുന്ന ധനസഹായം അമേരിക്ക താത്ക്കാലികമായി നിര്‍ത്തിവെച്ചിരുന്നു. മുന്‍ എത്യോപ്പിയന്‍ മന്ത്രിയായിരുന്ന ഗബ്രിയാസിസ് 2017ല്‍ ചൈനയുടെ പിന്തുണയോടെയാണ് തിരഞ്ഞെടുക്കപ്പെട്ടത് .എന്നാല്‍ ഇനി ഇത്തരം പ്രവണതകളുടെ തുടര്‍ച്ച സംഘടന
കൈകൊണ്ടാല്‍ അത് ലോകരാജ്യങ്ങളുടെ വിമര്‍ശനത്തിനിടയാക്കുമെന്നു വ്യക്തമായി കഴിഞ്ഞിരിക്കുകന്നു