കൊറോണ വൈറസ് വ്യാപനം കൈകാര്യം ചെയ്തതില്‍ ചൈന സ്വീകരിച്ച നടപടികളെ ഇതാദ്യമായി ലോകവേദിയില്‍ പ്രതിരോധിച്ച് ചൈനീസ് പ്രസിഡന്റ് ഷീ ജിന്‍പിങ്. വൈറസ് പൊട്ടിപ്പുറപ്പെട്ടപ്പോള്‍ ചൈന സുതാര്യതയോടെയും തങ്ങളാല്‍ കഴിയുന്ന രീതിയിലും മറ്റ് രാജ്യങ്ങളെ സഹായിച്ചെന്ന് അദ്ദേഹം വ്യക്തമാക്കി. ലോകാരോഗ്യ സംഘടനയുടെ ലോകാരോഗ്യ അസംബ്ലിയുടെ ഉദ്ഘാടന സമ്മേളനത്തില്‍ സംസാരിക്കുകയായിരുന്നു അദ്ദേഹം.

വൈറസ് വ്യാപനത്തെ നേരിടാന്‍ ലോകാരോഗ്യ സംഘടന നടത്തിയ പ്രവര്‍ത്തനങ്ങളെ കുറിച്ച് സ്വതന്ത്ര അന്വേഷണം വേണമെന്ന യൂറോപ്യന്‍ യൂനിയന്‍ രാജ്യങ്ങളുടെ നേതൃത്വത്തിലുള്ള കരട് പ്രമേയത്തെ ചൈന പിന്തുണക്കില്ലെന്ന് അദ്ദേഹം വ്യക്തമാക്കിയതായും 'സൗത്ത് ചൈന മോണിങ് പോസ്റ്റ് ' റിപ്പോര്‍ട്ട് ചെയ്തു. കോവിഡ്-19ന്റെ ഉത്ഭവത്തെ കുറിച്ചും അതിന്റെ വ്യാപനം നേരിടാന്‍ ലോകാരോഗ്യ സംഘടന അന്താരാഷ്ട്ര തലത്തില്‍ സ്വീകരിച്ച നടപടികളെ കുറിച്ചുമുള്ള 'സമഗ്ര വിശകലനത്തെ' ചൈന പിന്തുണക്കുന്നു. ഇത് പക്ഷേ, മഹാമാരി പൂര്‍ണമായും ഒടുങ്ങിയ ശേഷം നടത്തുന്നതാണ് നല്ലത്. ശാസ്ത്രീയ അടിത്തറയോടെ വസ്തുനിഷ്ഠവും പക്ഷം ചേരാതെയുമുള്ള വിശകലനമാണ് നടത്തേണ്ടതെന്നും അദ്ദേഹം അഭിപ്രായപ്പെട്ടു. അമേരിക്ക ഫണ്ട് വെട്ടിക്കുറച്ച സാഹചര്യത്തില്‍, ലോകാരോഗ്യ സംഘടനക്ക് ലോകരാജ്യങ്ങളുടെ പിന്തുണ ആവശ്യമാണെന്നും ഷീ ജിന്‍പിങ് പറഞ്ഞു.

ലോകാരോഗ്യ സംഘടനയുടെ തീരുമാനങ്ങള്‍ കൈക്കൊള്ളുന്ന സമിതിയാണ് ലോകാരോഗ്യ അസംബ്ലി. തിങ്കള്‍, ചൊവ്വ ദിവസങ്ങളില്‍ വെര്‍ച്വലായാണ് ലോകാരോഗ്യ അസംബ്ലി ഈ വര്‍ഷത്തെ സമ്മേളനം ചേര്‍ന്നത്. 194 അംഗരാജ്യങ്ങളുടെ പ്രതിനിധികള്‍ വാര്‍ഷിക സമ്മേളനത്തില്‍ പങ്കെടുക്കുന്നുണ്ട്.ഇതിനോടകം മൂന്നുലക്ഷത്തോളം ആളുകളുടെ മരണത്തിന് കാരണമായ കൊറോണ വൈറസിന്റെ ഉറവിടത്തെ കുറിച്ച് അന്വേഷിക്കണമെന്ന് ആവശ്യപ്പെട്ട് യൂറോപ്യന്‍ യൂനിയന്‍ വാര്‍ഷിക സമ്മേളനത്തില്‍ കരട് പ്രമേയം കൊണ്ടുവന്നിട്ടുണ്ട്. ഇന്ത്യ ഉള്‍പ്പെടെ 120 രാജ്യങ്ങള്‍ ഇതിനെ അനുകൂലിച്ചു. കൊറോണ വൈറസിന്റെ ഉത്ഭവം സംബന്ധിച്ച് ചൈനയില്‍ അന്വേഷണം നടത്തണമെന്ന ആവശ്യത്തോട് ഇനിയും ചൈന അനുകൂലമായി പ്രതികരിച്ചിട്ടില്ല. 'സമഗ്ര അവലോകനം' ആകാമെന്ന അഭിപ്രായം അന്വേഷണത്തിനുള്ള സമ്മതമാണെന്ന് വ്യാഖ്യാനിക്കപ്പെടുമ്പോഴും, ലോകത്തിന്റെ അടിയന്തരശ്രദ്ധ ജനങ്ങളെ രക്ഷിക്കുക എന്നതായിരിക്കണമെന്ന നിര്‍ദേശമാണ് സമ്മേളനത്തില്‍ ഷീ ജിന്‍പിങ് മുന്നോട്ടുവെച്ചത്.

കോവിഡ് 19 പുറത്തു കൊണ്ടുവന്ന, പൊതുജനാരോഗ്യ സുരക്ഷയിലെയും അതിന്റെ നടത്തിപ്പിലെയും ആഗോളതലത്തിലുള്ള ദൗര്‍ബല്യവും കുറവും പരിഹരിക്കാന്‍ നടപടിയുണ്ടാകണം. പൊതുജനാരോഗ്യ സംരക്ഷണത്തിന്റെ ഭരണ നിര്‍വഹണം ആഗോളതലത്തില്‍ ശക്തിപ്പെടുത്തണം' - അദ്ദേഹം പറഞ്ഞു. കോവിഡ്-19നെ കുറിച്ചുള്ള ആശങ്കകള്‍ പടരുന്നതിനിടെയും ലോകാരോഗ്യ സംഘടനയുടെയും അതിന്റെ ഡയറക്ടര്‍ ജനറല്‍ ടെഡ്രോസ് ഖെബ്രിയേസസിനെതിരെയും വിമര്‍ശനങ്ങള്‍ ഉയരുന്നതിനിടെയുമാണ് ഇത്തവണത്തെ വാര്‍ഷിക സമ്മേളനം നടക്കുന്നത്.