2 മാസത്തിനുശേഷം ഇറ്റലിയില് പള്ളികള് തുറന്ന് ദിവ്യബലി
ഇറ്റലിയില് ലോക്ഡൗണ് ഇളവുകള് നിലവില് വന്നതോടെ 2 മാസത്തിനുശേഷം പള്ളികള് തുറന്ന് ദിവ്യബലി നടത്തി. ഫ്രാന്സിസ് മാര്പാപ്പയുടെ കാര്മികത്വത്തില് വത്തിക്കാനിലെ സെന്റ് പീറ്റേഴ്സ് ബസിലിക്ക പൂര്ണമായും തുറന്നു. ജോണ് പോള് രണ്ടാമന് മാര്പാപ്പയുടെ ജന്മശതാബ്ദി പ്രമാണിച്ച് അദ്ദേഹത്തെ അടക്കിയ ബസിലിക്ക കപ്പേളയിലുള്ള അള്ത്താരയില് ഫ്രാന്സിസ് മാര്പാപ്പ കുര്ബാന അര്പ്പിക്കുകയും ചെയ്തു. 2014-ല് വിശുദ്ധനായി നാമകരണം ചെയ്യപ്പെട്ട ജോണ് പോള് രണ്ടാമന്റെ ജന്മനാടായ പോളണ്ടിലും പ്രത്യേക കുര്ബാന നടത്തി.
കൈകള് അണുമുക്തമാക്കണമെന്നും ഒന്നര മീറ്റര് അകലം പാലിക്കണമെന്നും വിശ്വാസികള് മുഖാവരണം ധരിക്കണമെന്നുമുള്ള നിര്ദേശമനുസരിച്ചായിരുന്നു ചടങ്ങുകള്. ബസിലിക്കയില് പ്രവേശിക്കുന്നവരുടെ ശരീരതാപം പരിശോധിച്ചശേഷമാണ് അകത്തേക്ക് വിട്ടത്.
ബസിലിക്ക തുറക്കുന്നതിനു മുന്നോടിയായി കഴിഞ്ഞയാഴ്ച അണുനശീകരണം നടത്തിയിരുന്നു. മാര്പാപ്പ മടങ്ങിയശേഷം പൊതുജനങ്ങള്ക്കായി വൈദികര് ഇവിടെ കുര്ബാന അര്പ്പിച്ചു.
മുഖ്യ അള്ത്താരയില് നിന്ന് മാര്പാപ്പ എന്ന് കുര്ബാന അര്പ്പിക്കുമെന്ന് ഇനിയും വ്യക്തമാക്കിയിട്ടില്ല. താമസസ്ഥലത്തെ ചാപ്പലില് നിന്നാണ് ഏറെ നാളായി അദ്ദേഹം ദിവ്യബലി അര്പ്പിച്ചുവരുന്നത്.
https://www.facebook.com/Malayalivartha