പോലീസ് അതിക്രമത്തെ തുടര്ന്ന് കറുത്ത വംശജന്റെ മരണം; മിനിയപ്പിളിസില് പ്രതിഷേധം ശക്തം
അമേരിക്കയിലെ മിനിയപ്പളിസില് അക്രമിയെന്നു തെറ്റിദ്ധരിച്ചു പൊലീസ് നിലത്തുകിടത്തി കഴുത്തില് കാല്മുട്ട് അമര്ത്തിയപ്പോള് മരിച്ച കറുത്തവര്ഗക്കാരനു നീതി ലഭ്യമാക്കണമെന്ന് ആവശ്യപ്പെട്ട് യുഎസ് തെരുവുകള് പ്രക്ഷുബ്ധമായി. കറുത്തവര്ഗക്കാര്ക്കു നേരെയുള്ള വംശീയാതിക്രമങ്ങളിലെ ഏറ്റവും പുതിയ ഇരയായിത്തീര്ന്ന ജോര്ജ് ഫ്ലോയ്ഡിന്റെ ഓര്മയില് കോവിഡ് നിബന്ധന മാനിച്ചു മാസ്ക്കണിഞ്ഞു ജനം പ്രതിഷേധവുമായി അണിനിരന്നപ്പോള് അങ്ങിങ്ങു സംഘര്ഷമുണ്ടായി. പൊലീസ് കണ്ണീര്വാതകം പ്രയോഗിച്ചു. ലൊസാഞ്ചലസിലും പ്രതിഷേധം നടന്നു.
3 പൊലീസ് ഉദ്യോഗസ്ഥരെ സംഭവവുമായി ബന്ധപ്പെട്ട് ജോലിയില്നിന്നു പിരിച്ചുവിട്ടു. സംഭവത്തെക്കുറിച്ച് എഫ്ബിഐ അന്വേഷിക്കുമെന്നും നീതി നടപ്പിലാക്കുമെന്നും യുഎസ് പ്രസിഡന്റ് ഡോണള്ഡ് ട്രംപ് പ്രഖ്യാപിച്ചു. പ്രതിഷേധ റാലിക്കിടെ കടകളില് മോഷണവും നടന്നു. വ്യാപാരസ്ഥാപനങ്ങള് തീയിട്ടു നശിപ്പിച്ചതായും റിപ്പോര്ട്ടുണ്ട്.
2014-ല് ന്യൂയോര്ക്ക് സിറ്റിയില് എറിക് ഗാര്നര് (43) എന്ന കറുത്തവര്ഗക്കാരനെയാണു പൊലീസുകാര് ശ്വാസം മുട്ടിച്ചു കൊന്നത്. മരിക്കുംമുന്പ് എറിക് അവസാനമായി പറഞ്ഞ വാക്കുകള് 'എനിക്കു ശ്വാസം മുട്ടുന്നു' എന്നായിരുന്നു. കറുത്തവര്ഗക്കാര്ക്കു നേരെയുള്ള പൊലീസ് അതിക്രമത്തിന്റെ ആ കഥയും ജോര്ജ് ഫ്ലോയ്ഡിന്റെ (46) മരണം ഓര്മപ്പെടുത്തുന്നു.
ബ്ലാക്ക് ലൈവ്സ് മാറ്റര് (കറുത്തവര്ഗക്കാരുടെ ജീവനും വിലയുണ്ട്) എന്ന പേരിലുള്ള മുന്നേറ്റം യുഎസില് ശക്തി പ്രാപിച്ചത് എറിക്കിന്റെ കൊലപാതകത്തോടെയാണ്.
https://www.facebook.com/Malayalivartha