നൈജീരിയയുടെ വിദേശകാര്യമന്ത്രി ജ​ഫ്രി ഒന്യേമക്ക് കോവിഡ്-19 സ്ഥിരീകരിച്ചു. ഞായറാഴ്​ച മന്ത്രി തന്നെയാണ്​ ഇക്കാര്യം ട്വിറ്ററിലൂടെ അറിയിച്ചത്. തൊണ്ടക്ക്​ അസ്വസ്ഥത അനുഭവപ്പെട്ടതിനെ തുടർന്ന്​ ആശുപത്രിയിലെത്തിയതിന് പിന്നാലെ പരിശോധനക്ക്​ വിധേയനായപ്പോഴാണ്​ രോഗവിവരം അറിയുന്നത്​.

അതേസമയം ഒനീമിയയുടെ ​നാലാമത്തെ കോവിഡ്​ പരിശോധനയായിരുന്നു ഇത്​. നേരത്തേ നടത്തിയ മൂന്ന്​ പരിശോധനകളിലും കോവിഡ്​ നെഗറ്റീവ്​ ആയിരുന്നു.

‘‘തൊണ്ടക്ക്​ അസ്വസ്ഥത ഉണ്ടായതിനെ തുടർന്ന്​ ഇന്നലെ എൻെറ നാലാമ​ത്തെ കോവിഡ്​ പരിശോധന നടത്തി. ദൗർഭാഗ്യവശാൽ ഇത്തവണ പോസിറ്റീവ്​ ആയി. ഇതാണ്​ ജീവിതം ! ചിലപ്പോൾ വിജയിക്കും ചിലപ്പോൾ പരാജയപ്പെടും. ഐസൊലേഷനിലേക്ക്​ പോവുകയാണ്​. നല്ലത്​ വരാൻ പ്രാർഥിക്കുന്നു.’’ - ഒന്യേമ ട്വീറ്റ്​ ചെയ്​തു.