റഷ്യന്‍ പ്രസിഡന്റ് വ്‌ളാഡിമിര്‍ പുടിന്‍ ഡിസംബര്‍ 5,6 തീയതികളില്‍ ഇന്ത്യ സന്ദര്‍ശിക്കുകയാണ്. പുടിന്റെ ഇത്തവണത്തെ വരവില്‍ ഇന്ത്യയ്ക്ക് ഏറെ ഗുണകരമാകുന്ന പ്രതിരോധ ഇടപാടുകളും ഉണ്ടാകുമെന്നാണ് വിവരം. ഓപ്പറേഷന്‍ സിന്ദൂറില്‍ ഇന്ത്യയ്ക്ക് മുന്നേറാനായത് പാക് ആയുധങ്ങളെ തകര്‍ത്തെറിഞ്ഞ ആയുധശേഖരങ്ങള്‍ കാരണമാണ്. ഇക്കൂട്ടത്തില്‍ ഏറെ ശ്രദ്ധേയമായത് പാക് മിസൈലുകളെയും വിമാനങ്ങളെയും പാകിസ്ഥാനുള്ളില്‍ തന്നെ തകര്‍ത്ത ഇന്ത്യയുടെ എസ്400 മിസൈല്‍ പ്രതിരോധ സംവിധാനമാണ്. റഷ്യന്‍ നിര്‍മ്മിതമായ എസ്400 ഓപ്പറേഷന്‍ സിന്ദൂറില്‍ മികവോടെ പ്രവര്‍ത്തിച്ചത് ലോകശ്രദ്ധയെത്തന്നെ ആകര്‍ഷിച്ചിരുന്നു. 2018ലെ 5.43 ബില്യണ്‍ ഡോളറിന്റെ പ്രതിരോധ കരാറനുസരിച്ച് അഞ്ച് റെജിമെന്റുകളാണ് ഇന്ത്യ എസ്400 മിസൈല്‍ പ്രതിരോധ സംവിധാനം സ്വന്തമാക്കിയത്.

ഇതിന്റെ വിജയം ഇന്ത്യക്ക് നല്‍കിയത് വലിയ ആത്മവിശ്വാസമാണ്. എസ്400 അഞ്ച് യൂണിറ്റുകള്‍ കൂടി ഇന്ത്യ ഇതോടെ റഷ്യയോട് ആവശ്യപ്പെട്ടിട്ടുണ്ട്. എസ്400ന്16 ലോഞ്ചര്‍ വാഹനങ്ങളുള്ള രണ്ട് ബാറ്ററികളടങ്ങുന്ന റെജിമെന്റ് ഇന്ത്യയ്ക്ക് സ്വന്തമായുണ്ട്. ഇതിനിടെ ഇന്ത്യയ്ക്ക് അതിലും മികച്ച ആയുധം നല്‍കാന്‍ തയ്യാറായിരിക്കുകയാണ് റഷ്യ. എസ്400ന് ശേഷം അടുത്ത തലമുറ മിസൈല്‍ പ്രതിരോധ സംവിധാനമാണ് എസ്500. പുതുക്കിയ പതിപ്പേയല്ല എസ്500. പകരം മറ്റൊരു പ്രതിരോധ സംവിധാനം തന്നെയാണ്.

യുദ്ധവിമാനങ്ങള്‍, ക്രൂയിസ് മിസൈലുകള്‍, ഡ്രോണുകള്‍ എന്നിവ തകര്‍ക്കുന്നവയാണ് എസ്400. ഇവയ്‌ക്കെല്ലാം പുറമേ ബാലിസ്റ്റിക് മിസൈലുകളും ഹൈപ്പര്‍സോണിക് ആയുധങ്ങള്‍ വരെ തകര്‍ക്കാന്‍ എസ്500ന് കഴിയും. തന്ത്രപരവും പ്രവര്‍ത്തനപരവുമായ ഇടങ്ങളില്‍ എസ്400 ഉപയോഗിക്കും അതീവ തന്ത്രപരമായ ഇടങ്ങളിലാണ് എസ്500ന് ഉപയോഗം. ഇന്ത്യ ഈ വജ്രായുധത്തെ സ്വന്തമാക്കുമോ എന്നത് വരുംദിവസങ്ങളില്‍ വ്യക്തമാകും.

എസ്400 കരാറില്‍ നിന്ന് വിഭിന്നമായി എസ്500 ഇന്ത്യയുടെ കൂടി സഹകരണത്തില്‍ നിര്‍മ്മിക്കാനാകും സാദ്ധ്യത. റഷ്യന്‍ കമ്പനിയായ അല്‍മാസ് ആന്റേയോടൊപ്പം ഇന്ത്യന്‍ പ്രതിരോധ കമ്പനികള്‍ സഹകരിച്ചേക്കും. എസ്400നെക്കാള്‍ കിടയറ്റതാണ് എസ്500 എന്നതിന് സംശയമേയില്ല. 400 കിലോമീറ്റര്‍ റെയ്ഞ്ചാണ് എസ്400 നല്‍കുന്നതെങ്കില്‍ 500 മുതല്‍ 600 കിലോമീറ്റര്‍ വരെയാണ് എസ്500ന്റെ റെയ്ഞ്ച്. എസ്400ന് 30 കിലോമീറ്റര്‍ ഉയരം വരെ പ്രതിരോധിക്കാനാകും എന്നാല്‍ എസ്500ന് 180 മുതല്‍ 200 കിലോമീറ്റര്‍ വരെ സാദ്ധ്യമാകും.